သျှမ်းပြည်တောင်ပိုင်း ဆီဆိုင်မြို့တွင် မူယစ်ဆေးဝါးသုံးစွဲသူကို ပအိုဝ်းပြည်သူစစ် (PNO)ဖမ်းပြီး ငွေအဆမတန်ဖြင့် ပြန်ရွေးခိုင်းနေသည်ဟု စုံစမ်းသိရသည်။
ပြီးခဲ့သည့် (စက်တင်ဘာလ)မှစတင်ပြီး ယခုလ (အောက်တိုဘာလ )အထိ ဆီဆိုင်မြို့တွင် မူးယစ် ဆေးဝါးသုံးစွဲသူကို အစုလိုက်အပြုံလိုက်ဖမ်းမိထားကာ ပိုက်ဆံရှိသည့် ပေါ်မူတည်ပြီး ကျပ်သိန်း ၅၀ဖြင့် ပြန်ရွေးခိုင်းကြောင်း ထိုဖြစ်စဉ်ကို သိသည့် ဆီဆိုင်မြို့မှ ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ဖမ်းတယ် ခဏခဏဖမ်းတယ်။ အရင်လဆို ပိုဆိုးတယ် ပိုက်ဆံရှိရင်ရှိသလို ပြန်ရွေးခိုင်းတယ်။ ဒီလိုလုပ်တာ နှစ်နဲ့ချီနေပြီ။ အာမခံနဲ့ပြန်ရွေးခိုင်းတယ် အနည်းဆုံးက ၁၅ သိန်းပဲ။ ရောင်းတဲ့သူလည်း လက်ဆင့် ပြန်ကမ်းကြတယ်။ တကယ်ကျတော့ သူတို့အချင်းချင်းပဲ” ဟု ၎င်းက ပြောသည်။
ယင်းကဲ့သို့ မူးယစ်ဆေးဝါးနှင့် ပတ်သက်ပြီး PNO တပ်မှ ထိထိရောက်ရောက်အရေးယူခြင်းမဟုတ်ဘဲ ၎င်းတို့မူးယစ်ဆေးဝါးတိုက်ဖျက်သည့် ပုံစံလောက်သာ ဟန်ပြလုပ်ဆေင်ပြပြီး ပြည်သူထူထုအတွက် မည်သည့် အကျိုးကျေးဇူးမှ မရှိနေကြောင်း အသက် ၄၀ ရှိအမျိုးသားတစ်ဦးက ပြောသည်။
“သူတို့ကဖမ်းပြီး မူးယစ်ဆေးဝါးတိုက်ဖျက်တဲ့ ပုံစံလိုလို ဟန်ပြလောက်ပဲလုပ်ပြတာ။တကယ် မြေပြင်မှာ ပြည်သူအတွက် ဘာအကျိုးကျေးဇူးမှ မရှိဘူး။ မူးယစ်ဆေးဝါးရောင်းတဲ့သူလည်း သူတို့လူပဲ သူတို့အကျိုးစီးပွားရေးအတွက်လောက်ပဲ လုပ်စားနေကြတာ” ဟု၎င်းက ပြောသည်။
ဆီဆိုင်မြို့အတွင်းသို့ စစ်ရှောင်များ သုံးပုံ နှစ်ပုံခန့် ပြန်လာကြပြီး သဘာဝဘေးနှင့် စစ်ဘေးကြောင့် အလုပ်ကိုင်ရှားပါးကာ အလှူရှင်ကိုသာ အားထားနေရသည်။
ပြီးခဲ့သည့် စက်တင်ဘာလ တတိယပတ်မှ စ၍ မြို့အဝင်အထွက်ကို တင်းကြပ်စွာ စစ်ဆေးမှုပြုလုပ်နေပြီး စားသောက်ကုန်ပစ္စည်းများတင်ဆောင်ခွင့်ကိုလည်း ကန့်သတ်ထားကြောင်းသိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments