သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် ရေကြီးရေလျှံမှု ဖြစ်ပွားပြီးနောက်ပိုင်း သီးနှံမျိုးစေ့ ဈေးတက်ခြင်းကြောင့် စိုက်ပျိုးရေး ပြန်လည်လုပ်ကိုင်သူ နည်းပါးလာကြောင်း စုံစမ်းသိရသည်။
စက်တင်ဘာလမှ စတင်ပြီး အင်းလေးဒေသ ရေကြီးမှုသည် အောက်တိုဘာလ စတုတ္ထပတ်အထိ ရေမကျသေးသောကြောင့် စိုက်ပျိုးမြေများ အပါအဝင် ကုန်းမြေများ၊ ကျွန်းမြေများကို ရေဖုံးလွှမ်းပြီး နစ်မြှုပ်ပျောက်ကွယ်နေသည်။
ထို့အပြင် ရေအနည်းငယ် ပြန်ကျသည့် နေရာအချို့တွင် စိုက်ပျိုးရေး ပြန်လည်လုပ်ကိုင်ရန် ပြင်ဆင်နေသော်လည်း သီးနှံမျိုးစေ့ထုတ်များ ဈေးတက်လာခြင်းကြောင့် အနည်းငယ်သာ ဝယ်ယူစိုက်ပျိုးနိုင်တော့ကြောင်း သိရသည်။
“ကုန်းမြေတွေလည်း ရေက မကျသေးဘူး။ ကျွန်းမျောလည်း နည်းနည်းပဲ ကျန်တော့ စိုက်ပျိုးတဲ့သူလည်း နည်းလာတယ်။ မျိုးစေ့လည်း ဈေးတက်တော့ အရင်ကလောက် မစိုက်နိုင်တော့ဘူး။ ဒီဝမ်းရေးအတွက်ပဲ နေ့စဉ်တွေးပူပြီး ဖြေရှင်းနေရတယ်။ စိုက်ပျိုးရေး မလုပ်တဲ့သူက အဝေးမှာ ကျပန်းလုပ်ငန်းကြတယ်၊ ဒီလိုနဲ့ပဲ ဖြေရှင်းတယ်”ဟု အင်းလေးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယခင်က ငရုပ်မျိုးစေ့တစ်ထုတ်ကို ၅၀၀ လောက်သာ ပေးစိုက်ရသော်လည်း ယခုအခါတွင် ငရုပ်မျိုးစေ့ တစ်ထုတ်ကို ကျပ် ၁၂၀၀ အထိ ဈေးကြီးပေး ဝယ်ယူနေရပြီး ငွေကြေးအခက်အခဲကြောင့် ယခင်လို အပြည့်အဝ မစိုက်ပျိုးနိုင်တော့ကြောင်း အဆိုပါ အမျိုးသမီးက ပြောသည်။
အင်းလေး ဒေသတွင် ခရမ်းချဉ်၊ ငရုပ်နှင့် စပါး တို့ကို အဓိက စိုက်ပျိုးလုပ်ကိုင်ပြီး မကြာမီ ဆောင်းရာသီ ရောက်လာတော့မည် ဖြစ်သောကြောင့် စိုက်ပျိုးရေးလုပ်ငန်း စတင်ရန် ဒေသခံများ ပြင်ဆင်နေကြသည်ဟု ၎င်းအမျိုးသမီးက ပြောသည်။
ရေမကျသေးသည့်အတွက် ကျွန်းမျောများပေါ်တွင် စိုက်ပျိုးရေးကို အိမ်ခြေ သုံးပုံတွင် တစ်ပုံမျှသာ ပြန်လည် လုပ်ကိုင်နိုင်ပြီး အင်းလေးဒေသခံအများစုမှာ နေ့စားလုပ်ကာ ကူလီထမ်းသည့် အလုပ်များ လုပ်ကိုင်ပြီး စားဝတ်နေရေးကို ဖြေရှင်းနေကြရသည်။
ထို့အပြင် အင်းလေးဒေသတွင် ပအိုဝ်းပြည်သူ့စစ်(PNO) နှင့် စစ်ကောင်စီတပ်များက လုံခြုံရေး တင်းကြပ်ထားခြင်းကြောင့် သွားလာရန်ခက်ခဲပြီး ရေဘေးအလှူအတွက် လူဦးရေများကို အတိအကျ သိရှိသွားခြင်းကြောင့် ဒေသခံများ စိုးရိမ်ထိန့်လန့်နေကြကြောင်း သိရသည်။
“စစ်တပ်ရော PNO ရောက အင်းလေးတကြောမှာ နေရာယူထားတာ။ သွားရလာရတာ အရင်လို အဆင်မပြေတော့ဘူး၊ အကုန်ကြောက်နေရတာ။ ရေဘေးအတွက် အလှူပစ္စည်း သွားယူရင် လူဦးရေ စာရင်းပေးခဲ့ရတော့ သူတို့က လူဦးရေ အတိအကျ သိကုန်ပြီ။ စစ်မှုထမ်း ခေါ်ဖို့အတွက် ပိုလွယ်သွားတာပေါ့။ ဘယ်ချိန် ငါ အခေါ်ခံရမလဲ တွေးပြီး ကြောက်နေရတာ” ဟု အင်းလေး ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အင်းလေး ဒေသခံများသည် နိုင်ငံရေးကို စိတ်ဝင်စားခြင်းထက် စားဝတ်နေရေးအတွက် ဝမ်းရေးကိုသာ ရုန်းကန်ဖြေရှင်း လာနေရသည်ဟု အဆိုပါ အမျိုးသားက ထပ်လောင်းပြောသည်။
ပြီးခဲ့သည့် စက်တင်ဘာလ ၁၁ ရက်မှ စပြီး အင်းလေးဒေသဘက်တွင် စံချိန်တင် ရေမြင့်တက်ခဲ့ပြီး သောက်သုံးရေ မသန့်ရှင်းမှုကြောင့် အရေပြားယားယံခြင်းများ ဖြစ်ပွားနေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments