သျှမ်းပြည်တောင်ပိုင်း၊ ပင်လောင်းမြို့နယ်နှင့် ညောင်ရွှေမြို့နယ် အစပ် တွင်ရှိသည့် သစ်ပင်ကောက် ရွာနှင့် နန်းတောင်းရွာတွင် ပအိုဝ်းပြည်သူ့စစ် (PNO)က ဒေသခံများကို ရွာပြင်ထွက်ခွင့်ပိတ်လိုက်ပြီဖြစ်ကြောင်း ဒေသခံများပြောပြချက်အရသိရသည်။

ပြီးခဲ့သည့် အောက်တိုဘာလ ဒုတိယပတ်တွင် စစ်ကောင်စီ နှင့် PNOက အနီးနားရှိကျေးရွာများတွင် တိုက်ပွဲ ပြင်းထန်လျက်ရှိသောကြောင့် သစ်ပင်ကောက်ရွာနှင့် နန်းတောင်းရွာတို့ကို ရွာပြင်ထွက်ခွင့်ပိတ်လိုက်ပြီး ရွာပြင်ထွက်ပါက ပစ်ခတ်မည်ဟု ခြိမ်းခြောက်ထားကြောင်း သိရသည်။

ထို့အပြင် ဒေသခံများအနေဖြင့် အင်းလေးဘက်သို့ ကျောင်းတက်ရောက်သည့် ကလေးများကိုသာ လှေတွင် အလံဖြူထောင်၍ အကြို အပို့ လုပ်နိုင်ပြီး ဒေသခံများထွက်ခွာမည်ဆိုပါက ပစ်ခတ် အရေးယူမည်ဟုလည်း ပြောဆိုကြောင်း ဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။

“ ရွာနဲ့ အနီးနားမှာက တိုက်ပွဲတွေ ဖြစ်နေတယ်။ ပြေးမယ်ဆိုလည်း PNO တွေက ပေးမထွက်။ ရွာထဲပဲ နေခိုင်းတယ်။ တကယ်လို့ ထွက်လို့ မြင်ရင် ပစ်သတ်မယ်ဆိုပြီး ပြောတယ်။ ကလေးက ရွာအရှေ့ဖက်က ဘုရားတောင် ရွာမှာ ပရဟိတကျောင်းရှိတယ်။ အဲမှာ သွားတက်ကြတယ်။ ကလေးတွေတော့ လှေနဲ့ အကြို ပို့လုပ်လို့ရတယ်။” ဟု ၎င်းက ပြောသည်။

ပင်လောင်းတောင်ဘက် သျှမ်း-ကရင်နီ (ကယား)နယ်စပ်ဖြစ်သည့် မိုးဦးနှင့် နမ့်ဖာမူဖက်တွင် စစ်ကောင်စီ၊ PNO နှင့် တော်လှန်ရေးအင်အားစု PDFတို့ တိုက်ပွဲ ပြင်းထန်စွာ ဖြစ်ပွားနေပြီး PNO နှင့် စစ်ကောင်စီ တပ်များက သစ်ပင်ကောက်ရွာတွင် စခန်းချနေရာယူထားကြောင်း အဆိုပါ အမျိုးသားက ပြောသည်။
ရွာပြင် မထွက်ရသောကြောင့် စိုက်ပျိုးထားသည့် သီးနှံများကို သွားရောက် မကြည့်နိုင်ဘဲ ရွာထဲတွင် စားသောက်ရေးခက်ခဲလာသည့် အပြင် လုံခြုံမှု မရှိကြောင်း ဒေသခံများကပြောသည်။

“ PNOတွေ စစ်ကောင်စီက ရွာထဲမှာ ရှိနေတာကိုက မလုံခြုံတာ။ ရွာနဲ့အနီးမှာလည်း တိုက်ပွဲဖြစ်တော့ ကြောက်လည်းကြောက်တယ်။ ရွာပြင်ကခြံတောင် သွားမကြည့်ရဲဘူး။ ရွာထဲမှာလည်း ဖြစ်သလိုပဲ စားနေကြရတယ်။ သူတို့ရှိတော့ တိုက်ပွဲက ရွာဘက်ကို ဦးတည်လာနိုင်တယ်။” ဟု အသက် ၄၀ ကျော်အရွယ် အမျိုးသမီးတစ်ဦးက ပြောသည်။

ယခုလက်ရှိ PNO ထိန်းချုပ်ထားသည့် ဒေသများဖြစ်သည့် ဟိုပုံး၊ဆီဆိုင်၊တောင်ကြီး ၊ပင်လောင်းနှင့် အင်းလေး အပြင် တခြားသော ဒေသဖက်တွက် စစ်မှုထမ်းအသစ်များ ခေါ်ယူစုဆောင်းနေပြီး ရပ်ရွာလုံခြုံရေးဟုဆိုကာ ရှေ့တန်းသို့ ပို့ဆောင်နေကြောင်း ဒေသခံများ ပြောပြချက်အရသိရသည်။

အလုပ်သင် သတင်းထောက် နန်းလရောင် ရေးသားသည်။