ရာဂီမုန်တိုင်းအရှိန်ကြောင့် ရေကြီး၊ မြေပြိုမှု ဖြစ်ပွားခဲ့သော သျှမ်းပြည်အရှေ့ပိုင်းနှင့် တောင်ပိုင်းတွင် ယခုအောက်တိုဘာလဆန်းမှ စတင်ကာ မိုးရွာသွန်းပြီးနောက် ရေပြန်တက်လာနေကြောင်း စုံစမ်းသိရသည်။

ယမန်နေ့ (အောက်တိုဘာလ ၂ ရက်)တွင် မိုးရွာသွန်းမှုကြောင့် မြန်မာ-ထိုင်းနယ်စပ်ဒေသ တာချီလိတ်မြို့ရှိ မယ်ခေါင်ရပ်ကွက်အတွင်း ရေကြီးရေလျှံမှု ထပ်မံဖြစ်ပေါ်ကြောင်း ဒေသခံများထံမှသိရသည်။

“မနေ့ညလည်း မယ်ဆိုင်ချောင်းရေ ပြန်တက်လာလို့ အချို့ရပ်ကွက်မှာလည်း ရေပြန်တက်နေတာ” ဟု တာချီလိတ်မြို့ ဒေသခံတစ်ဦးက ပြောသည်။

ယနေ့ အောက်တိုဘာလ ၃ ရက် နံနက်ပိုင်းအချိန်တွင် တာချီလိတ်နှင့် မယ်ဆိုင်အကြားရှိ မယ်ဆိုင်ချောင်းရေ လျှံပြီး မယ်ဆိုင်မြို့ဘက်သို့ စီးဆင်နေသည်ဟု ဒေသခံများကပြောသည်။

ထို့အပြင် တာချီလိတ်မြို့ လွယ်တော်ခမ်းပူးပေါင်း စစ်ဆေးရေးဂိတ်အနီးရှိ တံတားကြီးတွင် စက်တင်ဘာလအတွင်း ရေကြီးမှုကြောင့် ရေနှင့်အတူ မျောပါသွား၍ ယာယီကြိုးတံတားအဖြစ် ပြုလုပ်ထားသည့် ကြိုးတံတားမှာလည်း ယနေ့ နံနက်အချိန်က မယ်ဆိုင်ချောင်းရေအတွင်း ထပ်မံ မျောပါသွားကြောင်း သိရသည်။

အလားတူ ကလောမြို့တွင် အောက်တိုဘာလ ၁ ရက်မှ စတင်ကာ မိုးရွာသွန်းမှုကြောင့် ရေပြန်တက်လာသဖြင့် အနိမ့်ပိုင်းရပ်ကွက်တွင် နေထိုင်သူများက ကြိုတင်ပစ္စည်းရွှေ့ပြောင်းထားရကြောင်း ကလောမြို့ခံ တစ်ဦးကပြောသည်။

“အရင်လက ရေကြီးမှုကြုံခဲ့တဲ့ အချို့အနိမ့်ပိုင်းရပ်ကွက်တွေတော့ စိုးရိမ်နေကြတာပေ့ါ။ တချို့လည်း ပစ္စည်းတွေ ကြိုတင်ပြင်ဆင်ပြီး ရွှေ့ပြောင်းထားတာလည်းရှိတယ်။ ဒီနှစ်ရေကြီးတာတော့ အရမ်းဆိုးတယ်။ ကျမတို့ တစ်သက်မှတစ်ခါမှ ဒီလိုမကြုံဖူးဘူး။ အရင်လကဖြစ်ပျက်သွားတာ ကြိုတင်မပြင်ဆင်နိုင်ကြလို့ အသက်ဆုံးရှုံးခဲ့ရတဲ့သူတွေလည်း အများရှိတယ်” ဟု ကလောမြို့ဒေသခံ အမျိုးသမီးတစ်ဦးက ပြောသည်။

ထို့အတူ ညောင်ရွှေမြို့နယ် အင်လေးနှင့် တောင်ကြီးမြို့နယ် ပုံးအင်းဒေသတွင်လည်း ရေအနည်းငယ်သာ ကျဆင်းသွားသော်လည်း မိုးထပ်ရွာပါက ရေပြန်တက်နိုင်ကြောင်း ဒေသခံများကပြောသည်။

“အခုလောလောဆယ် အိပ်ခန်းထဲမှာအိပ်လို့မရသေးဘူး။ အိမ်ကြမ်းပြင်နဲ့ ရေကထိနေသေးတယ်။ မိုးထပ်ရွာရင်တော့ ရေပြန်တက်နိုင်တယ်။ ရေထပ်တက်ရင်တော့ ဒုက္ခရောက်မှာပေါ့။ အခုတောင် ရေကအကုန်ကျသေးတာမဟုတ်ဘူး” ဟု ပုံးအင်းဒေသခံ အမျိုးသမီးတစ်ဦးက ပြောသည်။

စက်တင်ဘာလ ၃၀ ရက်မှ အောက်တိုဘာလ ၅ ရက်အထိ သျှမ်းပြည်အပါအဝင် နိုင်ငံအနှံ့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး အချို့ဒေသများတွင် ဒေသအလိုက်နှင့် နေရာကွက်၍ မိုးကြီးခြင်းများနှင့် အတူ လေပြင်းတိုက်ခတ်ခြင်းများ ဖြစ်ပေါ်နိုင်သည်ဟု မိုးလေဝကသ သတိပေးထားသည်။

လျှပ်တစ်ပြက်ရေကြီးခြင်းနှင့် အတူ မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်သဖြင့် ကုန့်မြင့်ဒေသအနီး နေထိုင်ကြသူများအနေဖြင့် မြေပြိုမှုအန္တရာယ် ဖြစ်နိုင်ကြောင်း ဖော်ပြထားသည်။

အလားတူ မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့်လည်း ရေကြီး၊ ရေလျှံမှုများကို ကြိုတင်သတိပြုရှောင်ရှားနိုင်သည်ဟုဆိုထားသည်။

စက်တင်ဘာလအတွင်း တိုက်ခတ်ခဲ့သည့် ရာဂီမုန်တိုင်းကြောင့် နိုင်ငံတစ်ဝှမ်း ရေကြီး၊ မြေပြိုမှုများကြောင့် သေဆုံးသူ ၄၃၃ ဦးနှင့် ပျောက်ဆုံးသူ ၇၉ ဦး အထိရှိပြီး အဆောက်အအုံပေါင်း ၅,၆၀၄ လုံး ပျက်စီးသွားကြောင်း စက်တင်ဘာလ ၂၇ ရက်တွင် စစ်ကောင်စီက ထုတ်ပြန်ထားသည်။