သျှမ်းပြည်နယ်တောင်ပိုင်း၊ လွိုင်လင်ခရိုင် ပင်လုံ(အရှေ့) ကျေးရွာများတွင် ပအိုဝ်းပြည်သူ့စစ် (PNO) မှ စစ်သားစုဆောင်းနေတာကြောင့် လူငယ်များ ထွက်ပြေးတိမ်းရှောင်နေရကြောင်း သတင်းရရှိသည်။
ပြီးခဲ့သည့် ဖေဖော်ဝါရီလ (၁၀) ရက်တွင် စစ်ကောင်စီက စစ်မှုထမ်းဥပဒေကို တရားဝင်ပြဌာန်းခဲ့ပြီးနောက် စစ်ကောင်စီနှင့် ပအိုဝ်းပြည်သူ့စစ် (PNO) တို့မှ အတင်းအဓမ္မ စစ်သားစုဆောင်းခြင်း၊ ရပ်ရွာအလိုက် မဲနှိပ်ကာ တပ်သား စုဆောင်းခြင်းများ လုပ်ဆောင်ခဲ့သည်။
ပင်လုံမြို့ (အရှေ့)ဖက်တွင် ကျေးရွာ (၈)ရွာရှိပြီး အများစုမှာ ပအိုဝ်းလူမျိုးအများဆုံးနေထိုင်ကြကာ PNO မှ လစဉ် စစ်မှုထမ်းစာရင်းလာရောက်ကောက်ခံနေတာကြောင့် လူငယ်အများစု နိုင်ငံခြားထွက်ခွာ ရှောင်တိမ်းနေရကြောင်း သိရသည်။
“ ဘယ်အဖွဲ့ပဲဖြစ်ဖြစ် ကျနော် ဖိအားပေးတယ် ။ ရွာကလူကြီးတွေလည်း ဒီပြဿနာကို မဖြေရှင်း နိုင်တာတွေရှိတယ် ။ အဲတာကြောင့် ရွာကလူငယ်တွေက သူများနိုင်ငံကိုသွားရတယ်။ ဘယ်သူကမှမသွားချင်ပဲသွားရတာ။” ဟု ပင်လုံဒေသခံ အမျိုးသားတစ်ဦးက သျှမ်းသံတော်ဆင့် ကိုပြောသည်။
ထိုကဲ့သို့ စစ်မှုထမ်းခေါ်ယူစုဆောင်းနေသည် သုံးကြိမ်ရှိပြီဖြစ်ပြီး ရပ်ရွာထဲတွင် လူငယ်မရှိကြသဖြင့် လူငှားပြီး စစ်မှုထမ်းခိုင်းနေရကြောင်း ၎င်းအမျိုးသားက ထပ်လောင်းပြောသည်။
ထို့အပြင် သဘာဝဘေးဖြစ်သည့် ရေကြီးမှု မြေပြိုမှုဒဏ်ကို ခံစားနေရပြီး ရပ်ရွာထဲတွင် အသက်ကြီးရွယ်အိုနှင့် ကလေးများသာ ကျန်ရှိသဖြင့် ပြန်လည်ထူထောင်ရေးတွင် ပို၍ခက်ခဲကာ အလှူရှင်များကိုသာ အားကိုးနေရသည်။
“ ရွာမှာက အသက်ကြီးတဲ့သူပဲကျန်တာ။ PNOကလဲ စစ်မှုထမ်းဖို့ ဖိအားပေးတာကတစ်မျိုး အခုက ရေကြီးပြီး မြေပြိုထားတော့ သွားရလာရလဲခက်တယ်။ နေအိမ်တွေ ပြုပြင်ဖို့ လမ်းတွေပြုပြင်ဖို့ဆို လုပ်နိုင်ကိုင်နိုင်တဲ့ လူငယ်တွေ မရှိတော့ဘူး။ အလှူရှင်တွေကိုပဲ အားကိုးရတော့မှာပေါ့။” ဟု ဒေသခံ တစ်ဦးက ပြောသည်။
ပင်လုံ(အရှေ့) တွင် ကုန်းလမ်း၊နောင်လိုင်၊ ဝမ်အင်၊ ဝမ်လုံ ၊ ကျူယုံး ၊ ကောင်း၊ ဟွေကြိမ်နှင့် ဟွေဆန်း စသဖြင့် ကျေးရွာရှိပြီး အများစုမှာ PNO ထိန်းချုပ်ထားသည့် ရွာများဖြစ်ပြီး လူငယ်အများစုမှာ နိုင်ငံခြားတွင် တိမ်းရှောင်နေရသည်။
ယခုလက်ရှိ ပင်လုံမြို့နယ် ကျေးရွာအချို့တွင် ရေဘေးကြောင့် လူ(၂၀)ကျော်သေဆုံးပြီး နေအိမ်(၈၀)ကျော် ပျက်စီးကာ အကူညီများစွာလိုအပ်နေကြောင်း သိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments