သျှမ်းပြည် လောက်ကိုင်မြို့သို့ စစ်ကောင်စီတပ်မှ လေကြောင်းဖြင့် ပေါင် (၅၀၀) ဗုံး ထပ်မံကြဲချ တိုက်ခိုက်ခဲ့ကြောင်း စုံစမ်းသိရသည်။
ယနေ့ (အောက်တိုဘာလ ၁၉ ရက်) နံနက် ၁ နာရီခွဲကျော် လူအိပ်မောကျချိန် ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်မြို့ တုံချိန်ရပ်ကွက်အတွင်း စစ်ကောင်စီတပ်မှ လေကြောင်းဖြင့် ပေါင် (၅၀၀) ဗုံးများ ကြဲချတိုက်ခိုက်ခဲ့ရာ (၃၁၁) ပန်းခြံအနီး ကျရောက်ပေါက်ကွဲခဲ့ပြီး နေအိမ်နှင့် ဆိုင်ခန်းများစွာ ထိခိုက်ပျက်စီးခဲ့ကြောင်း ဒေသခံများက ပြောသည်။
“ပေါင် (၅၀၀) ကတော့ ဘယ်နှလုံးတောင်မှလည်း မသိဘူး၊ လေယာဉ်ပေါ်က ဆက်တိုက်ကြဲနေတာ။ (၃၁၁) ပန်းခြံနား ကျကွဲတာရှိတယ်။ တုံချိန်ဘက်လည်း ထပ်လာကြဲသေးတယ်”ဟု လောက်ကိုင်မြို့မှ အသက် (၃၅) နှစ်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
လတ်တလော လောက်ကိုင်မြို့တွင် ဖုန်းလိုင်းနှင့် အင်တာနက်လိုင်း ဖြတ်တောက်ခံထားရခြင်းကြောင့် လူထိခိုက်သေဆုံးမှုနှင့် ပျက်စီးဆုံးရှုံးမှုကို မသိနိုင်သေးကြောင်း ၎င်းအမျိုးသားက ဆက်ပြောသည်။
ပြီးခဲ့သည့် ဩဂုတ်လ (၂) ရက်တွင် လောက်ကိုင်မြို့ တုံချိန်ရပ်ကွက်ရှိ မျှော်စင်နှင့် ပြည်သူ့ဆေးရုံအနီး စစ်ကောင်စီတပ်မှ လေကြောင်းဗုံးကြဲတိုက်ခိုက်ခဲ့ရာ ကိုယ်ဝန်ဆောင်မိခင်နှင့် ကလေးများ အပါအဝင် အရပ်သား (၁၀) ဦး ထိခိုက်သေဆုံးခဲ့ကြောင်း ဒေသခံများ ထံမှ သိရသည်။
ကိုးကန့်တပ်ဖွဲ့ MNDAA သည် ၎င်းထိန်းချုပ်ရာ အထူးဒေသ(၁) သို့ ဖြတ်ငါးဖြတ် လုပ်ဆောင်ရန် တရုတ်အာဏာပိုင်များနှင့် ‘ဝ’တပ်ဖွဲ့ UWSA ထံမှ ဖိအားများနှင့် ရင်ဆိုင်နေရစဉ် သိန္နီမြို့နှင့် လောက်ကိုင်မြို့သို့ စစ်ကောင်စီတပ်သည် သုံးလအကြာ လေကြောင်းဖြင့် ထပ်မံတိုက်ခိုက်လာခြင်း ဖြစ်သည်။
ယနေ့ (အောက်တိုဘာလ ၁၉ ရက်) နံနက်အစောပိုင်း လူအိပ်မောကျချိန်တွင် စစ်ကောင်စီတပ်သည် MNDAA ထိန်းချုပ်ထားသည့် လောက်ကိုင်မြို့၊ TNLA ထိန်းချုပ်ထားသည့်
နောင်ချိုမြို့တို့အပြင် ကချင်လွတ်လပ်ရေးတပ် KIA ဌာနချုပ် အခြေစိုက်ရာ လိုင်ဇာမြို့အနီးသို့လည်း လေကြောင်းဗုံးကြဲ တိုက်ခိုက်ခဲ့ကြောင်း သိရသည်။
Leave a Comments