သျှမ်းပြည်တောင်ပိုင်း၊ တောင်ကြီးမြို့တွင် တန်ဆောင်တိုင်ပွဲတော်အတွင်း ဟိုတယ်နှင့်တည်းခိုခန်း ဘိုကင် ပြည့်နေ့ကြောင်း စုံစမ်းသိရှိရပါသည်။
နိုင်ငံရေးအခြေနေရှုပ်ထွေးနေ့သည့်ကြားမှ စစ်ကောင်စီက တောင်ကြီးတန်ဆောင်တိုင်ကို လာမည် နိုဝင်ဘာလ ၉ ရက်မှ ၁၅ ရက်အတွင်းကျင်းပပြုလုပ်သွားမည်ဖြစ်ပြီး ရပ်ကွက်အလိုက် မီးပုံးပျံ ပညာရှင်များလည်း အတူပူးပေါင်းပါဝင်သွားမည် ဖြစ်ကြောင်း ဒေသခံများပြောပြချက်အရသိရသည်။
တန်ဆောင်တိုင်ပွဲတော်အတွင်း ဟိုတယ်အခန်းများ လူပြည့်နေသည့်အပြင် အခန်းခများလည်း ဈေးမြင့်တက် နေကြောင်းလည်း တောင်ကြီးမြို့တွင်း ဟိုတယ်ဝန်ထမ်း တစ်ဉီးက သျှမ်းသံတော်ဆင့်ကိုပြောသည်။
“အကုန်ပြည့်နေပြီး တစ်ခန်းမှ မကျန်တော့ဘူး။ တန်ဆောင်တိုင် ၉ ရက်နေ့ကနေစပြီး ၁၅ ရက်နေ့အထိ လုံးဝ မရတော့ဘူး။ နှစ်ယောက်အိပ်ဆို၂ သောင်း ဝန်းကျင်။ ၆၈၀၀၀ကျပ် ကနေစရှိတယ်။ နိုဝင်ဘာလကစပြီး အဲဒါက မူရင်းဈေး ဖြစ်တော့မှာ ။ စုံစမ်းရသလောက်ကတော့ ဟိုတယ်အကုန်ပြည့်နေပြီ။” ဟု၎င်းက ဆိုသည်။
တောင်ကြီး ဟိုတယ်များတွင် တည်းခိုမည့်သူများသည် ဧည့်စာရင်း တိုင်ကြား ရမည်ဖြစ်ပြီး ယခင်နှစ်များကဲ့သို့ ဓာတ်ပုံနှင့်တကွ တာဝန်ရှိသူများထံ ပို့ဆောင်ရမည်ဟု ၎င်း ဝန်ထမ်း တစ်ဦးက ပြောသည်။
တောင်ကြီးမြို့သည် ကရင်နီနှင့် သျှမ်းမြောက်ဘက် စစ်ဘေးရှောင်များအပြင် သျှမ်းတောင်အတွင်း တိုက်ပွဲ ဖြစ်ပွားသည့် ဒေသများမှလည်း လာရောက် ရှောင်တိမ်းနေကြသည့် ဒေသဖြစ်သည်။
“ ဟိုတယ် ဘိုကင် လာလုပ်တဲ့သူက ပြည်မ ဖက်ကလူတွေများတယ်။ သျှမ်းပြည်ကမဟုတ်တာတော့ သေချာတယ်။ ခုချိန်က ပွဲငတ်နေတော့။သျှမ်းပြည်ကဆို စစ်ရှောင်နေကြတယ်လေ။ သူတို့တောင်အနိုင်နိုင် သူတို့တော့ ဟိုတယ် ငှားမှာ မဟုတ်ဘူး။” ဟု ဟိုတယ်တွင် အလုပ်လုပ်နေသူတစ်ဦးက ပြောသည်။
ထို့အပြင် ပွဲတော်ရက်နီးလာသည်နှင့်အမျှ လိုင်စင်မရှိသည့် ကားနှင့် ဆိုင်ကယ်များကိုပါ ဖမ်းဆီးမှု လုပ်ဆောင်လာနေပြီး လက်ရှိတောင်ကြီးမြို့အဝင်အထွက်နှင့် ဂိတ်များတွင် စစ်ကောင်စီနှင့် ပအိုဝ်းပြည်သူ့စစ် (PNO)တို့က တင်းကျပ်စွာ စစ်ဆေးမှုများ ပြုလုပ်လာနေကြသည်။
အလုပ်သင် နန်းလရောင် ရေးသားသည်။
Leave a Comments