ထိုင်း-မြန်မာနယ်စပ် လောက်ကိုင်မြို့တွင် လူသတ်မှုအပါအဝင် ရာဇဝတ်မှုများ ကျူးလွန်သည်ဟုဆိုကာ အမျိုးသား ၄ ဦးကို ကိုးကန့်တပ် (MNDAA) က ဇွန်လ ၁၃ ရက် နံနက်ပိုင်းတွင် သေဒဏ်စီရင်ခဲ့ကြောင်း MNDAA ၏ ထုတ်ပြန်ချက်အရ သိရသည်။

လောက်ကိုင်မြို့ တုံချိန်ရပ်ကွက်ရှိ အားကစားကွင်းတွင် ကျင်းပသည့် အဆိုပါတရားစီရင်ရေး အခမ်းအနားတွင် စုစုပေါင်း တရားခံ ၇ ဦးကို လူထုရှေ့ထုတ်ပြခဲ့သည်။

၎င်းတို့အနက် ၄ ဦးကို သေဒဏ်စီရင်ကာ ကျန် ၃ ဦးကို နှစ်ရှည်ထောင်ဒဏ်များ အသီးသီးချမှတ်ခဲ့ကြောင်း ထုတ်ပြန်ချက်တွင် ဖော်ပြထားသည်။

သေဒဏ်စီရင်ခြင်းခံရသူ ၄ ဦးတွင် မိမိ၏ဖခင်ကို သတ်ဖြတ်သူ ၁ ဦး၊ မိခင်ကို သတ်ဖြတ်သူ ၁ ဦး၊ ကြွေးမြီကိစ္စဖြင့် လူ ၂ ဦးကို သတ်ခဲ့သည့်သူ ၁ ဦးနှင့် မူးယစ်ဆေးဝါးသုံးစွဲကာ ၈ နှစ်အရွယ် သမီးရင်းကို သတ်ဖြတ်ခဲ့သည့် အမျိုးသား ၁ ဦးတို့ ပါဝင်ကြောင်း သိရသည်။

MNDAA ၏ ထုတ်ပြန်ချက်အရ ထိုသို့ လူထုရှေ့မှောက် စီရင်းခြင်းသည် “၁၀၂၇ စစ်ဆင်ရေး” အပြီး နယ်မြေပြန်လည် ထိန်းချုပ်နိုင်ခဲ့သည့်နောက်ပိုင်း ဒေသတွင်း ဥပဒေစိုးမိုးရေးကို ပြန်လည်ထူထောင်ရန်နှင့် ရာဇဝတ်မှုများကို ပြတ်သားစွာ နှိမ်နင်းရန် ရည်ရွယ်ခြင်း ဖြစ်သည်ဟု ဆိုသည်။

“ဥပဒေကို ကျော်လွန်ဖောက်ဖျက်သူ မည်သူမဆို ပြင်းထန်သော အပြစ်ပေးမှုကို မလွဲမသွေခံရမည်” ဟု MNDAA အုပ်ချုပ်ရေးကော်မတီက ပြောထားသည်။

ထို့နောက် သေဒဏ်ကျခံရသူများကို လက်ပြန်ကြိုးတုတ်ကာ ခြေချင်းဝတ်များဖြင့် လူထုရှေ့တွင် အမှုတွဲများ ဖြတ်ကြားပြသခဲ့ပြီးနောက် ကွပ်မျက်ရာနေရာသို့ ခေါ်ဆောင်ကာ သေနတ်ဖြင့် ပစ်ခတ်စီရင်ခဲ့ခြင်း ဖြစ်ကြောင်း သိရသည်။

သို့သော်လည်း အဆိုပါတရားစီရင်ရေး ဖြစ်စဉ်အတွင်း တရားခံများအနေဖြင့် ရှေ့နေဖြင့် ခုခံချေပေခွင့် သို့မဟုတ် အယူခံဝင်ခွင့် မည်မျှရရှိခဲ့သည်ဆိုသည့် အချက်ကို MNDAA ဘက်က ထုတ်ပြန်ထားခြင်း မရှိပေ။

ပြီးခဲ့သည့် ၂၀၂၄ (ဧပြီလ ၂၄ ရက်) က လောက်ကိုင်မြို့တွင် ပြစ်မှုကျူးလွန်သူ ၁၀ ဦးကို ကိုးကန့်တပ် (MNDAA) က အများပြည်သူရှေ့၌ သေဒဏ်ချမှတ်ခဲ့ခြင်းအပေါ် မြန်မာနိုင်ငံဆိုင်ရာ ဥရောပသမဂ္ဂရုံး (EU) က အပြင်းထန်ဆုံး ရှုတ်ချလိုက်ပြီး သေဒဏ်သည် လူ့ဂုဏ်သိက္ခာကို ညှိုးနွမ်းစေသည့် လူမဆန်သော ပြစ်ဒဏ်ဖြစ်ကြောင်း ၂၀၂၄ ဧပြီလ ၂၆ ရက်တွင် ထုတ်ပြန်ခဲ့သည်။

ထို့အပြင် ဖက်ဒရယ်ဒီမိုကရေစီ ရရှိရေးအတွက် ကြိုးပမ်းရာတွင် နိုင်ငံတကာစံနှုန်းများနှင့်အညီ တရားဥပဒေစိုးမိုးရေးကို ထိန်းသိမ်းရန်လည်း MNDAA ကို တိုက်တွန်းထားသည်။

MNDAA သည် ၁၀၂၇ စစ်ဆင်ရေးအတွင်း လောက်ကိုင်အပါအဝင် သျှမ်းမြောက်ဒေသရှိ မြို့နယ်အများအပြားကို သိမ်းပိုက်ခဲ့ပြီးနောက် ၎င်းတို့၏ ကိုယ်ပိုင်အုပ်ချုပ်ရေးနှင့် တရားစီရင်ရေးစနစ်ကို ကျင့်သုံးလျက်ရှိသည်။

MNDAA ထိန်းချုပ်နယ်မြေများအတွင်း လူသတ်မှု၊ ပြန်ပေးဆွဲမှုနှင့် လက်နက်မှောင်ခိုမှုများအတွက် အများပြည်သူရှေ့၌ သေဒဏ်နှင့် နှစ်ရှည်ထောင်ဒဏ်များ ချမှတ်ခဲ့သည်မှာ ခြောက်ကြိမ်ထက်မနည်းရှိခဲ့ပြီ ဖြစ်သည်။

၂၀၂၅ ခုနှစ် စက်တင်ဘာလတွင် သိန္နီနှင့် လားရှိုးတွင် ၇ ဦး၊ ဧပြီလတွင် လားရှိုးတွင် ၅ ဦး၊ ၂၀၂၄ ခုနှစ် ဧပြီလတွင် လောက်ကိုင်တွင် ခရိုင်မှူး ၁ ဦးနှင့် တပ်သား ၂ ဦးအပါအဝင် ဒီဇင်ဘာလတွင်လည်း ၆ ဦးကို သေဒဏ်စီရင်ခဲ့ကြောင်း သိရသည်။