သျှမ်းပြည်တောင်ပိုင်း၊ ရွာငံမြို့နယ် မြောက်ဘက်ရှိကျေးရွာအများစုတွင် ရေကြီး၊မြေပြိုမှုများကြောင့် ဆန်ပြတ်လပ်မှု စတင်ရင်ဆိုင်နေရကြောင်း စုံစမ်းသိရသည်။

ပြီးခဲ့သည့် ဩဂုတ်လ လယ်ပိုင်းမှစပြီး သျှမ်းပြည်နယ်တောင်ပိုင်း နှင့် မြန်မာနိုင်ငံနေရာအချို့တွင် မိုးများအဆက်မပြတ် ရွာသွန်းမှုကြောင့် ရေကြီးရေလျှံမှု၊မြေပြိုမှုဆက်တိုက်ဖြစ်ပွားပြီး လမ်းများပျက်စီးကာ ကုန်သွယ်စီးဆင်မှု ပြတ်တောက်မှု ရှိလာသည်။

ထိုသို့ ကုန်သွယ်စီးဆင်းမှု ပြတ်တောက်လာသဖြင့် ရွာငံမြို့နယ်အတွင်း အဓိကစားသုံးကုန်ဖြစ်သည့် ဆန်များ ပြတ်လပ်လာပြီး ယခုရက်ပိုင်း ဆန်ဆိုင်များ ဆန်ရောင်းရန် မရှိသည့်အထိ ပြတ်လပ်လာသည်။

“ဆန်တွေ ခုထိမရောက်လာသေးဘူး။ ကလောနားမှာ လမ်းတွေပိတ်နေတော့ လာလို့မရဘူးထင်တယ်။ ဆန်က ရန်ကုန်ဘက် ကနေယူတာ။ ဘယ်ရက်နေ့ရောက်မလဲ တိကျမသိသေးဘူး။ အခု ရောင်းဖို့လည်း မကျန်တော့ဘူး။” ဟု ကုန်စုံဆိုင် အမျိုးသမီးတစ်ဦးက သျှမ်းသံတော်ဆင့်ကိုပြောသည်။

ရွာငံမြို့နယ်အတွင်းသို့ တင်သွင်းသည့် ဆန်သည် ရန်ကုန်နှင့် မန္တလေးဒေသဘက်မှ ဆန်များဖြစ်ပြီး ယခုလမ်းများ ပြတ်တောက်နေတာကြောင့် ကုန်ကားများလာရောက်ခြင်းမရှိသည့်အပြင် ဆန်များလည်း ဝင်ရောက်လာခြင်းမရှိကြောင်း ၎င်းအမျိုးသမီးက ဆိုသည်။

ထိုဆန်များပြတ်လပ်လာသည့်အတွက် ပိုက်ဆံရှိသူများသည် ဆန်ကိုဝယ်စုဆောင်းခြင်းပြုလုပ်သဖြင့် နေ့စားလုပ်ကိုင် စားသောက်သူများအတွက် အခက်အခဲများစွာဖြစ်နေသည်။

“ ပိုက်ဆံရှိတဲ့သူကတော့ ဆန်တွေကို ဝယ်စုကြတယ်။ ကျမတို့လို နေ့စားတွေကျတော့ ဆန်တွေကို ဘယ်လိုဝယ်စုနိုင်မှာလဲ။ အလုပ်လည်းမရှိနောက် ဆန်လည်း ပြတ်နေတော့ အငတ်ဘေးဆိုက်နိုင်တယ်” ဟု ရွာငံ ဒေသခံနေ့စားအမျိုးသမီး တစ်ဉီးက သျှမ်းသံတော်ဆင့်ကိုပြောသည်။

ထို့ပြင် လက်ရှိမှာ အိမ်ထဲတွင် ဆန်(၅)ပြည်သာ ကျန်ရှိတော့ကြောင်း၊ ဆန်များ မဝယ်နိုင်သည့်အတွက် ကျန်ရှိနေသည့် ဆန်များကို ပြောင့်ဖူးစေ့နှင့် ရောချက်စားသောက်နေရကြောင်းလည်း ၎င်းက နေ့စားအမျိုးသမီးက ပြောသည်။

“အခုဆို အိမ်မှာ ဆန်( ၅ )ပြည်လောက်ပဲ ကျန်တယ်။ ဆန်ကလည်း ပြည်ကောက်နဲ့ပဲ ဝယ်စားနေရတယ်။ ပိုက်ဆံနည်းနည်းရှိရင် နည်းနည်းဝယ်စား။ မရှိပဲရင် ငတ်နေရုံပဲပေါ့။ အရင်ကလိုမျိုး ပြောင်းဖူးစေ့နဲ့ထမင်း ရောချက်စားရမယ်ထင်တယ်။” ဟု ဒေသခံမျိုးသမီးတစ်ဦးက ပြောသည်။

ရွာငံဒေသခံများသည် လိမ္မော်နှင့် အခြားသောသီးနှံပေါ်သည့် အချိန်မှသာလျှင် ဆန်များကို တစ်နှစ်စာဝယ်ယူစုဆောင်းကြပြီး လိမ္မော်ခြံမရှိသည့် အခြေခံနေ့စားသမားများမှာ တစ်နေ့လုပ် တစ်နေ့ဝယ်စားရတာကြောင့် စုဆောင်းထားမှု မရှိကြပေ။

ယခင်နှစ်များတွင် ရေကြီးမှုမှာ အနည်းငယ်သာရှိခဲ့သော်လည်း ယခုနှစ်များတွင် စံချိန်တင် ရေကြီးမှုကြောင့် လယ်ယာ စပါးများပျက်စီးဆုံးရှုံးခဲ့ရကာ ဆန်ကုန်သည်များမှာလည်း သိုလှောင်ထားမှုအနည်းငယ်သာ ရှိကြောင်းသိရသည်။

“ဒီနှစ်စပါးက သုံးပုံတစ်ပုံ လောက်ပဲ ရတော့မယ်ထင်တယ်။အရင်နှစ်ကစပါးအတော်ရတယ်။ အခုက အမြင့်ပိုင်းဒေသမှာပဲ ကျန်တယ်။ စပါးကလောက်ငှတော့မှာမဟုတ်ဘူး။ “ ဟု ဆန်ကုန်သည်တစ်ဦးက ပြောသည်။

ယခုလက်ရှိ ရွာငံတွင်ဆန်တစ်အိတ်လျှင် မြန်မာကျပ်ငွ ၁သိန်းခွဲမျှဈေးရှိနေပြီး အခြားသောစားသောက်ကုန်များမှာလည်း ကုန်ဈေးနှုန်း အဆမတန်မြင့်တက်လာသည်။

ဆန်အဓိကထွက်သည့် သျှမ်းတောင် ပုံးအင်းဒေသတွင် စပါးဧက ထောင်ပေါင်းများစွာနှစ်မြှုပ်သွားတာကြောင့် ဆန်စပါးပို၍ရှားပါးခက်ခဲလာနိုင်ကြောင်း သိရသည်။

အလုပ်သင် သတင်းထောက် နန်းလရောင်ရေးသားသည်။