သျှမ်းပြည်မြောက်ပိုင်း သီပေါမြို့ကို တအာင်း(ပလောင်) အမျိုးသားလွတ်မြောက်ရေးတပ်မတော် (TNLA)မှ ထိန်းချုပ်နိုင်ပြီးနောက်တွင် စစ်ကောင်စီတပ်မှ လေကြောင်း ဗုံးကြဲတိုက်ခိုက်မှု ဆက်တိုက်ပြုလုပ်နေသဖြင့် ပြည်သူများ ထပ်မံတိမ်းရှောင် နေရကြောင်း စုံစမ်းသိရသည်။

သီပေါမြို့တွင် စစ်ကောင်စီတပ်၏ နောက်ဆုံးလက်ကျန်ဖြစ်သည့် အမှတ်(၂၃) ခြေလျင်တပ်ရင်း (ခလရ – ၂၃ )တပ်ကို ယမန်နေ့ (အောက်တိုဘာလ ၁၃ ရက်) နံနက် ၂ နာရီဝန်းကျင်တွင် TNLA နှင့် ပူးပေါင်းတပ်ဖွဲ့များက သိမ်းပိုက်နိုင်ခဲ့ပြီးနောက်တွင် စစ်ကောင်စီတပ်မှ မြို့ထဲထပ်မံ ဗုံးကြဲတိုက်ခိုက်မှုများ ပြုလုပ်နေပြီး ပြည်သူထပ်မံ တိမ်းရှောင်နေရသည်ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“စစ်တပ်ဘက်က ကျန်တဲ့ (ခလရ – ၂၃)တပ်ကို မနေ့ မနက်၂နာရီမှာ TNLA က သိမ်းလိုက်တယ်။ သိမ်းပြီးနောက်လည်း စစ်တပ်က တစ်နေကုန် ဗုံးလာကြဲတယ်။ ပြည်သူတွေလည်း ထပ်မံရှောင်နေရပြီ၊ ဒီထပ်ပိုဆိုးလာနိုင်တယ်” ဟု ၎င်းဒေသခံ အမျိုးသားက ပြောသည်။

လက်ရှိ သီပေါမြို့ကို TNLA သိမ်းပိုက်နိုင်သော်လည်း စစ်ကောင်စီတပ် ထပ်မံဗုံးကြဲတိုက်ခိုက်လာမည်ကို ပိုမိုစိုးရိမ်နေရပြီး ယမန်နေ့မှ စ၍ ပြည်သူများ ထပ်မံစစ်ရှောင်နေရသည်ဟု သိရသည်။

လားရှိုးမြို့အခြေစိုက် အရှေ့မြောက်ပိုင်း တိုင်းစစ်ဌာနချုပ်ကို ( သြဂုတ်လ ၃ ) ရက်တွင် MNDAA က အပြီးသတ် သိမ်းပိုက်ပြီးနောက် မြို့ထဲကို စစ်ကောင်စီ နေ့စဉ်ဗုံးကြဲတိုက်ခိုင်ပြီး ပြည်သူအများအပြား သေဆုံး၊ ထိခိုက်ဒဏ်ရာရရှိခဲ့သလို ယခုအခါ သီပေါမြို့ကိုလည်း လေကြောင်းဆက်တိုက် ဗုံးကြဲမည်ကို စိုးရိမ်နေကြသည်ဟု မြို့နယ်ဒေသခံ အသက် ၄၀ နှစ်အရွယ်ခန့်ရှိ အမျိုးသားတစ်ဦးက ပြောသည်။

“တအာင်း (TNLA) တပ်တွေ သိမ်းပြီးလည်း ဗုံးထပ်လာကြဲသွားတယ်။ လားရှိုးလည်း ကိုးကန့်တပ် (MNDAA )က သိမ်းပြီးတော့ စစ်တပ်က နေ့အော် ညအော် ဗုံးတွေလာကြဲတယ်။ အဲလိုတွေ ဖြစ်လာနိုင်ခြေရှိတယ်။ ဘာလို့ဆို စစ်တပ်က သူတို့ လက်လွတ်လိုက်တဲ့ မြေကို ပြန်တိုက်မှာပဲ ဒီတိုင်းတော့မထားဘူး။ ဒီနေ့ဆို ပြည်သူတွေ ထပ်ရှောင်နေတဲ့သူလည်း ရှိတယ်” ဟု ၎င်းကပြောသည်။

ယမန်နေ့ စစ်ကောင်စီထပ်မံ ဗုံးကြဲတိုက်ခိုက်မှုအတွင်း ပြည်သူထိခိုက်ဒဏ်ရာရမှုနှင့် နေအိမ်ပျက်စီးမှုများကို ဆက်လက်စုံစမ်းနေဆဲ ဖြစ်သည်။

ပြီးခဲ့သည့် (အောက်တိုဘာလ ၉ ရက်) ညနေ ၃ နာရီအချိန်တွင် စစ်ကောင်စီတပ်မှ Y-12 လေယာဉ်ဖြင့် ရွှေကျောင်းရပ်ကွက်နှင့် ပန်းတိမ်တောင် ရပ်ကွက်အတွင်း ဗုံး (၁၀)လုံးထက်မနည်း လာရောက်ကြဲချခဲ့ပြီး နမ့်ငုံးကျေးရွာ ဘုန်းကြီးကျောင်းအတွင်း ကျရောက်ပေါက်ကွဲကာ သီလရှင်တစ်ပါး ပျံလွန်တော်မူပြီး သီလရှင် နှစ်ပါး ထိခိုက်ဒဏ်ရာရရှိခဲ့ကြောင်း သိရသည်။

ထို့အပြင် သိန္နီမြို့ သုံးလအကြာ စစ်ကောင်စီတပ်သည် (အောက်တိုဘာလ ၁၀ ရက်) နံနက် ၂ နာရီခွဲကျော်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့မှ ကွမ်းလုံ-ဟိုပန် သွားသည့် လမ်းမကြီးပေါ်ရှိ မန်ချက်ကျေးရွာသို့ စစ်ကောင်စီတပ်မှ လေကြောင်းဖြင့် ဗုံး(၃) လုံး ကြဲချတိုက်ခိုက်ခဲ့ရာ အရပ်သား (၄) ဦး ထိခိုက်ဒဏ်ရာရပြီး နေအိမ် (၃) လုံးထက်မနည်း ထိခိုက်ပျက်စီးခဲ့ကြောင်း ဒေသခံများက ပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။