သျှမ်းပြည် အပါအဝင် နိုင်ငံတဝှမ်း၌ လာမည့် အောက်တိုဘာလ ၁ ရက်နေ့မှ ၅ ရက်နေ့ အတွင်း နေ့ရာအနှံ့အပြား မိုးရွာပြီး နေရာကွက်၍ မိုးကြီးခြင်း၊ လေပြင်းတိုက်ခတ်ခြင်းများ ဖြစ်ပေါ်နိုင်၍ ရေကြီးမှုနှင့် မြေပြိုမှုများ သတိပြုရန် လိုအပ်ကြောင်း မိုးလေဝသဌာနက စက်တင်ဘာလ ၂၈ ရက် ညပိုင်းတွင် ထုတ်ပြန်သည်။
အနောက်ဘက်မှ ရွေ့လျား လာသော လေပွေလှိုင်း အရှိန်ကြောင့်လည်းကောင်း၊ အပူပျံတက်တိမ်များ ဖြစ်ထွန်းမှု အားကောင်း ခြင်းကြောင့် လည်းကောင်း၊ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့မှ လေနွေးများနှင့် တရုတ်ပြည်မကြီးပေါ်မှ ရွေ့လျားလာသော လေအေးများ တွေ့ဆုံမှုကြောင့် လည်းကောင်း နိုင်ငံတဝှမ်း နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက် နေရာကွက်၍ မိုးကြီးခြင်းနှင့်အတူ လေပြင်းတိုက်ခတ်ခြင်းများ ဖြစ်ပေါ်နိုင်ကြောင်း ဖော်ပြသည်။
မိုးသည်းထန်စွာ ရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးကြိုးပစ်ခြင်း၊ မိုးသီးကြွေခြင်း၊ လျှပ်တစ်ပြက် ရေကြီးခြင်းနှင့် မြေပြိုမှုများ ဖြစ်ပေါ်နိုင်ပါသဖြင့် ကုန်းမြင့်ဒေသတွင် နေထိုင်သူများအနေဖြင့် မြေပြိုမှု၊ မြစ်ငယ်၊ ချောင်းငယ်များအနီး နေထိုင်သူများ အနေဖြင့် ရေကြီး၊ ရေလျှံမှုများ ကြိုတင်သတိပြုရန် ထုတ်ပြန်ချက်တွင် ဖော်ပြသည်။
လက်ရှိ မိုးရွာသွန်းမှုနှင့် ဆည်ရေဖောက်ချမှုများကြောင့် သျှမ်းတောင်၊ ဖယ်ခုံနှင့် မိုးဗြဲ သာမက ဆက်စပ်နေသည့် လွိုင်ကော်မြို့တွင်ပါ ရေဘေးကြုံတွေ့နေရကြောင်း ဒေသခံများက ပြောသည်။
ထို့အတူ စက်တင်ဘာလ ၂၆ ရက်နေ့မှ ယမန်နေ့ အထိ မိုးဆက်တိုက် ရွာသွန်းမှုကြောင့် မန္တလေးတိုင်း၊ ကျောက်ဆည်၊ မြစ်သားနှင့် ဝမ်းတွင်းမြို့နယ်များရှိ ကျေးရွာ အများအပြား ရေဘေးထပ်မံ ကြုံတွေ့နေရကြောင်း ဒေသခံများက ပြောဆိုသည်။
စက်တင်ဘာ ဒုတိယပတ်က စတင် ဖြစ်ပွားခဲ့သည့် မိုးသည်းထန်စွာ ရွာသွန်းမှုကြောင့် နေပြည်တော်၊ ပဲခူး၊ ကရင်နီ၊ ကရင်၊ မကွေး၊ မန္တလေး၊ မွန်၊ ရှမ်း အရှေ့ပိုင်းနှင့် တောင်ပိုင်း အပါအဝင် ၅၉ မြို့နယ်ရှိ ခန့်မှန်းခြေ ပြည်သူ ၆၃၁,၀၀၀ ဦးခန့် ရေဘေးသင့်ခဲ့ပြီး ရာနှင့်ချီ၍ သေဆုံးကာ အများအပြား ပျောက်ဆုံးနေကြောင်း ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က စက်တင်ဘာ ၁၆ ရက်တွင် ထုတ်ပြန်ထားသည်။
Leave a Comments