သျှမ်းပြည် လားရှိုးမြို့အဝင်ရှိ “ရိုးရာ”ဆန်အရက်ချက်စက်ရုံကို စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ မီးလောင်ပျက်စီးသွားကြောင်း စုံစမ်းသိရသည်။

ယနေ့ (အောက်တိုဘာလ ၂၃ ရက်) နံနက် ၈ နာရီခွဲကျော်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့ပေါ်သို့ စစ်ကောင်စီတပ်မှ လေကြောင်းဖြင့် ထပ်မံဗုံးကြဲ တိုက်ခိုက်ခဲ့ရာ မြို့ဝင်ဆိုင်းဘုတ်အနီး နမ့်ခိုက်ကျေးရွာရှိ “ရိုးရာ” ဆန်အရက်ချက်စက်ရုံပေါ် ကျရောက်ပေါက်ကွဲခဲ့ပြီး မီးလောင်ပျက်စီးခဲ့ကြောင်း ဒေသခံများက ပြောသည်။

“မြို့အဝင် နမ့်ခိုက်က ရိုးရာ ဆန်အရက်စက်ရုံမှာ ဗုံးကြဲခံရတာ။ ခုနကတုန်းက လေယာဉ်နဲ့ လာကြဲတုန်းကဆို အသံအကျယ်ကြီး ကြားရတယ်။ မြို့ပေါ် လေယာဉ်နဲ့ ဗုံးကြဲခံရလို့ ပြန်ထွက်ပြေးတဲ့လူ နေ့တိုင်းရှိနေတယ်”ဟု လားရှိုးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ယနေ့နံနက် (၁၀) နာရီကျော်အထိ လားရှိုးမြို့ပေါ်တွင် တိုက်လေယာဉ်များ ဆက်လက်ပျံဝဲလျက်ရှိပြီး ကိုးကန့်တပ် MNDAA မှ ပြန်လည်ပစ်ခတ်နေသည့် လက်နက်သံများလည်း ကြားနေရကြောင်း လားရှိုးဒေသခံများ၏ လူမှုကွန်ယက်စာမျက်နှာများတွင် ရေးသားထားသည်။

ယခု လေကြောင်းဗုံးကြဲမှုကြောင့် “ရိုးရာ” ဆန်အရက်ချက်စက်ရုံမှ အဆောက်အအုံများ မီးလောင်ကျွမ်းခဲ့ပြီး ထိခိုက်ဒဏ်ရာရသူ မရှိကြောင်း လားရှိုးမြို့ ပြန်လည်ထူထောင်ရေး ဖေ့စ်ဘုတ်စာမျက်နှာတွင် သတင်းထုတ်ပြန်ထားသည်။

ဩဂုတ်လဆန်းပိုင်းတွင် လားရှိုးမြို့အခြေစိုက် အရှေ့မြောက်ပိုင်း တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA ထိန်းချုပ်နိုင်ပြီးနောက် သုံးလအတွင်း စစ်ကောင်စီတပ်၏ လေကြောင်းတိုက်ခိုက်မှု အကြိမ်ရေမှာ (၂၀) ကျော်အထိ ရှိလာပြီဖြစ်ကြောင်း ထုတ်ပြန်ချက်အရ သိရသည်။

အလားတူ ယနေ့နံနက်ပိုင်းတွင် လားရှိုးမြို့ပေါ် လေကြောင်းဗုံးကြဲ တိုက်ခိုက်ခံရသည့်နည်းတူ တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ္မတူမြို့နယ်အတွင်းရှိ မိုင်းလီကျေးရွာလည်း လေကြောင်းဖြင့် ထပ်မံတိုက်ခိုက်ခံရကြောင်း ကနဦး သိရှိရပြီး ထိခိုက်ပျက်စီးမှု အခြေအနေကို သျှမ်းသံတော်ဆင့်မှ ဆက်လက်စုံစမ်းနေသည်။