သျှမ်းပြည်မြောက်ပိုင်း နောင်ချိုမြို့နယ်တွင် တိုက်ပွဲများပြင်းထန်နေပြီး စစ်ကောင်စီတပ်မှ လက်နက်ကြီးများဖြင့် နေ့စဉ် ဆက်တိုက်ပစ်ခတ်နေကြောင်း စုံစမ်းသိရသည်။

အောက်တိုဘာလ တတိယပတ်မှ စတင်၍ နောင်ချိုမြို့နယ်တွင် စစ်ကောင်စီတပ်က မြေပြင်ထိုးစစ် စတင်လာပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ပူးပေါင်းတပ်ဖွဲ့တို့နှင့် တိုက်ပွဲများ စတင်ပြင်းထန်လာခဲ့သည်။

နောင်ချိုမြို့နယ် ဂန့်ကော်နှင့် တောင်းခမ်းဒေသတို့တွင် စစ်ကောင်စီတပ်နှင့် TNLA ပူးပေါင်းတပ်ဖွဲ့တို့ နေ့စဉ် တိုက်ပွဲများ ပြင်းထန်နေပြီး စစ်ကောင်စီတပ်မှ ယနေ့ ( အောက်တိုဘာလ ၂၈ ရက်) နံနက်ပိုင်းအထိ လက်နက်ကြီးများ ဆက်တိုက်ပစ်ခတ်နေကြောင်း အသက် (၄၀) နှစ် ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“အောက်တိုဘာ ၂၆-၂၇ တစ်ညလုံး တစ်နေကုန် မနားပဲပစ်တာ၊ လက်နက်ကြီးကော သေနတ်သံကော ကြားရတယ်။ တိုက်ပွဲက တော်တော်ပြင်းထန်နေတယ်လို့တောင် ပြောလို့ရတယ်။ မနေ့က သေနတ်သံတွေ ခနပြန်ငြိမ်ပြီးတော့ လက်နက်ကြီးနဲ့ ပြန်ပစ်တယ်။ ဒီနေ့မနက်ပိုင်းအထိ ရွာထဲတွေကို ပစ်နေတုန်းပဲ”ဟု ၎င်းဒေသခံ အမျိုးသားက ပြောသည်။

နောင်ချိုမြို့နယ် ဘန့်ဘွေး စစ်ကောင်စီတပ်မှ လက်နက်ကြီးများဖြင့် ရေမောင်းတန်း၊ အုမ္မသီးနှင့် ဂန့်ကော်ကျေးရွာ အနီးတစ်ဝိုက်ရှိ TNLA ပူးပေါင်းတပ်ဖွဲ့တို့ တည်ရှိနိုင်သည့် နေရာများကို ရမ်းသမ်းပစ်ခတ်နေကြောင်း အသက် (၄၀)နှစ် ဝန်းကျင် ဒေသခံအမျိုးသားတစ်ဦးက ပြောသည်။

“ဒီမနက် မိုးမလင်းသေးဘူး၊ ရေမောင်းတန်းရွာဘက်ကို သူတို့ လက်နက်ကြီးနဲ့ ၃ လုံး ၄ လုံးလောက် ပစ်တာ လယ်ကွင်းတွေထဲ ကျတယ်။ သူတို့ တိုက်ပွဲမရှိလည်း ပစ်တယ်၊ သူတို့က လက်နက်ကြီးကို တော်လှန်ရေးအဖွဲ့တို့ TNLA တွေရှိမယ့် နေရာတွေကို ဦးတည်ပြီးပစ်တာ”ဟု ၎င်းအမျိုးသားက ပြောသည်။

ထိုစစ်ကောင်စီ လက်နက်ကြီး ပစ်ခတ်မှုများကြောင့်‌ ကျေးရွာရှိ ဒေသခံတို့၏ လယ်ယာမြေများ၊ အိမ်များ ပျက်စီးဆုံးရှုံးနေရပြီး နေရပ်ပြန်ရန်လည်းအတွက်လည်း စိုးရိမ်နေရကြောင်း ဒေသခံများထံမှ သိရသည်။

“ဒီမနက်က အိမ်ကို ခဏပြန်ကြည့်မလို့ပဲ၊ လက်နက်ကြီးကျလို့ မပြန်ရဘူး။ ကျနော်တို့ရဲ့ လယ်ယာတွေက စပါးတွေက ယူချိန်တန်ပြီ သိမ်းချိန်တန်ပြီ ဘာမှ မလုပ်ရသေးဘူး။ ပြန်ဖို့လည်း ဘယ်သူမှ မပြန်ရဲကြဘူး။ နောက်နှစ်အတွက်တောင် စိတ်ပူရတယ် ဒီလိုဆို ဝင်ငွေမရှိ၊ အလုပ်မရှိဆိုတော့ စားဖို့ကလည်း တွေးနေရတာလေ”ဟု အသက် ၄၀ ဝန်းကျင် ဒေသခံအမျိုးသားတစ်ဦးက ပြောသည်။

တိုက်ပွဲဖြစ်ပွားနေသည့် အနီးတဝိုက် ဒေသနေ ကျေးရွာခံများသည် ဆွေမျိုးအိမ်၊ နီးစပ်ရာကျေးရွာနှင့် နောင်ချိုမြို့သို့ ထွက်ပြေး တိမ်းရှောင်နေရကြောင်းသိရသည်။

ယခု ဖြစ်ပွားနေသည့် တိုက်ပွဲ အတွင်း နှစ်ဖက်တပ် ထိခိုက် ကျဆုံးမှုနှင့် တကွ မြေပြင် စစ်ရေးအခြေအနေများ ကို ထပ်မံ မေးမြန်း စုံစမ်းနေဆဲ ဖြစ်သည်။

အလားတူ တိုက်ပွဲများ ပြင်းထန်နေသည့် စစ်ကောင်စီလက်အောက်ခံ အမြောက်တပ်များ တည်ရှိရာ တောင်းခမ်းကျေးရွာသည် နောင်ချိုမြို့နှင့် ၂၅ မိုင်ခန့် ကွာဝေးပြီး၊ ပြင်ဦးလွင်-နောင်ချိုကြားရှိ ဂန့်ကော်ကျေးရွာ သည် နောင်ချိုမြို့ နှင့် ၁၅ မိုင်ကျော် ကွာဝေးကြောင်း ဒေသခံများက ပြောသည်။

ယမန်နေ့ (အောက်တိုဘာလ ၂၇ ရက်) ည ၇ နာရီဝန်းကျင် စစ်ကောင်စီတပ်က နောင်ချို သပြေရွာကို လေကြောင်းဗုံးကြဲ တိုက်ခိုက်ခဲ့သည့်အတွက်ကြောင့် အမျိုးသားတစ်ဦး သေဆုံးခဲ့ကြောင်း သိရသည်။