သျှမ်းပြည်နယ်တောင်းပိုင်း၊ ဟိုပုံးမြို့နယ် မဲနယ်တောင်ဒေသ လုံးဟီး(စံဖူး)ကျေးရွာရှိ ပြည်သူတစ်ဦးကို ပအိုဝ်းပြည်သူ့စစ် (PNO) စစ်သားတစ်ဦးက သေနတ်ဖြင့် ပစ်ခတ်ခဲ့ကြောင်း စုံစမ်းသိရသည်။

ယမန်နေ့ (စက်တင်ဘာလ ၂၃)ရက် နံနက် ၃နာရီအချိန်တွင် PNOတပ်ဖွဲ့ဝင် ဘထူးဆိုသူသည် တစ်ရွာတည်းနေထိုင်သည့် ဦးညိုအား တလျနွိုးရွာကို လိုက်ခဲ့ရန် သေနတ်ဖြင့် ခြိမ်းခြောက်ခေါ်ဆောင်၍ တောထဲတစ်နေရာ၌ မှောက်လျက်နေခိုင်းးကာ သေနတ်ဖြင့် နှစ်ချက်ပစ်ခတ်ခဲ့ပြီး ထားခဲ့ကြောင့် သေနတ်ပစ်ခံရသည့် ဦးညိုနှင့် နီးစပ်သူအမျိုးသားတစ်ဦးက သျှမ်းသံတော်ဆင့် ကို ပြောသည်။

“တော်သေးတာပေါ့။အသက်မသေခဲ့လို့။ ပြည်သူတွေကို ကာကွယ်ပေးဖို့ဆိုပြီး မထည့်မနေရ ကောက်ထားတဲ့ ဆပ်ကြေး လက်နက်တွေနဲ အပြစ်မဲ့ ပြည်သူကို ပြန်ပစ်သတ်တာက အရမ်းယုတ်ညံ မိုက်ရိုင်းတဲ့ လူမဆန်တဲ့ လုပ်ရပ်ဖြစ်တယ်။”ဟု ၎င်းက ဆိုသည်။

သေနတ်ပစ်ခံရမှုကြောင့် ဦးညို၏ ဘက်ဘက်ပခုံးတွင် ဒဏ်ရာရရှိခဲ့ပြီး လက်ရှိမှာ ဆေးကုသခံ နေကြောင်း သိရသည်။

ဦးညိုသည် လွန်ခဲ့သည့် နှစ်ပေါင်း၂၀ ကျော်တွင် ကျေးရွာသူကြီးလုပ်ခဲ့ဖူးသူဖြစ်ပြီး၊ သေနတ်ပစ်ခတ်ခဲ့သည့် ဘထူးတို့ လင်မယား ရန်ဖြစ်မှုကို ကူညီဖြေရှင်းပေးခဲ့ဖူးသူဖြစ်သည်။

ထိုကိစ္စကြောင့် ဘထူးမှ အခဲမကြေဘဲ ရန်ငြိုးထာပြီး ယခုကဲ့သို့ ပြုလုပ်ခြင်းဖြစ်သည်ဟု ဒေသခံများက သုံးသပ်ပြောဆိုသည်။

“အခုဟာက ဘယ်လိုဖြေရှင်းပေးရမလဲမသိဘူး။ ရွာမှာ သဘာဝဘေးက တမျိုး ဒီပြဿနာက တမျိုးဆိုတော့ ကျနော်လည်း ခေါင်းရှုပ်နေပြီ။ တစ်ရွာတည်းသားချင်းဆိုတော့ ဘယ်လိုလုပ်ရမလဲမသိဘူး။” ဟု ဟိုပုံးမြို့ ဒေသခံ အမျိုးသားတစ်ဉီးက ပြောသည်။

လက်နက်အားကိုးပြီး လုပ်ချင်တိုင်း လုပ်နေသည့်ပုံစံဖြစ်နေကြောင်း၊ စစ်အာဏာသိမ်းပြီးနောက် အဘက်ဘက်မှ စစ်မှုထမ်းကောက်ယူနေပြီး၊ PNO တပ်ဖွဲ့သို့ ဝင်ရောက်သွားသည့် လူအများစုသည် အလုပ်အကိုင်မဲ့သူများနှင့် စဥ်းစားတွေးခေါ်မှုမရှိများသဖြင့် ရှေ့ဆက်ပြီး လက်နက်ဖြင့် အနိုင်ကျင့်မှုများဖြစ်လာနိုင်ကြောင်းလည်း ၎င်းက သုံးသပ်ပြောသည်။

“လူရမ်းကား ဘိန်းစားတွေကို လက်နက်တွေ ပေးအပ်တာဟာ တော်တော်ကို ဦးနှောက် စဉ်းစားဉာဏ် မရှိတာ” ဟု ဒေသခံအမျိုးသားတစ်ဦးက ပြောသည်။

လက်ရှိမဲနယ်တောင် ဒေသသည် သဘာဝဘေးနှင့် စစ်ဘေးဒဏ်ကြောင့် နေအိမ်နှင့်လမ်းများပျက်စီးနေကာ ယခုထိ စားနပ်ရိက္ခာပို့ဆောင်ရန် အတွက် အခက်အခဲများဖြစ်နေကြောင်း သိရသည်။

အလုပ်သင် သတင်းထောက် နန်းလရောင် ရေးသားသည်။