သျှမ်းပြည်တောင်ပိုင်း ရွာငံမြို့နယ် သိမ်ကုန်းကျေးရွာတွင် စစ်ကောင်စီခန့်အပ်ထားသည့် အုပ်ချုပ်ရေးမှူးနှင့် ၎င်း၏ဇနီး သတ်ခံရပြီးနောက် ဒေသခံ သက်ကြီးနှစ်ဉီးကို ဖမ်းဆီးသွားရာ ယနေ့ထိတိုင် ပြန်မလွှတ်ပေးသေးကြောင်း စုံစမ်းသိရသည်။
ပြီးခဲ့သည့် အောက်တိုဘာ ၁၃ရက်တွင် စစ်ကောင်စီမှ ခန့်အပ်ထားသော အုပ်ချုပ်ရေးမှူးနှင့် ၎င်း၏ ဇနီးတို့အသတ်ခံခဲ့ရပြီး၊ ကျေးရွာဒေသခံ အသက် ၅၀အရွယ်ရှိ ဒေါ်ထွေးနှင့် အသက် ၆၀ အရွယ်ရှိ ဦးရဲဝင်းတို့ကို စစ်ကောင်စီက လာရောက် ဖမ်းဆီးသွားခဲ့သည်။
“ သူတို့ နှစ်ယောက်ကို ဖမ်းသွားတာ နှစ်ရက်ရှိပြီ၊ ပြန်မလွှတ်သေးဘူး။ သူတို့ ၂ယောက်က အသက်တွေလည်း ကြီးနေပြီလေ။ သူတို့နှစ်ယောက် နှိပ်စက်ခံရမှာပဲကြောက်တာ” ဟု သိမ်ကုန်းကျေးရွာမှ ဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။
အဆိုပါ သက်ကြီးနှစ်ဉီးကို ဖမ်းဆီးရသည့်အကြောင်းရင်းမှာ ဒေါ်ထွေးသည် ရွာအစွန်တွင်နေထိုင်ပြီး သေနတ်လာပစ်သူများကိုသိရှိနိုင်သည်ဟု အထင်ဖြင့် ဖမ်းဆီးသွားကြောင်း၊ ဦးရဲကို မည်သည့်ကိစ္စကြောင့် ဖမ်းဆီးသည်ကို မသိရှိကြောင်း ၎င်းက ဆိုသည်။
“ လာသတ်သွားတဲ့ အဖွဲ့က ဒေါ်ထွေးအိမ်ဘက်ကို သေနတ်တွေနဲ့ ဖောက်ပြီး ပြေးထွက်သွားတာ။ ဒေါ်ထွေးအိမ်က ရွာအစွန်မှာ ရှိတော့ သူတို့ သိမယ်အထင်နဲ့ ဖမ်းသွားတာထင်တယ်။ ကိုရဲဝင်းတော့ ဘာလို့ဖမ်းခေါ်ခံရလဲတော့မသိဘူး။” ဟု ၎င်းအမျိုးသမီးက ပြောသည်။
ထိုစစ်ကောင်စီခန့်အပ်ထားသော အုပ်ချုပ်ရေးမှူးနှင့် ၎င်း၏ ဇနီး သတ်ခံရပြီးနောက် ရွာငံမြို့တွင်း စစ်ဆေးမှုများ ပိုပြီးတင်းကျပ်လာကာ ဒေသအတွင်း သွား၊လာမှုလည်း ကန့်သတ်ခံနေရကြောင်း သိရသည်။
“ အရင်လိုလွတ်လွတ်လပ်လပ်သွားချင်သလို သွားလို့မရဘူး။ သူတို့စစ်ဆေးမှုလည်း ပိုကျပ်လာတယ်။ သွားလာတာတွေလည်း ကန့်သတ်တာတွေရှိတယ်။” ဟု ရွာငံမြို့မှ ဒေသခံအမျိုးသမီးတစ်ဉီးက ပြောသည်။
ရွာငံဒေသခံများသည် သဘာဝဘေးကြောင့် လမ်းပန်းဆက်သွယ် ရေးခက်ခဲကာ စားသုံးကုန်စည်များ ပြတ်လပ်မှုဖြစ်ပေါ်နေပြီး စစ်ကောင်စီ၏ သန်းခေါင်စာရင်းကောက်ယူနေမှုကြောင့် စိုးရိမ်မှုတွေပါ ရှိနေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments