သျှမ်းပြည်တောင်ပိုင်း ခိုလမ်မြို့နယ် ကာလေကျေးရွာတွင် မိုးသည်းထန်ရွာသွန်းမှုကြောင် ပြောင်းခြံ ဧက ၇၀၀ ကျော်နီးပါး ရေမြှုပ်ပျက်ဆီးခဲ့ကြောင်း စုံစမ်းသိရသည်။
စက်တင်ဘာလ ဒုတိယအပတ်တွင် မိုးသည်းထန် ရွာသွန်းမှုကြောင့် ပြောင်းခြံ ဧက ၇၀၀ ကျော်နီးပါး ရေမြှုပ် ပျက်စီးခဲ့ပြီး၊ ပြန်လည်စိုက်ပျိုးရန်အတွက် ပြည်သူများ အခက်ကြုံတွေ့နေရကြောင်း ကျေးရွာဒေသခံ အသက် ၂၈ အရွယ် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
မိုးသည်းထန်စွာရွာသွန်းမှုကြောင့် ပြောင်းခြံများရစရာမရှိကြောင်းပျက်စီးသွားကြောင်း၊ ယခုနှစ်သည် အစစအရာရာ ကုန်စျေးနှုန်းမြင့်တက်နေသည့် ကြား မြေသြဇာများကို စျေးကြီးပေးပြီးစိုက်ပျိုးရသည့်အတွက် ဆုံးရှုံးမှုကြီးမားကြောင်း ၎င်းကပြောသည်။
“ ခြံထဲရေကြီးတာ ရင်ဘက်ထိတောင်ရောက်တယ်။ အပင်တွေအကုန်လှဲတာ ရစရာကိုမရှိတော့တာ။ အရင်နှစ်က ဈေးမကောင်းလို့ ရှုံးတယ်။ ဒီနှစ်ကတော့ မိုးကြောင့် ဘာမှပြန်မရနိုင်တော့ဘူး။ အပင်ကောင်းဖို့ ပြုစုတာတကယ်မလွယ်ဘူး မြေဩဇာတွေ ပိုးသတ်ဆေးတွေဖြန်းပေးရတယ် ခုတော့ သွားပြီ “ ဟု ၎င်းကပြောသည်။
ထို့အပြင် ပင်လောင်းမြို့နယ် ထီယွန်းကျေးရွာတွင်လည်း မြေပြိုမှုကြောင့် လက်ဖက်ခြံ ဧက ၁၀ နီးပါး ပျက်စီးဆုံးရှုံးသွားခဲ့ပြီး ၎င်းကျေးရွာတွင် သွားသည့်လမ်းမကြီးများသည် ရေတိုက်စားခြင်းကြောင့် သွားလာရန်ခက်ခဲနေကြောင်း ကျေးရွာဒေသခံက ပြောသည်။
“ ဒီဒုတိယအပတ်ထဲမှာပဲ မြေပြိုတာ လက်ဖက်ခြံတော်တော်များများပါတယ်။ တခြံလုံး ပျက်သွားတဲ့ခြံတွေလည်းရှိတယ်။ တရက်နည်းနည်းချင်းမြေပြိုပြီး လမ်းမပေါ်ထိရောက်တယ်” ဟု ၎င်းကပြောသည်။
စက်တင်ဘာလ ၁၀ ရက်မှစ၍ မိုးအဆက်မပြတ်ရွာသွန်းမှုကြောင့် တောင်ကြီးခရိုင်အတွင်းရှိ မြို့နယ်နှင့် ကျေးရွာအပါအဝင် လွိုင်လင်မြို့နယ်နှင့် မောက်မယ်မြို့နယ်တွင် ရေကြီးခြင်း၊ တောင်ပြိုခြင်းနှင့် မြေပြိုခြင်းများ ရုတ်တရက် ဖြစ်ပေါ်ခဲ့သောကြောင့် လူ ၁၄၀ ဦး သေဆုံးခဲ့သည်ဟု ပအိုဝ်းလူငယ်အစည်းအရုံး PYO က ထုတ်ပြန်ထားသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments