သျှမ်းပြည် သီပေါမြို့နယ် နောင်ကော်ကြီးကျေးရွာတွင် ကိုးကန့်တပ်ဖွဲ့ MNDAA သိမ်းပိုက်ထားသည့် ခလရ-(၁၄၇) တပ်ရင်းအနီး တွေ့ရှိခဲ့သည့် လက်ပစ်ဗုံး အိမ်ယူပြန်ရာမှ ပေါက်ကွဲပြီး အမျိုးသား(၂) ဦး ဒဏ်ရာအပြင်းအထန် ရရှိခဲ့ကြောင်း စုံစမ်းသိရသည်။

အောက်တိုဘာလ (၅) ရက်တွင် သီပေါမြို့နယ် နောင်ကော်ကြီးကျေးရွာနေ အသက်(၃၂)နှစ်အရွယ် စိုင်းလူ သည် ကိုးကန့်တပ်ဖွဲ့ MNDAA သိမ်းပိုက်ထားသည့် စစ်ကောင်စီလက်အောက်ခံ ခြေလျင်တပ်ရင်း ခလရ-(၁၄၇) အနီး လက်ပစ်ဗုံးများ သွားရောက်ရှာဖွေ တွေ့ရှိခဲ့ပြီး နေအိမ်သို့ သယ်ယူလာခဲ့ကြောင်း ဒေသခံများထံက ပြောသည်။

၎င်းသယ်ယူလာခဲ့သည့် လက်ပစ်ဗုံးကို ပြန်လည်ရောင်းချရန်အတွက် ပြုပြင်နေစဉ် အောက်တိုဘာ (၅) ရက် ညနေ ၅ နာရီခန့်တွင် ပေါက်ကွဲမှုဖြစ်ပြီး နေအိမ်ရှိ အသက် (၅၀) ကျော်အရွယ် လုံးတောပလ လည်း ဗုံးဆံထိမှန်ကာ ထိခိုက်ဒဏ်ရာ အပြင်းအထန် ရရှိခဲ့ကြောင်း သီပေါဒေသခံ အမျိုးသားတစ်ဦး ပြောသည်။

“ရွာနားက တပ်ဟောင်းဘက်မှာ ဗုံးသွားကောက်လာတာ။ အိမ်ရောက်တော့ သွားရောင်းဖို့ဆိုပြီးတော့ စနက်တံ ပင်ထည့်နေတဲ့အချိန် ဗုံးပေါက်တာ။ အိမ်မှာ ရှိတဲ့လူ နှစ်ယောက်လုံး ဗုံးဆံမှန်တာ၊ တစ်ယောက်က လက်ပြတ်ပြီးတော့ မျက်နှာတွေ ထိတယ်။ နောက်တစ်ယောက်က တစ်ကိုယ်လုံး အနာဖြစ်ကုန်တယ်”ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဗုံးဆံထိမှန်ပြီး ဒဏ်ရာ ရရှိခဲ့သည့် နောင်ကော်ကြီးကျေးရွာမှ စိုင်းလူနှင့် လုံးတောပလ တို့ နှစ်ဦးကို ကိုးကန့်တပ်ဖွဲ့မှ လားရှိုးဆေးရုံသို့ ပို့ဆောင်ပေးပြီး ဆေးကုသမှု ခံယူနေကြောင်း ဒေသခံများထံမှ သိရသည်။

လက်ရှိတွင် နောင်ကော်ကြီးကျေးရွာအနီးရှိ ဒေသခံများမှာ အလုပ်အကိုင် ရှားပါးမှုကြောင့် ကိုးကန့်တပ်ဖွဲ့နှင့် စစ်ကောင်စီတပ်တို့ တိုက်ပွဲပြီးနောက် ခလရ-(၁၄၇) တပ်စခန်းဟောင်း အနီးတဝိုက်တွင် သေနတ်နှင့် လက်ပစ်ဗုံးများ သွားရောက်ရှာဖွေပြီး ပြန်လည်ရောင်းချမှုများ ရှိလာကြောင်း သီပေါဒေသခံများက ပြောဆိုသည်။

“တပ်ဟောင်းနား ရလာတဲ့ သေနတ်တစ်လက်ကို သိန်း ၅၀ ပေးတယ်၊ လက်ပစ်ဗုံးဆို ပင်ပါရင် တစ်လုံးကို နှစ်သောင်းခွဲပေးတယ်။ ဒီတစ်ယောက်က လက်ပစ်ဗုံး အများကြီး ရလာတာ၊ တချို့က ပင်မရှိတော့ အဲ့တာထည့်ရင်းနဲ့ ပေါက်ကွဲတာ။ ရွာထဲမှာလည်း အဲ့လက်နက်တွေ လက်ခံပြီး ဝယ်တဲ့လူရှိလို့ သွားရှာကြတာ”ဟု သီပေါဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

ကိုးကန့်တပ်ဖွဲ့ MNDAA သည် ပြီးခဲ့သည့် ဇူလိုင်လ ၂၆ ရက်မှ စတင်ပြီး သီပေါမြို့နယ် နောင်ကော်ကြီးကျေးရွာတွင် အခြေစိုက်ထားသည့် စစ်ကောင်စီ ခြေလျင်တပ်ရင်း ခလရ-(၁၄၇) ကို ထိုးစစ်ဆင် တိုက်ခိုက်ခဲ့ပြီး ဩဂုတ်လ (၂၁) ရက်တွင် အပြီးသတ် သိမ်းပိုက် ထိန်းချုပ်နိုင်ခဲ့သော်လည်း မိုင်းရှင်းလင်းရေး မလုပ်ဆောင်ရသေးကြောင်း ဒေသခံများက ပြောသည်။