သျှမ်းတောင်၊ ကလောမြို့၊ ရပ်ကွက် (၃) ရှိ ရွာသစ် ဘုန်းကြီးကျောင်းတွင် ယနေ့ (အောက်တိုဘာလ ၂၆ ရက်)၊ ညနေ ၆ နာရီခွဲခန့်က ယမ်းပေါက်ကွဲမှု ဖြစ်ပွားရာ သဃာတော် ၃ ပါးနှင့် လူ ၃ ဦး ထိခိုက် ဒဏ်ရာရရှိသဖြင့် ကလောဆေးရုံသို့ ပို့လိုက်ရကြောင်း မြို့ခံ တစ်ဦးက ပြောသည်။
ရေဘေးဒဏ် ပြင်းပြင်းထန်ထန် ခံခဲ့ရသည့် နာမည်ကျော် ကလောမြို့တွင် တန်ဆောင်တိုင်ပွဲ ကျင်းပရန် ပြင်ဆင်မှု အဖြစ် မီးရှူးမီးပန်းများ အတွက် ယမ်းစပ်ရာက ပေါက်ကွဲမှု ဖြစ်ပွားခဲ့ရာ ကျောင်းဆောင် ကြမ်းခင်း ပွင့်ထွက်သွားကြောင်း ဆိုသည်။
“ယမ်းထောင်း ယမ်းစပ်တာကနေ ပေါက်ကွဲတာ။ ဦးပဇင်း ၂ ပါးနဲ့ လူ ၃ ယာက် ဒဏ်ရာရတယ်။ ဦးပဇင်းတပါးက ခြေထောက်ကျိုးသွားတယ်။ အခု ကလောဆေးရုံမှာ။ အသက်တော့ မစိုးရိမ်ရဘူး ပြောတယ်” ဟု မြို့ခံက ရှင်းပြသည်။
ယမ်းပေါက်ကွဲသံ ကျယ်လောင်မှုကြောင့် မြို့ခံများ ထိတ်လန့်တကြား ဖြစ်ခဲ့ရကြောင်း ၄င်းကဆက်ပြောသည်။
ပေါက်ကွဲမှု ဖြစ်ပွားရာ ရွာသစ် ဘုန်းကြီးကျောင်းတွင် ကျောင်းထိုင် ဆရာတော် မွေးနေ့ အကြို အဖြစ် ယခုရက်ပိုင်း ခြင်းခတ်ပွဲများလည်း ကျင်းပနေကြောင်း သိရသည်။
“တနိုင်ငံလုံးက နာမည်ကြီး ခြင်းသမားတွေ ရောက်နေတယ်။ တယောက်ချင်း၊ နှစ်ယောက်တွဲ အဲလိုမျိုး ခြင်းပွဲတွေလုပ်နေကြတာ။ လောင်းကြေးက တော်တော်ကြီးတယ်” ဟု ဘုန်းကြီးကြောင်း အနီး နေထိုင်သူ တဦးက ဆိုသည်။
လက်ရှိတွင် ရေဘေး သတင်းများကြောင်း ကလောမြို့ရှိ ဟိုတယ် အများစု ဧည့်သည်မရှိဘဲ ဟောင်းလောင်း ဖြစ်နေကြောင်း မြို့ခံများက ပြောဆိုသည်။
ရေဘေးကြောင့် ကလောမြို့လယ်ခေါင် ရပ်ကွက် (၄) တရပ်ကွက်လံုးသာမက ရပ်ကွက် (၂) နှင့် ရပ်ကွက် (၃) အတွင်းရှိ ကလောချောင်းဘေး နေအိမ်များ ရေနစ်မြုပ်ခဲ့သော်လည်း ကျန် ရပ်ကွက် ၈ ခု ထိခိုက်မှု မရှိကြောင်း၊ ကလောမြို့တွင် ဟိုတယ် ရာချီရှိသည့် အနက် ဟိုတယ် ၂ လုံး အောက်ထပ် ရေဝင်မှုသာ ရှိခဲ့ကြောင်း ခရီးသွားလုပ်ငန်း လုပ်ကိုင်သူ တစ်ဦးက ပြောသည်။
Leave a Comments