ကရင်နီပြည် လွိုင်ကော်မြို့ရှိ စစ်ရှောင်ပြည်သူများ၊ ကိုယ်ဝန်ဆောင်မိခင်နှင့် ကလေးငယ်များအတွက် ကျန်းမာရေး စောင့်ရှောက်မှု လိုအပ်နေကြောင်း စုံစမ်းသိရသည်။
လက်ရှိတွင် လွိုင်ကော်စစ်ဘေးရှောင် ပြည်သူများသည် စစ်ဘေးတင်သာမက ရေဘေးကိုပါ ထပ်မံကြုံတွေ့ရပြီးနောက် ကလေးငယ်နှင့် ကိုယ်ဝန်ဆောင်မိခင်များသည် ဆေးရုံ၊ ဆေးခန်းသို့ သွားရောက် ပြသရန် လမ်းကြောင်းခက်ခဲနေသည်။
ထို့ပြင် ဆေးရုံတွင်လည်း ဆေးဝါးနှင့် ကုသမှုဆိုင်ရာ အားနည်းချက်များ ရှိနေပြီး မိခင်နှင့် ကလေးများအတွက် အသက်အန္တရာယ် ရှိလာနိုင်သည်အထိ ကျန်းမာရေးစောင့်ရှောက်မှု လိုအပ်နေကြောင်း စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“လက်ရှိတော့ ကိုယ်ဝန်ဆောင်မိခင် မီးဖွားဖို့၊ ဆေးခန်းပြဖို့ အတော်လေး ရုန်းကန်ရတယ်။ ကလေးငယ်တွေဆို ကာကွယ်ဆေးထိုးဖို့လည်း ဆေးက မရှိ။ ဆေးရုံမှာလည်း ဆေးဝါးပိုင်းဆိုင်ရာတွေက မရှိဘူး။ အဲ့လိုတွေကြောင့် မိခင်နဲ့ကလေးတွေ အသက်အန္တရာယ် ရှိလာနိုင်တယ်” ဟု ၎င်းစစ်ဘေးရှောင် အမျိုးသမီးက ပြောသည်။
စစ်အာဏာသိမ်းပြီးနောက် ကရင်နီပြည် လွိုင်ကော်မြို့တွင် “၁၁.၁၁ စစ်ဆင်ရေး”ကြောင့် စစ်ဘေးရှောင်တချို့သည် ဘေးလွတ်ကင်းရာ အခြားမြို့များသို့ ပြောင်းရွှေ့နေထိုင်သူ ရှိသကဲ့သို့ တိမ်းရှောင်ရန် ခက်ခဲနေသည့် ပြည်သူများသာ ၎င်းမြို့အနီးတဝိုက်ရှိ တောထဲတွင် တဲထိုးပြီး နေထိုင်နေရကြောင်း စစ်ဘေးရှောင်အမျိုးသမီး က ပြောဆိုသည်။
စက်တင်ဘာလအတွင်း လွိုင်ကော်မြို့တွင် ရေကြီးရေလျှံမှု ဖြစ်ပွားပြီးနောက်တွင် သောက်သုံးရေများလည်း ပြတ်လတ်ကာ ကလေးနှင့် လူငယ်များတွင် အရေပြားယားယံမှု ပိုမိုဖြစ်ပွားလာပြီး ဝမ်းလျှောဝမ်းပျက်ခြင်းလည်း ထပ်မံကူးစက်မှု ရှိနေကြောင်း အသက် (၄၀)နှစ်အရွယ် စစ်ဘေးရှောင် အမျိုးသမီးတစ်ဦးက ပြောသည်။
အရေပြားရောဂါ ဖြစ်ပွားနေသူများတွင် ကလေးသူငယ်များနှင့် ကိုယ်ဝန်ဆောင်မိခင်များက အများဆုံးဖြစ်ပြီး တကိုယ်ရည် သန့်ရှင်းမှု နည်းပါးသည့်အပြင် မသန့်ရှင်းသော ရေကို အသုံးပြုနေရခြင်းကြောင့် ဖြစ်သည်ဟု ၎င်းအမျိုးသမီးက ဆက်ပြောသည်။
“အခုက ရေတော့ကျသွားတယ်၊ ရေဝယ်သုံးရတဲ့ အခက်အခဲတွေ ရှိတယ်။ စစ်ရှောင်တွေကလည်း ရေနောက်တွေနဲ့ပဲ ရေချိုး၊ ရေသောက်တာတွေ ရှိတော့ ယားယံတာ ဖြစ်တယ်၊ ဝမ်းလျှော ဝမ်းပျက်တာတွေ ရှိတယ်။ ဘာမှ မရှိတဲ့ကြားက ရှိတာလေးနဲ့ ရှာဖွေစားသောက်ရတဲ့ အပိုင်းက တော်တော်ရုန်းကန်ယူနေရတယ်”ဟု ၎င်းအမျိုးသမီးက ပြောသည်။
ထို့အပြင် ကရင်နီ(ကယား)ပြည် လွိုင်ကော်မြို့တွင် စစ်ကောင်စီတပ်နှင့် ပအိုဝ်းပြည်သူ့စစ် ( PNO) တပ်တို့ ပူးပေါင်းပြီး မြို့အဝင်အထွက်ဂိတ်တွင် ပစ္စည်းသယ်ယူခွင့်ကိုလည်း တားဆီးပိတ်ပင်နေသည်ဟု ဒေသခံပြောပြချက်အရ သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments