သျှမ်းပြည် သီပေါမြို့နယ်ရှိ စစ်ကောင်စီလက်ကျန်တပ် ခြေလျင်တပ်ရင်း ခလရ(၂၃)မှ တပ်သားနှင့် မိသားစုဝင် (၄၀၀) ကျော်သည် မိုင်းရယ်မြို့သို့ လက်နက်အပြည့်အစုံဖြင့် တပ်ဆုတ်သွားခဲ့ကြောင်း စုံစမ်းသိရသည်။
ယမန်နေ့ (အောက်တိုဘာလ ၁၄ ရက်) ညနေပိုင်းတွင် သီပေါမြို့၌ နောက်ဆုံးကျန်ရှိသည့် စစ်ကောင်စီ ခြေလျင်တပ်ရင်း ခလရ(၂၃) မှ အရာရှိ စစ်သည်၊ တပ်သားနှင့် တပ်မိသားစုဝင် (၄၀၀) ကျော်သည် စစ်လက်နက်အပြည့်အစုံဖြင့် မိုင်းရယ်မြို့သို့ ကား (၁၀) စီးခန့် တပ်ဆုတ်သွားကြောင်း ဒေသခံများက ပြောသည်။
“စစ်သားကော၊ ဒဏ်ရာရတဲ့လူကော နောက်ပြီး သူတို့ မိသားစုနဲ့ဆိုရင် အားလုံး ၄၀၀ ကျော် ရှိမယ်။ တွဲကားကြီး ၃ စီးနဲ့ ကားသေးကျတော့ ၆ စီးကျော်ရှိမယ် မိုင်းရယ်ဘက် တက်သွားတာ။ သေနတ်တွေကော ယူသွားတာဆိုတော့ ညှိနှိုင်းပြီးမှ တပ်ဆုတ်တဲ့ သဘောထင်တယ်”ဟု သီပေါမြို့မှ စစ်ရေးလေ့လာသူတစ်ဦးက သျှမ်းသံတော်ဆင့်ကို ပြောသည်။
သီပေါမြို့ရှိ လက်ကျန်စစ်ကောင်စီတပ် ခလရ-(၂၃) တပ်ရင်းကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ပူးပေါင်းတပ်ဖွဲ့များမှ နှစ်လကျော် ထိုးစစ်ဆင် တိုက်ခိုက်ပြီးနောက် ယမန်နေ့ (အောက်တိုဘာလ ၁၃ ရက်)တွင် သိမ်းပိုက်ထိန်းချုပ်နိုင်ခဲ့ကြောင်း ဒေသခံများထံမှ သိရသည်။
အလားတူ မိုင်းရယ်မြို့တွင်လည်း ကိုးကန့်တပ်ဖွဲ့ MNDAA နှင့် စစ်ကောင်စီတပ်တို့သည် နှစ်ဘက်စစ်ရေး တင်းမာလျက်ရှိပြီး လားရှိုးမြို့ကို ပြန်လည်သိမ်းယူရန် မြေပြင်ထိုးစစ်အတွက် စစ်ကောင်စီတပ်က အင်အားဖြန့်ကျက်နေကြောင်း ဒေသခံများက ပြောသည်။
“ကိုးကန့်တပ်က ရှေ့တစ်ခေါက် သိမ်းထားတဲ့ တင့်ကားကြီးတွေ မောင်းလာပြီးတော့ မိုင်းရယ်ထိ ရောက်တယ်လို့ ပြောကြတယ်။ MNDAA ကတော့ လားရှိုးတိုက်ပွဲ အခြေအနေ ထပ်ဆိုးမှ မိုင်းရယ် မဟုတ်ရင် နမ့်လန်ထပ်ဝင်မယ့် သဘောရှိတယ်။ တန့်ယန်း၊ မိုင်းရယ်တကြောမှာတော့ အရင်လို ဂိတ်စောင့်တဲ့ PDF တွေ မရှိတော့ဘူး၊ စကစဘက်က အင်အားဖြန့်နေတယ်”ဟု မိုင်းရယ်မြို့နယ်မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။
ကိုးကန့်တပ်ဖွဲ့ MNDAA အနေဖြင့် မိုင်းရယ်မြို့နယ်အတွင်း ဟိုယကျေးရွာအနီးရှိ ခလရ-(၆၇)၊ သီပေါမြို့နယ်အတွင်း နောင်ကော်ကြီးကျေးရွာအခြေစိုက် ခလရ-(၁၄၇) တပ်စခန်းတို့ကို ထိန်းချုပ်နေရာယူထားပြီး နမ့်လန်မြို့အနီးတွင်လည်း ရောက်ရှိနေကြောင်း ဒေသခံများက ဆက်ပြောသည်။
ပြီးခဲ့သည့် အောက်တိုဘာလ (၉) ရက်တွင် မိုင်းရယ်မြို့အနီးရှိ သကြားစက်ရုံ ဧည့်ရိပ်သာနှင့် အလုပ်သမား နေအိမ်အဆောင်များကို စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ အမျိုးသမီးတစ်ဦး သေဆုံးပြီး (၈) ဦးထက်မနည်း ထိခိုက်ဒဏ်ရာ ရရှိခဲ့ကြောင်း ဒေသခံများထံမှ သိရသည်။
Leave a Comments