သျှမ်းပြည်တောင်ပိုင်း ဟိုပုံးမြို့ တောင်ဘက်ရှိ ကျေးရွာများတွင် စိုက်ပျိုးထားသည့် ဘိန်းစိုက်ခင်းများသည် သဘာဝဘေးကြောင့် အားလုံးနီးပါး ပျက်စီးဆုံးရှုံးသွားကြောင်း သိရသည်။

စက်တင်ဘာလမှ စတင်ပြီး ဟိုပုံးမြို့နယ် အပါအဝင် မြန်မာတစ်နိုင်ငံလုံးတွင် မိုးသန်းထည်စွာ ရွာသွန်းပြီး ရေကြီးရေလျှံမှု၊ တောင်ပြိုမှုများ ဖြစ်ပေါ်ခဲ့ပြီး တစ်နိုင်ငံလုံးနီးပါး သဘာဝဘေးဒဏ်ကို ခံစားခဲ့ရသည်။

ထိုသဘာဝဘေးကြောင့် ဟိုပုံးမြို့တောင်ဘက် ဒေသများတွင် ဘိန်းစိုက်ခင်း အပါအဝင် အခြား ကုန်စိမ်း သီးနှံစိုက်ခင်းများလည်း ပျက်စီးဆုံးရှုံးသွားခဲ့ပြီး အရင်းမကျန်ကြောင်း ဟိုပုံးဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

“ဘိန်းစိုက်တာက တောင်ပေါ်ဒေသတွေမှာ စိုက်ပျိုးတာများတယ်။ အနီးအနားဆို ရဲတွေက လာဖျက်သွားတယ်။ အဲဒါကြောင့် အဝေးမှာ စိုက်ရတာ။ ခုက စိုက်ခင်းတွေ မြေပြိုတော့ ကျောက်တုံးတွေ မြေကြီးတွေ သစ်တုံးတွေနဲ့ အကုန်ပိကုန်ပြီ။ ရင်းထားသမျှလည်း ဘာမှ မကျန်တော့ဘူး” ဟုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဟိုပုံးမြို့နယ်တွင် ဘိန်းအစားထိုးသီးနှံ အနေဖြင့် ကော်ဖီနှင့် ကုန်စိမ်းသီးနှံများကို စိုက်ပျိုးသော်လည်း မြေပြိုသည့်အတွက်ကြောင့် စိုက်ပျိုးမြေ အများအပြား ပျက်စီးကုန်ပြီး ပြန်လည် အသုံးပြု၍ မရတော့ကြောင်း ၎င်းဒေသခံ အမျိုးသားက ပြောသည်။

ဘိန်းသီးနှံကို တစ်နှစ်လျှင် (၂) ပိဿာမှ (၆) ပိဿာအထိ စိုက်ပျိုးကြပြီး အဓိကအားဖြင့် ပွဲစားလာဝယ်မှသာ ရောင်းချနိုင်ပြီး အများအားဖြင့် သျှမ်းပြည်မြောက်ပိုင်းသို့ တင်ပို့ကြောင်း အဆိုပါ အမျိုးသားက ဆိုသည်။

ပအိုဝ်းပြည်သူ့စစ် PNO ထိန်းချုပ်သည့် ဟိုပုံးနှင့် ပင်လောင်းမြို့နယ်အတွင်း ကိုဗစ်ကာလ နောက်ပိုင်း ဒေသအတွင်း ဘိန်းစိုက်ပျိုးမှု ပိုတိုးလာကြောင်း ဒေသခံများထံမှ သိရသည်။

ယခုနှစ်တွင် ဒေသခံများမှာ စားဝတ်နေရေး အကျပ်အတည်းနှင့် ပိုမိုရင်ဆိုင်နေရပြီး ပအိုဝ်း ပြည်သူ့စစ် (PNO)မှ လစဉ်အခွန်ကောက်ခံမှုကိုလည်း ထည့်သွင်းနေရတာကြောင့် ပို၍ ခက်ခဲကြပ်တည်းနေကြောင်း သိရသည်။

“PNO ကလည်း တစ်လကို ၅ သောင်းကျပ် ပုံမှန်ကောက်တယ်။ ကျနော်တို့အိမ်ဆို မြေပြိုတဲ့အထဲ မပါရုံလေးပဲ။ ခြံလည်း မကျန်တော့ဘူး။ ဘာစိုက်ပျိုးစရာမြေမှ မရှိတော့ဘူး အကုန်ပျက်။ ရွာမှာက လူငယ်တွေ မရှိကြတော့ဘူး၊ အကုန်နိုင်ငံခြားထွက်ကုန်တာ။ လူကြီးတွေပဲ ကျန်တာဆိုတော့ ပြန်လည် ထူထောင်ရေးလုပ်ဖို့ ခက်တာပေါ့” ဟု အသက် ၄၀ ကျော်အရွယ် ဒေသခံ အမျိုးသားတစ်ဦးက ပြောသည်။

ထိုသို့ မြေပြိုထားတာကြောင့် လမ်းများပျက်စီးနေပြီး ပြန်လည်ထူထောင်ရေး လုပ်ဆောင်ရန် လူအင်အားနှင့် ငွေအင်အားများ လိုအပ်နေသေးကြောင်း အဆိုပါ အမျိုးသားက ဆိုသည်။

ယခုလက်ရှိ ဟိုပုံးမြို့နယ်တွင် ပအိုဝ်းပြည်သူ့စစ် PNO နှင့် စစ်ကောင်စီတပ်တို့ ဝင်ရောက် နေရာယူထားပြီး စစ်မှုထမ်း ရန်အတွက် တပ်သားသစ်များ စုဆောင်းလျှက်ရှိနေသည်ဟု သိရသည်။

လက်နက်ကိုင်တပ်ဖွဲ့ ပေါများသည့် သျှမ်းပြည်အတွင်း ဘိန်းစိုက်ပျိုးမှု အများဆုံး ဒေသများမှာ ဟိုပုံး၊ ပင်လောင်း၊ ဖယ်ခုံ၊ ပင်လုံ၊ တန့်ယန်း၊ နမ္မတူနှင့် သျှမ်းပြည်အရှေ့ပိုင်းတို့တွင် ပိုများလာနိုင်ကြောင်း ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာရုံး (UNODC) က ဖော်ပြထားသည်။

အလုပ်သင် သတင်းထောက် နန်းလရောင် ရေးသားသည်။