သျှမ်းပြည်တောင်ပိုင်း ပင်လောင်းမြို့နယ်ရှိ အသက် ၅၆နှစ်အရွယ်ရှိ စစ်ရှောင်အမျိုးသမီးတစ်ဉီး မုဒိမ်းကျင့်ခံရကြောင်း စုံစမ်းသိရသည်။
ပြီးခဲ့သည့် အောက်တိုဘာ ၂၆ရက်တွင် အသက် ၅၆နှစ်အရွယ် စစ်ရှောင်အမျိုးသမီးနှင့် ၎င်း၏မြေးသည် ပြောင်းခြံထဲရှိနေစဥ် အသက် ၂၀အရွယ်ရှိ လူငယ်တစ်ဉီးက လာရောက်မုဒိမ်းကျင့်သွားကြောင်း အဆိုပါ ဖြစ်စဉ်ကို သိရှိသည့် အမျိုးသမီးတစ်ဉီးက သျှမ်းသံတော်ဆင့်ကိုပြောသည်။
“သူ့ကို အသက် ၅၆နှစ်အရွယ်အမျိုးသမီးကို အသက် ၂၀ လူငယ်က ဓားထောက်ပြီး မုဒိမ်းကျင့်သွားတာ။ စစ်သားလား ၊ PDFလားတော့မသိဘူး။ ဗမာစကားပြောတယ်။ မအော်နဲ့ အော်ရင်သတ်မယ်ဆိုပြီး ခြိမ်းခြောက်သေးတယ်” ဟု ဖြစ်စဥ်ကို သိရှိသည့် အမျိုးသမီးက ပြန်ပြောပြသည်။
လက်ရှိ အသက်၅၆နှစ်အရွယ် အမျိုးသမီးနှင့် ၎င်း၏မြေးကို စစ်ရှောင်ဘုန်းကြီးကျောင်းတွင် ပြောင်းရွှေ့ထားကြောင်း၊ ကျူးလွန်သည့် လူငယ်သည်လက်ရှိအချိန်ထိ လွှတ်မြောက်နေသေးကြောင်း သိရသည်။
ထိုမုဒိမ်းကျူးလွန်ခံရသည့်အမျိုးသမီးသည် စိတ်ပိုင်းဆိုင်ရာထိခိုက်မှုဖြစ်နေပြီး၊ ၎င်း၏ ကျန်းမာရေးအခြေအနေနှင့် လုံခြုံရေးကို ပအိုဝ်းအမျိုးသမီး အရေး တက်ကြွလှုပ်ရှားသူများက ကူညီဆောင်ရွက်နေကြောင်း သိရသည်။
“ဒီကျူးလွန်ခံရတဲ့သူက ခုဆို တော်တော်လေး စိတ်ထိခိုက်နေတယ်။ ဘေးမှာ ထိုင်ပြီး ကြည့်နေရတဲ့ မြေးမလေးဆိုလည်း သူအရမ်းကြောက်နေတယ်။ သူတို့ကို လုံခြုံအောင်၊ ပြီးတော့ စိတ်ပိုင်းဆိုင်ရာကို အကောင်းဆုံး ကုစားပေးဖို့ လုပ်ဆောင်နေတယ်။”ဟု ပအိုဝ်းအမျိုးသမီးရေးတက်ကြွလှုပ်ရှားသူ တစ်ဦးက ပြောသည်။
ယခုလက်ရှိ ပင်လောင်းမြို့နယ် သျှမ်း-ကယားနယ်စပ် နမ့်ဖာမူဖက်တွင် စစ်ကောင်စီ၊ ပအိုဝ်းပြည်သူ့စစ် (PNO) နှင့် တော်လှန်ရေးအင်အားစု PDFတို့ တိုက်ပွဲ ပြင်းထန်နေလျှက်ရှိသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments