သျှမ်းပြည်တောင်ပိုင်း၊ တောင်ကြီးမြို့နယ်၊ ကျောင်းကြီးစု နယ်မြေ ၆ ရပ်ကွက်ထဲတွင် မြေပြိုမှုစတင်ဖြစ်ပေါ်နေပြီး နေအိမ်တစ်လုံးထိခိုက်ထားကြောင်း စုံစမ်းသိရှိရသည်။
အောက်တိုဘာ ၆ ရက် နံနက်ပိုင်းမှစတင်ပြီး ကျောင်းကြီးစု နယ်မြေ ၆ အတွင်း တောင်စောင်းမှ မြေပြိုဆင်းလာမှုကြောင့် နေအိမ်ထိခိုက်မှုပါရှိကြောင်း ဒေသခံတစ်ဦးက သျှမ်းသံတော်ဆင့်သို့ ပြောသည်။
“၆ ရက်နေ့ မနက်တည်းက စဖြစ်နေတာပေါ့ ညနေ ၃ နာရီလောက်ကျတော့ အိမ်ကိုပါ လာပိသွားတာ၊ မနက်တည်းက တဖြည်းဖြည်း အိကျလာတာ၊ အဲ့အိမ်က အပေါ်ဆုံးမှာ အောက်မှာက အိမ် ၄၀ လောက်ရှိနေတယ်” ဟု ၎င်းကပြောသည်။
ထိုသို့ မြေပြိုဆင်းမှုများရှိနေသော်လည်း အနီးတဝိုက်မှ နေထိုင်သူများမှာ ဖယ်ရှားခြင်း၊ အန္တရာယ်ရှိကြောင်း အသိပေးခြင်း မရှိကြောင်း သိရသည်။
“ပေ ၃၀၀ လောက်ကနေ မြေကပြတ်ကျလာပြီး အိမ်ကိုလာပိတာ အောက်မှာ အိမ် အလုံး ၂၀ လောက်ထိနိုင်တယ်၊ မိုးဆက်ရွာရင် အချိန်မရွေးပြိုနိုင်တယ်၊ တခြားအိမ်တွေက ဆက်နေနေကြတုန်းပဲ အန္တရာယ်ရှိကြောင်း အသိပေးတာတွေလည်း မတွေ့ရဘူး ဖြစ်မှ ဝိုင်းလှူကြမယ်ဆိုတဲ့ နိယာမ ကိုင်ထားကြတာ၊” ဟု ၎င်းကပြောထားသည်။
ပြီးခဲ့သည့် စက်တင်ဘာလအတွင်းတွင်လည်း တောင်ကြီးမြို့ ကျောင်းကြီးစုရပ်ကွက် နှင့် ဝါးပြားရပ်ကွက်များတွင်လည်း မြေအောက်ရေပြန်လည် စိမ့်ထွက်မှုများလည်းရှိခဲ့ပြီး မြေကျွံနိုင်မည့်အန္တရာယ်များကိုလည်း ဂရုစိုက်သင့်ကြောင်း နားလည်သူများကပြောသည်။
အလားတူ စက်တင်ဘာလ ၁၁ ရက်နေ့က ဟိုပုံးမြို့နယ် ဗန်းစောက်ကျေးရွာတွင် မိုးသည်းထန်စွာရွာသွန်းပြီး တောင်ပြိုမှုမှုဖြစ်ပွားခဲ့သောကြောင့် မြေအဖွား ၂ ဦး မြေပိ သေဆုံးမှုဖြစ်ပွားခဲ့သည်။
စက်တင်ဘာလ ၁၁ ရက်မှစ၍ မိုးအဆက်မပြတ်ရွာသွန်းမှုကြောင့် တောင်ကြီးခရိုင်အတွင်းရှိ မြို့နယ်နှင့် ကျေးရွာအပါအဝင် လွိုင်လင်မြို့နယ်နှင့် မောက်မယ်မြို့နယ်တွင် ရေကြီးခြင်း၊ တောင်ပြိုခြင်းနှင့် မြေပြိုခြင်းများ ရုတ်တရက် ဖြစ်ပေါ်ခဲ့သောကြောင့် လူ ၁၄၀ ဦး သေဆုံးခဲ့သည်ဟု ပအိုဝ်းလူငယ်အစည်းအရုံး PYO က ထုတ်ပြန်ထားသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments