သျှမ်းပြည်တောင်ပိုင်း အင်းလေးဒေသတွင် မိုးသည်းထန်စွာရွာသွန်းပြီးနောက်တွင် ရေဘေးရှောင်ပြည်သူများ သောက်ရေသုံးရေ မသန့်ရှင်းမှုကြောင့် ကလေး၊လူငယ်များ အရေပြားယားယံခြင်းတွေ ဖြစ်ပွားနေသည်ဟု စုံစမ်းသိရသည်။
ပြီးခဲ့သည့် စက်တင်ဘာလ ၁၁ ရက်မှစပြီး အင်းလေးဒေသဘက်တွင် စံချိန်တင် ရေမြင့်တက်လာပြီး ကျေးရွာအများပြား ရေနစ်မြုပ်ကာ ဒေသခံပြည်သူအများပြား ရေဘေးသင့်နေကြသည်။
ထိုသို့ ရေကြီးရေလျှံမှုကြောင့် သောက်သုံးရေများပြတ်လတ်ကာ မိုးရေခံထားသည့်ရေ၊အင်းကန်ကရေများကို သောက်သုံးရေအတွက် ရေကျိုချက်သောက်ပြီးသုံးနေသော်လည်း ကလေး၊လူငယ် အရေပြားယားယံတာတွေ ပိုများလာသည်ဟု ရေဘေးရှောင်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မိုးကြီးပြီးတဲ့နောက်တော့ သောက်သုံးဖို့ရေက မရှိဘူး။ အင်းကန်ထဲကရေပဲ သုံးနေရတာ။ ကျိုချက်ပြီးတော့သောက်တယ် အဆင်မပြေဘူး။ ရွှေဂူကျောင်းမှာပဲ ကလေး၊လူငယ် အယောက် ၂၀ ယောက်ကို အဖုတွေထပြီး ယားယံကြတယ်။ ရွာကဆရာမနားလိမ်းဆေးနဲ့လိမ်းတယ်” ဟု ၎င်းကပြောသည်။
အင်းလေးဒေသရှိ ကျေးရွာတစ်ချို့တွင် ကြက်ခြေနီအဖွဲ့က လာရောက်ဖော်ပြောပေးခြင်းရှိပြီး လိမ်းဆေး၊ သောက်ဆေးအနည်းငယ် ပေးသွားတာမျိုးလည်းရှိကြောင်း ကျေးရွာဒေသဘက်တွင် ကျန်းမာရေးဝန်ထမ်း လာရောက်ဟောပြောရန်လိုအပ်နေကြောင်း ဒေသခံတစ်ဦးက ပြောသည်။
လက်ရှိ အင်းလေးဒေသသည် ရေအနည်းသာပြန်ကျနေသဖြင့် ရေဘေးရှောင် အချို့ စားဝတ်နေရေးအတွက် အလုပ်ရှာရန် ခက်ခဲနေသည်ဟု သိရသည်။
“ရွာမှာက ကြက်ခြေနီအဖွဲ့တွေလာတာတော့ရှိတယ်။ လိမ်းဆေးသောက်ဆေးတွေလည်း ပေးသွားတယ်။ ကလေးတွေအဖြစ်များတော့ ယားယံတာ မပျောက်ဘူး။ ကူးကြတာ။ အမှန်ဆို ကျန်းမာရေး ဆရာမတွေကိုယ်တိုင်လာရင် ပိုထိရောက်တယ်”ဟု၎င်းက ပြောသည်။
အရေပြားရောဂါဖြစ်ပွားနေကြသည်မှာ ကလေးသူငယ်များနှင့် ကိုယ်ဝန်ဆောင်များက အများဆုံးဖြစ်ပြီး တကိုယ်ရည် သန့်ရှင်းမှု နည်းပါးသည့်အပြင် မသန့်ရှင်းသော ရေကိုအသုံးပြုနေရတာကြောင့် ဖြစ်သည်ဟု ဒေသခံတစ်ဦးက ပြောသည်။
အင်းလေးဒေသတွင် ရေအနည်းငယ်သာလောက်သာ ပြန်ကျနေပြီး စပါးနှင့် ခရမ်းချဉ်သီးစိုက်ခင်း အများအပြား ရေနစ်မြှုပ်ကုန်သဖြင့် စားဝတ်နေရေးအတွက် ပိုမိုစိုးရိမ်လာကာ အလုပ်အကိုင်အတွက်လည်း စိုးရိမ်ပူပန်နေသည်ဟု သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments