သျှမ်းပြည် မူဆယ်မြို့တွင် တရုတ်ငွေလဲလှယ်သည့် အမျိုးသားတစ်ဦးကို အမည်မသိ လက်နက်ကိုင် အမျိုးသား ၃ ဦးက ပစ်ခတ်ပြီး ဓားပြတိုက်ကြောင်း သိရသည်။ 

 ယမန်နေ့ (စက်တင်ဘာလ ၃၀ ရက်) နံနက် ၆ နာရီခွဲကျော် မူဆယ်မြို့ ဈေးရပ်ကွက်တွင်နေထိုင်သော အသက်  ၆၀ ကျော် အမျိုးသားတစ်ဦးကို အမည်မသိလက်နက်ကိုင် အမျိုးသား  ၃ ဦးက သေနက်ဖြင့်ခြိမ်းခြောက်ကာ သေနက်ဖြင့်ပစ်ခတ်ခဲ့ကြောင်း မူဆယ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။ 

“အမျိုးသား ၃ ဦးက သူ့ရှေ့ကို ပိတ်ရက်လိုက်တာ။ သူကလည်း တိုက်လိုက်တော့ နှစ်ဖက်လုံး လှဲကျ သွားတာ။သူတို့က ထပြီး ပစ်တော့ အဲ့ အမျိုးသားရဲ့ခြေထောက်ကို ထိသွားတာ။အဲ့ဒါပြီးမှ ဒေသခံတွေဝင် ကူလို့ ပစ်တဲ့လူတွေက ထွက်ပြေးသွားတာ။သူက ငွေလဲလှယ်တဲ့ အလုပ်လုပ်တာလေ။ဘာမှ တော့မပါသွားလိုက်ဘူး။” ဟု အမျိုးသားတစ်ဦးက ပြောသည်။ 

ထိုပစ်ခက်ခံရသော အမျိုးသားကို မူဆယ်မြို့ ပြည်သူ့ဆေးရုံသို့ ပို့ဆောင်ထားကြောင်းသိရသည်။ 

ပြီးခဲ့သည့် ၂၀၂၃ ဒီဇင်ဘာလတွင်းလည်း ၎င်း၏ ဇနီးကို အမည်မသိလက်နက်ကိုင် အဖွဲ့မှ ဓားပြတိုက်ခဲ့ပြီး သေနက်ဖြင့်လည်း ပစ်ခံခဲ့ရကြောင်း သိရသည်။ 

လက်ရှိ နိုင်ငံရေးအခြေနေအရ တရုတ်- မြန်မာ ငွေလဲလှယ်သူများ အနေဖြင့်လည်း သူခိုး ဓားပြများကိုလည်း သတိထားရမည်ဖြစ်ပြီး မူဆယ်ဒေသခံ များက ပြောဆိုသည်။

မူဆယ်မြို့ စက်တင်ဘာလ အတွင်းတွင် အမည်မသိလက်နက်ကိုင်မှ သေနက်ပစ်ခြိမ်းခြောက် ၍ ဓားပြတိုက်မှု ၃ ကြိမ်ဖြစ်ပွားခဲ့ကြောင်း သိရသည်။ 

မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များသည် ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိသည်။

မူဆယ်မြို့သည် တရုတ်နယ်စပ်မြို့ဖြစ်ပြီး လက်ရှိအချိန်ထိ တိုက်ပွဲမဖြစ်ပွားသေးသည့် ဒေသတစ်ခု ဖြစ်နေသေးကြောင်း သိရသည်။