သျှမ်းပြည်တောင်ပိုင်း မှ ပြောင်းစိုက်တောင်သူများ ပေါင်းသတ်ဆေး မှားယွင်းသုံးစွဲမှုကြောင့် ပြောင်းဧက ထောင်ချီ ပျက်စီးသွားကြောင်း သတင်းရရှိသည်။
တောင်ကြီးမြို့နယ်နှင့် ပင်လောင်းမြို့နယ်မှ ပြောင်းစိုက်တောင်သူများသည် “ဟုန်းဟုန်းတောက်” တံဆိပ် ပြောင်းပေါင်းသတ်ဆေးကို သုံးပြီးနောက် ပြောင်းပင်များ ခြောက်လာပြီး သေဆုံးကုန်ကြောင်း ပြောင်းစိုက်ပျိုးသည့် တောင်သူများက ပြောသည်။
ထိုသို့ ပြောင်းပေါင်းသတ်ဆေး သုံးစွဲမှုကြောင့် တရွာလုံးအနေထားဖြင့် ပြောင်းဧက ထောင်ချီပျက်စီး သွားခဲ့ပြီးနောက် ပြောင်းစိုက်တောင်သူများ အရှုံးပေါ်နေကြကြောင်း ပင်လောင်း ဒေသခံ အမျိုးသားတစ်ဦးက ပြောသည်။
“အဲဒီပေါင်းသတ်ဆေး တံဆိပ်ကို ဒီနှစ်မှ သုံးဖူးတာ၊ သူများတွေက ကောင်းတယ် ဘာညာ ညွှန်းလို့ သုံးလိုက်တာ အခုဆို တစ်ရွာလုံး ပြောင်းခင်းတွေ သေကုန်ပြီ၊ ပေါင်းသတ်ဆေးဆိုပြီး သုံးလိုက်တာ ပြောင်းသတ်ဆေး ဖြစ်နေတာ၊ ပြောင်းပင်တွေက ပုတ်ပြီး သေကုန်တာ။”ဟု စိုက်ပျိုးတောင်သူ အမျိုးသားတစ်ဦးက ပြောသည်။
ထို့အပြင် ပြောင်းပင်များ သေဆုံးမှုနှင့် ပတ်သက်၍ ဆေးကုမ္ပဏီဘက်မှ တာဝန်ယူ ဆောင်ရွက် ပေးစေလိုကြောင်းနှင့် စိုက်ပျိုးတောင်သူများ စုပေါင်း၍ ကုမ္ပဏီကို တာဝန်ယူ ဖြေရှင်းပေးရန် တောင်းဆိုသွားမည် ဖြစ်ကြောင်း အဆိုပါ အမျိုးသားက ပြောသည်။
အလားတူ တောင်ကြီးမြို့နယ် ၊အောင်ပန်း၊ ပင်းတယ နှင့် ဆီဆိုင်မြို့နယ် ဘက်တွင်လည်း “ဟုန်းဟုန်းတောက်” ပြောင်းပေါင်းသတ်ဆေး အသုံးပြုလိုက်သောကြောင့် ပြောင်းပင်များ သေဆုံးကုန်ပြီး ဆုံးရှုံးမှုများစွာ ရှိနေကြောင်း ဒေသခံများက ပြောသည်။
ပြောင်းစိုက်ပျိုးရေးလုပ်ငန်းသည် အရင်းနှီးများစွာ ကုန်ကျကြောင်းနှင့် ပြောင်းမျိုးစေ့ တစ်အိတ်လျှင် ကျပ် (၄)သိန်းအထိ ရှိပြီး မြေဩဇာဈေးနူန်းမှာလည်း ကျပ် နှစ်သိန်းနီးပါး ရှိပြီး ပြောင်းတစ်ဧကလျှင် ငွေကျပ် သိန်း (၂၀)ကျော် ကုန်ကျမှုရှိကြောင်း အောင်ပန်းမြို့နယ်မှ စိုက်ပျိုးတောင်သူတစ်ဦးက ပြောသည်။
“အရင်းတောင်ပြန်မရဘူး ဒီနှစ်တော့ အကုန်ရှုံးတယ်၊ “ဟုန်းဟုန်းတောက်” ကောင်းမှုကြောင့် ပြောင်းပင် ပုတ်ပြီး အကုန်သေကုန်တယ်၊ ပြောင်းတစ်ဧက စိုက်မယ်ဆိုရင် အနည်းဆုံး သိန်း (၂၀) ရှိတာ တစ်ခါစိုက်ရင် ငါးဧက စိုက်ကြတဲ့ တောင်သူတွေချည်းပဲ အကုန်ရှုံး ရစရာမရှိတော့ဘူး၊ ဆေးကုမ္ပဏီက တခုခုတော့ တာဝန်ယူပေးစေချင်တယ်။”ဟု အဆိုပါ တောင်သူ အမျိုးသားတစ်ဦးက ပြောသည်။
စိုက်ပျိုးရေးလုပ်ကိုင်သူ အများစုသည် မိမိစိုက်ခင်းအတွက် သုံးစွဲသည့် ဆေးနှင့် မြေဩဇာများကို စနစ်တကျ လေ့လာပြီးမှ ဝယ်ယူသင့်ကြောင်းနှင့် ဈေးနူန်းသက်သာမှုနှင့် ကြော်ငြာအားကောင်းမှုကို ကြည့်၍ မဝယ်ယူသင့်ကြောင်း ၎င်းအမျိုးသားက ဆက်ပြောသည်။
စိုက်ပျိုးသီးနှံများအတွက် ပေါင်းသတ်ဆေးများကို အလွယ်တကူ မသုံးစေချင်ကြောင်း၊ သုံးစွဲသည့်အချိန်တွင်လည်း သေချာလေ့လာပြီးသုံးစွဲရန်နှင့် ဆေးညွှန်ကြားချက်ကို သေချာသိရှိပြီး သုံးစွဲရန် လိုအပ်ကြောင်းလည်း စိုက်ပျိုးရေးလုပ်ဆောင်သည့် ကိုကျော်က ဆိုသည်။
“ ပေါင်းသတ်ဆေးတွေက မြေဆီကိုပျက်စီးတယ်။ ဖြစ်နိုင်ရင်မသုံးစေချင်ဘူး။ ပေါက်ပြားနဲ့ရှင်းတာပိုကောင်းတယ်။ နောက်ပြီး တကယ်လို့သုံးမယ်ဆိုရင်လည်း သေချာလေ့လာသုံးစေချင်ပါတယ်” ဟု ကိုကျော်က ပြောသည်။
ယခုလက်ရှိ သျှမ်းတောင်တွင် မိုးရာသီဖြစ်သဖြင့် သီးနှံများ စိုက်ပျိုးရာသီဖြစ်၍ တောင်သူများ အလုပ်များချိန်ဖြစ်ရာ စိုက်ပျိုးရေးနှင့် ပတ်သက်သည့် ပစ္စည်းများ အခွင့်ကောင်းယူ၍ ရောင်းချနေကြသော ကာလဖြစ်၍ သတိထားပြီးမှ ဝယ်ယူစေလိုကြောင်း တောင်သူများက ပြောကြားလိုက်သည်။
ပြောင်းပေါင်းသတ်ဆေးများကို အသုံးပြုရာတွင် တဧကလျှင် ဆေးနှုန်းထား (၄၀၀-၆၀၀ စီစီ) နှင့်ဆေးဖျန်းပုံး ၂၀လီတာ တပုံးလျှင် (၈၀- ၁၂၀ စီစီ)အထိနှင့် ဆေးဖျန်းချိန်တွင် မြေဆီလွှာ အစိုးဓာတ် လုံလောက်စွာ ရှိနေရန် လိုအပ်သည်။
ပေါင်းသတ်ဆေးဖျန်းရာတွင် သတိပြုရန် အော်ဂါနိုဖော့စဖိတ်( Organophoshate) အုပ်စုဝင် ပိုးသတ်ဆေးများနှင့် ရောမဖျန်းရန်နှင့် အနည်းဆုံး ၇ ရက်ခြားပေးပေးရန်၊ ဆေးဖျန်းရာတွင် အကာအကွယ်ပစ္စည်းများ စနစ်တကျ ဝတ်ဆင်ရန်လိုအပ်သည်။
ပြောင်းပင်ကြီး များကို ဆေးဖျန်းလျှင် ဆေးထိရောက်မှု လျော့နည်းနိုင်ကြောင်းနှင့် ပြောင်းပင်ဆေးလောင် တတ်ကြောင်းလည်း ပေါင်းသတ်ဆေးအကြောင်း သိရှိနားလည်သူများကပြောဆိုထားသည်။
Leave a Comments