နာမည်ဆိုးဖြင့် ကျော်ကြားသည့် စစ်တက္ကသိုလ်များ တည်ရှိရာ ပြင်ဦးလွင်မြို့အနီး စစ်ကောင်စီ စစ်ကြောင်းများ ဖြန့်ခွဲ၍ စစ်ကြောင်းထိုးနေသဖြင့် တိုက်ပွဲများ ပြင်းထန်နေစဥ်ပြည်သူများ မြို့ကို စွန့်ခွာ ထွက်ပြေးပါက ကျန်ရှိ နေအိမ်များ ဖောက်ထွင်းလုယက် ခံရမည်ဟု စစ်ကောင်စီက ဝါဒဖြန့်နေကြောင်း မြို့ခံများက ယနေ့ (အောက်တိုဘာလ ၂၄ ရက်) တွင် ပြောသည်။
ပြီးခဲ့သည့် အောက်တိုဘာလ ၁၉ ရက်နေ့မှ စတင်ကာပြင်ဦးလွင်အနီး ဂန့်ဂေါ်ရွာ တိုက်ပွဲများ စတင်ခဲ့ရာ ယနေ့ (အောက်တိုဘာလ ၂၄ ရက်) နံနက်ပိုင်း အထိ တိုက်ပွဲများ ပြင်းထန်နေပြီး ပြင်ဦးလွင် အနီးမှ စစ်ကောင်စီ လက်နက်ကြီး ပစ်ကူပေးနေကြောင်း စစ်ရေးသတင်းရင်းမြစ်က ဆိုသည်။
“ဝက်ဝံနဲ့ ဘန့်ဘွေးဘက်က လက်နက်ကြီး ပစ်ကူ ပေးနေတယ်။ ပြင်ဦးလွင်အထိ တိုက်ပွဲဖြစ်နိုင်သလား ဆိုတော့ စစ်ကောင်စီပေါ် မူတည်တာပေါ့။ ပြည်သူတွေ အနေနဲ့ကတော့ စစ်ရေးသတိရှိကြပါလို့ပဲ ပြောလို့ရမယ်” ဟု စစ်ရေးသတင်းရင်းမြစ်က ပြောဆိုသည်။
လက်ရှိ ပြင်ဦးလွင်မြို့တွင် နေထိုင်သည့် စစ်ဗိုလ်ချုပ်ဟောင်း အများစု နေပြည်တော်သို့ ပြောင်းရွှေ့သွားပြီဟု သတင်းကြားရကြောင်း ပြည်သူများ မြို့ကို စွန့်ခွာပါက ကျန်ရှိသည့် နေအိမ်နှင့် ဟော်တယ်များ၊ ဆိုင်များ ဖောက်ထွင်းလုယက် ခံရနိုင်သဖြင့် မြို့ကို စွန့်ခွာမှု မပြုသင့်ကြောင်း စစ်ကောင်စီက ဝါဒဖြန့်နေသည်ဟု မြို့ခံ တစ်ဦးက ဆိုသည်။
“တရားဝင် ပြောတာတော့ မဟုတ်ဘူးပေါ့။ မြို့ထဲမှာနေတဲ့ တပ်မိသားစုတွေကနေ သတင်းဖြန့်နေတာပေါ့။ အခုအခြေအနေက ဘန့်ဘွေးဘက်နဲ့ တောင်ခမ်းဘက် အခြေအနေ မကောင်းရင် တိုက်ပွဲက မြို့နားရောက်လာမှာပဲလေ။ ထွက်ပြေးရင်လည်း သူတို့ (စစ်ကောင်စီတပ်) လုယက်ကြမှာ” ဟု ၎င်းကရှင်းပြသည်။
ယနေ့ နောင်ချိုမြို့နယ်၊ ဘန့်ဘွေးကျေးရွာအုပ်စု၊ ဂန့်ဂေါကျေးရွာအနီး တိုက်ပွဲပြင်းထန်နေပြီး အုမ္မသီး လမ်းခွဲအထိ တိုက်ပွဲ ဖြစ်ပွားနေသည်ဟု ကြားသိရကြောင်း ၎င်းကဆက်ပြောသည်။
ပြီးခဲ့သည့် သြဂုတ်လ ပထမ အပတ်က တိုက်ပွဲများနီးကပ်လာသဖြင့် ပြင်ဦးလွင်မြို့ခံ အများအပြား မြို့ကို စွန့်ခွာထွက်ပြေးခဲ့သည့် ဖြစ်စဥ်ကြောင့် ယခု မြို့စွန့်ခွာခြင်း မပြုရန် စစ်ကောင်စီက ခြိမ်းခြောက် ဝါဒဖြန့်နေခြင်း ဖြစ်သည်ဟု မြို့ခံများက သုံးသပ်သည်။
ယနေ့ ပြင်ဦးလွင်မြို့ပေါ်တွင် တည်ငြိမ်နေဆဲဖြစ်ပြီး ပုံမှန် လှုပ်ရှားသွားလာနေကြောင်း၊ သီတင်းကျွတ်ပိတ်ရက်ကာလ ပြီးဆံုးသဖြင့် ခရီးသွားဧည့်သည် အများစု ပြန်သွားပြီ ဖြစ်သော်လည်း ဧည့်သည်တချို့ ရှိနေသေးကြောင်း သိရသည်။
ပြီးခဲ့သည့် အောက်တိုဘာ ၁၉ ရက်က စတင်ခဲ့သည့် တိုက်ပွဲများကြောင့် မန္တလေးမြို့မှ နောင်ချို၊ ကျောက်မဲ၊ သီပေါ၊ လားရှိုးမြို့များသို့ သွားရောက်မည့် အတက်ကားများကို စစ်ကောင်စီက ပြန်လှည့်ခိုင်းပြီး ပြင်ဦးလွင် – လားရှိုးလမ်းပိုင်းကို ယနေ့ အထိ ပိတ်ထားသည်။
လက်တလော နောင်ချိုမြို့နယ်တွင် ဖုန်းနှင့် အင်တာနက်လိုင်းများ ဖြတ်တောက်ခံထားရပြီး နေစဥ် လူနေရပ်ကွက်နှင့် ကျေးရွာများ လေကြောင်းမှ ဗုံးကြဲ တိုက်ခိုက်ခံနေရသဖြင့် အရပ်သား သေဆုံးမှုများ ရှိနေကြောင်း TNLA က ထုတ်ပြန်ထားသည်။
Leave a Comments