သျှမ်းပြည်နယ်တောင်ပိုင်း၊ ဆီဆိုင်မြို့ စစ်ကောင်စီဂိတ်တွင် ကုန်ပစ္စည်းသယ်ဆောင်သည့် ဒေသခံများကို ဖမ်းဆီးပြီး သယ်ဆောင်လာသည့် ကုန်ပစ္စည်းများကို သိမ်းဆည်းထားကြောင်း ဒေသခံများပြောပြချက်အရ သိရသည်။

ပြီးခဲ့သည့် စက်တင်ဘာလ တတိယပတ်မှ စ၍ မြို့အဝင်အထွက်ကို တင်းကြပ်စွာ စစ်ဆေးမှုပြုလုပ်နေပြီး စားသောက်ကုန်ပစ္စည်းများတင်ဆောင်ခွင့်ကိုလည်း ကန့်သတ်ထားသည်။

ထို သတ်မှတ်ထားသည့် ကန့်သတ်ချက်ကျော်တင်ဆောင်လာသည့် ပြည်သူများကို ဖမ်းဆီးထားပြီး ကုန်ပစ္စည်းများကိုပါ သိမ်းဆည်းထားကြောင်း ဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“ ဈေးဆိုင် ဖွင့်ထားတဲ့သူဆို ပိုဆိုးတယ်။သူတို့ က အဝေးကြီးကနေလာပြီး ဈေးလာသုံးကြတာ။ သူတို့ကုန်ပစ္စည်းသယ်လာတာများလို့ဆိုပြီး စစ်တပ်ဂိတ်က ပေးမဖြတ်ဘူး။ လူတွေကို ဖမ်းပြီး အချုပ်ခန်းထဲ ထည့်တယ်။ နောက်နေ့ ပြန်လွှတ်ပြီး ကုန်ပစ္စည်းကျတော့ ပြန်မပေးတော့ဘူး။ PDFကို ထောက်ပံ့မှာစိုးလို့ထင်တယ်။” ဟု ဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။

ဆီဆိုင်မြို့အတွင်းတွင် စစ်ရှောင်များ သုံးပုံ နှစ်ပုံခန့် ပြန်လာကြပြီး သဘာဝဘေးနှင့် စစ်ဘေးကြောင့် အလုပ်ကိုင်ရှားပါးကာ အလှူရှင်ကိုသာ အားထားနေရသည်။

ထို အလှူရှင်များအနေဖြင့် စစ်ဘေးရှောင်ထက် ရေဘေးသင့်သူကို ပို၍အာရုံလှူဒါန်းမှုတွေပြုလုပ်လာခြင်းကြောင့် စစ်ရှောင်ဘက်တွင် ပို၍ခက်ခဲ အကြပ်တည်းများဖြင့် ရင်ဆိုင်နေရကြောင်း အဆိုပါအမျိုးသမီးက ထပ်လောင်းပြောသည်။

ထို့ကဲ့သို့ အစစ်ဆေးတင်းကျပ်ကာ ကုန်ပစ္စည်းများကို ကန့်သတ်ထားမှုကြောင့် ဆီဆိုင်မြို့အတွင်း ဝေးလံသည့် ကျေးရွာများရှိ ဒေသခံများမှာ စားသောက်ကုန်လောက်ငှမှု မရှိတော့ကာ စားဝတ်နေရေးအတွက် ပိုမိုခက်ခဲလာကြောင်း ဆီဆိုင်မြောက်ဘက်ကျေးရွာမှ အမျိုးသမီးတစ်ဉီး ကသျှမ်းသံတော်ဆင့်ကိုပြောသည်။

“ ရွာသမားတွေက သီနှံပေါ်တဲ့ချိန်ဆို တော်တော်များများက တနှစ်စာ စားသောက်ကုန် ဝယ်ကြတယ် ။အခု ပေးမဝယ်တော့ စားသောက်ကုန်တွေ ပြတ်လပ်လာတယ်။ ခရီးဝေးတော့ ကပိုင်စက်၊ ဆိုင်ကယ်မရှိတဲ့လူဆို သူများနောက် လိုက်ရတယ် ။တခါတလေ သူများဆီလူကြုံမှာရင်လဲ အရင်က မှာလို့ရတယ် ။ ခုချိန်ခြေနေက သူများနဲ မှာရင် သူများ မဝယ်ပေးရဲဘူး ။စားရေးသောက်ရေးက ပိုခက်ခဲ့ လာတယ်။” ဟု ၎င်းက ဆိုသည်။

ထို့အပြင် PNOထံ စစ်မှုမထမ်းသည့် နေအိမ်များကို တစ်အိမ်လျှင် ကျပ်ငွေ ၁၃ သိန်းကောက်ခံနေသဖြင့် သဘာဝဘေးနှင့် စစ်ရေးကြားတွင် ဒေသခံများ အလူးလဲခံနေရသည်ကြောင်း ၎င်းအမျိုးသမီးက ထပ်ဆင့်ပြောသည်။

ဆီဆိုင်မြို့ကို ဖြတ်ပြီး အခြားဒေသသို့သွားမည့် ကုန်တင်ကားများသည် တောင်ကြီးမီးသတ်ရုံးတွင် ဖောင်ဖြည့်ပြီး(ရပခ) ကိုတင်ပြပြီးမှ ဖြတ်သန်းသွားလာလို့ရကြောင်းသိရသည်။

ဆီဆိုင်မြို့တွင် ပအိုဝ်းအမျိုးသားလွတ်မြောကရေး တပ်မတော် ( PNLO/PNLA)၊ KNDF၊ PDF ပူးပေါင်းတပ်ဖွဲ့ နှင့် ပအိုဝ်းပြည်သူ့စစ် (PNO) ၊စစ်ကောင်စီတို့ ပူးပေါင်းတပ်ဖွဲ့များသည့် ပြီးခဲ့သည့် ဇန်နဝါရီလ ၂၄ ရက်နေ့တွင် တိုက်ပွဲ ပြင်းထန်စွာဖြစ်ပွားခဲ့ပြီး မြို့ခံအများပြား စစ်ဘေးတိမ်းရှောင်ခဲ့ရသည်။

အလုပ်သင် သတင်းထောက် နန်းလရောင် ရေးသားသည်။