သျှမ်းပြည်နယ်မြောက်ပိုင်း ၊သီပေါမြို့ပေါ်ရပ်ကွက်နှင့် ကျေးရွာများတွင် စစ်ကောင်စီမှ လေယာဉ် လေးစီးနှင့် ဗုံးလာရောက် ကြဲချခဲ့ခြင်းကြောင့် ဒဏ်ရာရရှိခဲ့သည့် သီလရှင်နှစ်ပါးကို ပရဟိတအဖွဲ့မှ ဆေးကုသပေးနေကြောင်း ဒေသခံများပြောပြချက်အရသိရသည်။
ယမန်နေ့ (အောက်တိုဘာလ ၉ ရက်) ညနေ ၃နာရီအချိန်တွင် စစ်ကောင်စီတပ်မှ Y-12 လေယာဉ်ဖြင့် ရွှေကျောင်းရပ်ကွက်နှင့် ပန်းတိမ်တောင် ရပ်ကွက်အတွင်း ဗုံး (၁၀)လုံးထက်မနည်း လာရောက်ကြဲချခဲ့ပြီး နမ့်ငုံးကျေးရွာ ဘုန်းကြီးကျောင်းအတွင်း ကျရောက်ပေါက်ကွဲကာ သီလရှင်တစ်ပါး ပျံလွန်တော်မူပြီး သီလရှင် နှစ်ပါး ထိခိုက်ဒဏ်ရာရရှိခဲ့ ကြောင်း သိရသည်။
“ အခုက ဒဏ်ရာရထားတဲ့ သီလရှင်ကို ပရဟိတ ဖွင့်ထားတဲ့ဆေးခန်းမှာ ဆေးကုပေးနေတယ်။ ညကဆို လေယာဉ် လေးစီးတောင်လာချတာ။ သီလရှင်လဲ သေတယ်။ နေအိမ်တွေလဲ ပျက်စီးကုန်တယ်။ ၂၃ တပ်နားမှာတော့ ပစ်သံကြားနေရတယ်။ မြို့ထဲကိုတော့ ဗုံးခဏခဏလာကြဲတာ။” ဟု သီပေါဒေသခံ အမျိုးသားတစ်ဦးက သျှမ်းသံတောင်ဆင့်ကိုပြောသည်။
ထို့အပြင် သီပေါဒေသခံများသည် အစစရာရာ သတိနှင့် နေကြရပြီး လေယာဉ်သံကိုသာ အချိန်မရွေး နားစွင့်နေရကြောင်းနှင့် လုံခြုံမူမရှိကြောင်း ဒေသခံတစ်ဦးက ပြောသည်။
“ သီပေါမှာနေနေတဲ့လူက အိမ်မယ်၊ စားမယ်ဆိုရင် လေယာဉ်သံနားထောင်ပြီးနေနေရတယ်။ ဘယ်ချိန်မှာ လာကြဲမယ်ဆိုတာ မသိလို့။ဘယ်သွားသွား ဘာလုပ်လုပ် နားထောင်ပြီးသတိနဲ့နေရတယ်။ နေရထိုင်ရတာ မလုံခြုံဘူး။ ခုဆိုရင် သီပေါကနေ စစ်ရှောင်သွားတဲ့လူတွေက အိမ်ခဏပြန်ကြည့်ပြီး ပြန်ထွက်ကြတာများတယ်။ ပြန်မနေရဲသေးဘူး။” ဟု အသက် ၄၀ နီးပါး ရှိ သီပေါမြို့ခံ အမျိုးသားတစ်ဦးက ပြောသည်။
ထို့အပြင် တောင်မြို့ရပ်ကွက်၊ ပန်တိမ်တောင်ရပ်ကွက်နှင့် အုပ်ကျင်းရပ်ကွက်ရှိ ဒေသခံပြည်သူများ၏ နေအိမ် (၁၀)လုံးထက်မနည်း ပျက်စီးသွားသည်။
လက်ရှိသီပေါမြို့ စစ်ကောင်စီတပ် ခလရ (၂၃)တပ်စခန်းနေရာတွင် တအာင်းအမျိုးသားလွတ်မြောက်ရေးတပ်မတော် (TNLA) နှင့် စစ်ကောင်စီတပ်တို့ အကြားတိုက်ပွဲ ပြင်းထန်ဖြစ်ပွားလျက်ရှိသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments