သျှမ်းပြည်တောင်ပိုင်း ပင်လောင်းမြို့နယ်တွင် စစ်ဘေးရှောင်ပြီး နေရပ်ပြန်သွားသည့် ဒေသခံများကို ပအိုဝ်းပြည်သူ့စစ် PNO က စစ်မှုထမ်းရန် လာရောက်ခေါ်ဆောင်သွားကြောင်း စုံစမ်းသိရသည်။
အောက်တိုဘာလ ပထမပတ်မှစ၍ ပင်လောင်းမြို့နယ်တွင် နေရပ်ပြန်သွားသော ဒေသခံများကို စစ်ကောင်စီ လက်အောက်ခံ ပအိုဝ်းပြည်သူ့စစ် PNO က အသက် (၁၆) နှစ်မှ အသက် (၆၀) အတွင်း အမျိုးသားများကို စစ်မှုထမ်းရန် ခေါ်ဆောင်သွားပြီး အချို့ကို ရွာအတွင်း၌ ကင်းစောင့်ခိုင်းနေကြောင်း အသက် (၄၀)နှစ်ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ပြန်ချင်တယ် အိမ်ပြန်ကြည့်ချင်တယ်ဆိုရင် စစ်ထဲဝင်ပြီးတော့ ပြန်ရတယ်။ ပြီးတော့ သူတို့က ရှေ့တန်းသွားဖို့ ခေါ်ရင်လည်း တစ်ခါကို (၁၀) ယောက် မဲနှိုက်ပြီး ခေါ်တယ်။ ယောကျာ်းလေးတွေက (၁၆) နှစ်ကနေ (၆၀) ထိ ယူတယ်။ ရွာထဲမှာလည်း အလှည့်ကျ ကင်းစောင့်ခိုင်းတယ်”ဟု ၎င်းအမျိုးသားက ပြောသည်။
ပင်လောင်းမြို့နယ်အတွင်း နောင်ဝိုးကျေးရွာ၊ လှဲလောင်းနှင့် အခြားသော နေရပ်ပြန်သွားသည့် ကျေးရွာဒေသခံများကို ပအိုဝ်းပြည်သူ့စစ် PNO မှ စစ်မှုထမ်းရန် ယခုနည်းလမ်းကို အသုံးပြုခေါ်ယူနေကြောင်း ရွာဒေသခံအမျိုးသားတစ်ဦးက ထပ်လောင်း ပြောသည်။
“တိုက်ပွဲတွေ ငြိမ်နေတော့ တချို့အမျိုးသားတွေက ပြန်သွားကြတာ။ ပြန်ရောက်နေတဲ့ လူတွေကို ထမင်းဟင်းတွေ ချက်ခိုင်း၊ ရှေ့တန်းရောက်နေတဲ့ တပ်သားတွေကို သူတို့က ထမင်းဟင်းတွေ သွားပို့ခိုင်းတာ။ အများစု အိမ်ပြန်ကြည့်ကြတဲ့ လူတွေက ယောကျာ်းလေးတွေလေ။ အဲ့မှာ ပြန်ရောက်သွားတဲ့ လူတွေကို သူတို့က စစ်ဝတ်စုံတွေ ဆင်ပေးပြီးတော့ ကင်းစောင့်ခိုင်းတယ်”ဟု အသက် (၃၀)နှစ်ဝန်းကျင် ဒေသခံအမျိုးသားတစ်ဦးက ပြောသည်။
ပင်လောင်းမြို့နယ်နှင့် ဖယ်ခုံမြို့နယ်အကြားရှိ ကျေးရွာများတွင် စစ်ကောင်စီတပ်နှင့် ၎င်းလက်အောက်ခံ ပအိုဝ်းပြည်သူ့စစ် PNO တို့ ပူးပေါင်းပြီး ကရင်နီ တော်လှန်ရေး တပ်ပေါင်းစုတို့ ပြီးခဲ့သည့် စက်တင်ဘာလ နောက်ဆုံးပတ်မှစ၍ နေ့စဉ် တိုက်ပွဲများ ပြင်းထန်နေကြောင်း သိရသည်။
ယခုလက်ရှိ ပင်လောင်းမြို့နယ် သျှမ်း-ကရင်နီနယ်စပ် နမ့်ဖာမူဖက်တွင် စစ်ကောင်စီ၊ ပအိုဝ်းပြည်သူ့စစ် (PNO) နှင့် တော်လှန်ရေးအင်အားစု PDF တို့ တိုက်ပွဲ ပြင်းထန်နေလျှက် ရှိသည်။
Leave a Comments