သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး”အတွင်း နယ်မြေစိုးမိုးမှု ပိုမိုရရှိလာသည့် တအာင်း(ပလောင်) အမျိုးသားလွတ်မြောက်ရေး တပ်မတော် TNLA ၊ ကိုးကန့်တပ်ဖွဲ့ MNDAA နှင့် ကချင်လွတ်လပ်ရေးတပ် KIA တို့အကြား မြောက်ပိုင်းမဟာမိတ် တပ်ဖွဲ့များအချင်းချင်း နယ်မြေအငြင်းပွားမှု ပိုမိုများပြားလာခဲ့ကြောင်း စုံစမ်းသိရသည်။

ယခု အောက်တိုဘာလအတွင်း မူဆယ်၊ ကွတ်ခိုင်နှင့် သိန္နီမြို့နယ်အတွင်း ကချင်လွတ်လပ်ရေးတပ် KIA နှင့် ကိုးကန့်တပ်ဖွဲ့ MNDAA အောက်ခြေတပ်သားများအကြား စစ်ဆေးရေးဂိတ် ဖြတ်သန်းစဉ် (၃) ကြိမ်ထက်မနည်း အငြင်းပွားမှု ဖြစ်ပွားခဲ့ကြောင်း ဒေသခံများသည်။

“မုံးပေါ်ဘက် KIA စစ်ဆေးရေး ဂိတ်မှာ ပေးမဖြတ်တော့ ကိုးကန့်တပ်က မုံးပေါ်နဲ့ နမ့်တောင်းဘက်မှာရှိတဲ့ ဂိတ်မှာ ကားတားတဲ့ ရောင်ပြန်နဲ့ သုံးထောင့်ခုံ အကုန်လုံးကို လာသိမ်းတာမျိုး လုပ်တာပေါ့။ သိမ်းတယ်လို့ ပြောပေမယ့် တစ်ရက်ပဲလားမသိဘူး၊ အထက်က စကားပြောကြပြီးတော့ ကိုးကန့်တပ် ယူသွားတဲ့ အကာတွေ ပြန်လာချပေးတာ”ဟု ဖြစ်စဉ်သိရှိသူ ပန်ဆိုင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မူဆယ်မြို့နယ်အတွင်း မိုင်းယု (၁၀၅) မိုင်နှင့် ပန်ဆိုင်းမြို့အကြား မုံးပေါ်တိုက်နယ်ရှိ နမ့်တောင်းကျေးရွာတွင် ကချင်လွတ်လပ်ရေးတပ် KIA နှင့် ကိုးကန့်တပ်ဖွဲ့ MNDAA တို့အကြား စစ်ဆေးရေးဂိတ်၌ အောက်တိုဘာလ (၄) ရက်က အငြင်းပွားမှု ဖြစ်ခဲ့ကြောင်း ဒေသခံများထံမှ သိရသည်။

ယခုဖြစ်စဉ်နှင့် ပတ်သက်၍ ကချင်လွတ်လပ်ရေးတပ် KIA ပြောရေးဆိုခွင့်ရှိသူ ဗိုလ်မှူးကြီး နော်ဘူထံ စုံစမ်းမေးမြန်းရန် သျှမ်းသံတော်ဆင့်မှ ဖုန်းဖြင့်ဆက်သွယ်ခဲ့သော်လည်း ဖုန်းစက်ပိတ်ထားသည်။

၎င်းဖြစ်စဉ်တွင် နှစ်ဘက်ခေါင်းဆောင်များ ပြန်လည်ညှိနှိုင်းပြီးနောက် ကိုးကန့်တပ်ဖွဲ့ MNDAA က ကချင်လွတ်လပ်ရေးတပ် KIA ဂိတ်ထံ သိမ်းယူသွားသည့် ယာဉ်အတားအဆီး သံဘောင်များကို ပြန်လည်ပေးအပ်ခဲ့ကြောင်း ဒေသခံများက ပြောဆိုသည်။

“ဒီဘက်မှာ လွန်ခဲ့တဲ့ ၁၅ နှစ်က မုံဆာလ ခေါင်းဆောင်တဲ့ လူမျိုးပေါင်းစုံ ပြည်သူ့စစ် ရှိတယ်။ အဲ့နောက် ဖုန်ကြားရှင်ခေတ်ကျတော့ ကိုးကန့်တပ်က ခဏ လာကိုင်တာပေါ့။ ၂၀၁၁ နောက်ပိုင်းကျတော့ KIA က ထပ်ဝင်လာတာ။ အခု MNDAA နေရာရလာတော့ ပြန်ဝင်လာတာ။ အဆက်ဆက်ကတော့ ဘယ်သူ့နယ်မြေပါလို့ သတ်သတ်မှတ်မှတ် ပြောဖို့ခက်တယ်”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

ကိုးကန့်တပ်ဖွဲ့ MNDAA နှင့် ကချင်လွတ်လပ်ရေးတပ် KIA တို့ နယ်မြေအငြင်းပွားမှု ဖြစ်ပေါ်နေသည့် မုံးပေါ်တိုက်နယ်တွင် သျှမ်း၊ ကချင်နှင့် တရုတ်လူမျိုးများ အတူတကွ နေထိုင်ကြပြီး သျှမ်းတပ် SSPP/SSA လည်း လှုပ်ရှားနေကြောင်း ဒေသခံများထံမှ သိရသည်။

ထို့အပြင် အောက်တိုဘာလ (၁၁) ရက် သိန္နီမြို့နယ် နမ့်စလပ်ကျေးရွာအနီးရှိ KIA တပ်ဖွဲ့ဝင်များကိုလည်း MNDAA တပ်သားများမှ သွားရောက်နှင်ထုတ်ခဲ့ပြီး အောက်တိုဘာလ (၁၄)ရက်တွင် ကွတ်ခိုင်မြို့နယ် မုံးစီးကျေးရွာအုပ်စု မန်ထမ်ရွာရှိ KIA ရုံးနှင့် တပ်စခန်းကို MNDAA မှ နေရာပြောင်းရွှေ့ခိုင်းခဲ့ကြောင်း နမ့်စလပ်ဒေသခံ စစ်ရေးသတင်းရင်းမြစ်ထံမှ သိရသည်။

အလားတူ အောက်တိုဘာလ (၇) ရက်တွင် နမ္မတူမြို့နယ် ဘော်တွင်းသတ္တုတွင်း ကြားစခန်းအနီးရှိ KIA စစ်ဆေးရေးဂိတ်တွင် TNLA တပ်ဖွဲ့ဝင်များမှ ဖြတ်သန်းသွားလာစဉ် မဟာမိတ်အချင်းချင်း နယ်မြေအငြင်းပွားမှု ထပ်မံဖြစ်ပွားခဲ့ကြောင်း နမ္မတူဒေသခံများက ပြောသည်။

“အဲ့ဘက်ကတော့ KIA နဲ့ TNLA လည်း ထိတွေ့မှု ဖြစ်လေ့ရှိတယ်။ ဒီတခေါက်ဖြစ်တာ တပ်ရင်းမှူးအဆင့် ရှိတဲ့လူတွေ ဖြတ်သွားဖြတ်လာလုပ်ကြတာ။ အဲ့မှာ သတ္တုတွင်းလည်း ရှိတော့ နယ်စပ်ကို သယ်ဖို့လုပ်တဲ့အချိန် ငြိကြတာပေါ့။ နမ္မတူ၊ မန်တုံနဲ့ သိန္နီ သုံးပွင့်ဆိုင်အစပ် မိုင်းဘော်မှာလည်း ခဏခဏ ဖြစ်ကြတယ်”ဟု နမ္မတူဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

၎င်းဖြစ်စဉ်နှင့် ပတ်သက်ပြီး သျှမ်းသံတော်ဆင့်မှ TNLA ပြောရေးဆိုခွင့်ရှိသူ လွေးယေဦးထံ ဆက်သွယ်မေးမြန်းခဲ့ရာ ယခုကိစ္စကို ကြားသိရခြင်း မရှိသေးဘဲ ထပ်မံစုံစမ်းပြီး ပြန်လည်ဖြေကြားမည်ဖြစ်ကြောင်း ဖြေဆိုထားသည်။

ပြီးခဲ့သည့် ဇွန်လဆန်းပိုင်းကလည်း နမ္မတူမြို့နယ် မိုင်းဘော်နှင့် အွယ်လောကျေးရွာအကြား ကားလမ်းတွင် သတ္တုရိုင်းကိစ္စနှင့် ပတ်သက်ပြီး ပဋိပက္ခဖြစ်ပွားခဲ့ရာ KIA နှင့် TNLA နှစ်ဘက်တပ်ဖွဲ့အကြား အပြန်အလှန် အပြစ်တင်လွှဲချခဲ့သည်။