သျှမ်းပြည်မြောက်ပိုင်း မူဆယ်မြို့တွင် စစ်ကောင်စီမှ ဖမ်းဆီးထားသော အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သူများကို တရုတ်ယွမ်ငွေ ၂ သောင်းဖြင့် ပြန်လည် ထုတ်ယူရန် ပြောဆိုနေကြောင်း စုံစမ်းသိရသည်။

ပြီးခဲ့သည့် စက်တင်ဘာလ ၂၂ ရက်တွင် စစ်ကောင်စီမှ မူဆယ်မြို့တွင်း အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သူ (၅၀၀)ကျော်ကို ဖမ်းဆီးရမိထားပြီး မင်္ဂလာမူဆယ် အနီးတွင် ဖမ်းဆီး ထိန်းသိမ်းထားကြောင်း ဒေသခံများထံမှ သိရသည်။

ထိုဖမ်းဆီး ထိန်းသိမ်းခံထားရသော အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သူ (၅၀၀) ကျော်တွင် တရုတ်လူမျိုး (၂၆၀) ကျော် ပါဝင်နေပြီး ကျန်ရှိသည့် မြန်မာနိုင်ငံသားများကို တစ်ဦးလျှင် တရုတ်ယွမ်ငွေ ၂ သောင်း (မြန်မာကျပ်ငွေ သိန်း ၁၃၀ ကျပ်) ဖြင့် ပြန်ရွေးထုတ်ရမည် ဖြစ်ကြောင်း မူဆယ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ပြန်ထုတ်မယ်ဆိုရင်တော့ တစ်ယောက်ကို ယွမ်ငွေ ၂သောင်းတဲ့၊ မြန်မာနိုင်ငံသားပဲ တရုတ်က လူတွေမပါဘူး ထုတ်လို့ရတာ။ သူတို့အခု တရုတ်က ကျားဖြန့်လုပ်တဲ့လူ ၆၀၀ ကျော်ကို တောင်းလာတာ။ အနည်းဆုံး ၄၀၀ အထိ ဖမ်းပေးရမယ်လို့ ပြောတယ်”ဟု မူဆယ်မြို့ ဒေသခံအမျိုးသားတစ်ဦးက ဆက်ပြောသည်။

တရုတ်ဘက်မှ ကျားဖြန့်လုပ်ကိုင်သူ လူဦးရေ (၆၀၀) ကို ဖမ်းဆီးပေးရန် စစ်ကောင်စီကို တောင်းဆိုထားပြီး လက်ရှိတွင် အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သူ တရုတ်လူမျိုး (၂၆၀) ကျော်သာ ဖမ်းဆီး ရမိထားသည့်အတွက် ဆက်လက်၍ ဖမ်းဆီမှုများ ပြုလုပ်နေကြောင်း မူဆယ်မြို့မှ ၎င်းဒေသခံအမျိုးသားက ဆက်ပြောသည်။

“တရုတ်ကတော့ အဲ့ဖမ်းဆီးထားတဲ့ ၂၆၀ ကျော်ကို ဒီနေ့ မယူသေးဘူး။ အခုကတော့ အုပ်ချုပ်ရေးမှူးတွေကို ဆက်ပြီး စုံစမ်းခိုင်းနေတာ ထပ်ဖမ်းဖို့။ ၄၀၀ တောင် မရသေးတော့ တရုတ်က လက်မခံသေးတာ။ ပိုက်ဆံပေးနိုင်တဲ့ လူတချို့ကလည်း ပြေးနေကြပြီလေ။ တရုတ်လူတွေကိုလည်း ပြည်သူ့စစ်ကပဲ အကာအကွယ် ယူပေးတာ” ဟု မူဆယ်မြို့ ‌ဒေသခံအမျိုးသားက ပြောသည်။

မူဆယ်မြို့တွင် ယနေ့ (စက်တင်ဘာ ၂၅ ရက်) အထိ ၃ ရက်ဆက်တိုက် မြို့အဝင်အထွက် လမ်းများကို စစ်ကောင်စီမှ ဆက်လက် ပိတ်ထားပြီး စစ်ဆေးမှုများလည်း တင်းကြပ်နေကြောင်း ဒေသခံများက ပြောသည်။

စက်တင်ဘာလ ၂၂ ရက် မူဆယ်မြို့တွင် အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သည့် နေရာများကို စစ်ကောင်စီမှ ဝင်ရောက် ဖမ်းဆီးချိန်တွင် ပြည်သူ့စစ်များနှင့် ပစ်ခတ်မှု ဖြစ်ပွားခဲ့ကြောင်း သိရသည်။

မူဆယ်မြို့ ပတ်ပတ်လည်တွင် တိုင်းရင်းသားလက်နက်ကိုင်များ ကျင်လည်လှုပ်ရှားသည့် နယ်မြေဖြစ်ပြီး၊ လက်ရှိအချိန်ထိ စစ်ရေးတင်းမာသည့် နေရာဖြစ်ကာ စစ်ကောင်စီနှင့် တိုင်းရင်းသားလက်နက်ကိုင်တို့ တိုက်ပွဲမဖြစ်ပွားသည့် ဒေသတစ်ခုလည်း ဖြစ်သည်။

ယခင်က မကြာခဏဆိုသကဲ့သို့ တရုတ်-မြန်မာ နယ်စပ်ရှိ ကျားဖြန့် အွန်လိုင်းငွေလိမ်ဂိုဏ်းများကို ပူးပေါင်းဖမ်းဆီး ခဲ့သော်လည်း ၎င်းလုပ်ငန်းများ လျော့ကျသွားခြင်းမရှိခဲ့ပေ။