ထိုင်းနိုင်ငံ ချင်းမိုင်မြို့သို့ ရောက်ရှိနေသော မြန်မာရွှေ့ပြောင်းအလုပ်သမားများကို ထိုင်းရဲတပ်ဖွဲ့က တင်းကြပ် စစ်ဆေးပြီး အထောက်အထားမရှိသူများကိုဖမ်းဆီးမည်ဟု ထိုင်းအာဏာပိုင်များထံ စုံစမ်းသိရသည်။
ချင်းမိုင်မြို့ရှိ ဈေး၊ စက်ရုံ၊ အလုပ်ရုံနှင့် ဆောက်လုပ်ရေး နေရာများတွင် ဝင်ရောက်စစ်ဆေးပြီး အထောက်အထားမရှိသူများနှင့် အထောက်အထားမပြည့်စုံသူများကို ဖမ်းဆီးသွားမည်ဟု ထိုင်းအာဏာပိုင်အဖွဲ့ဝင် တစ်ဉီးက သျှမ်းသံတော်ဆင့်ကိုပြောသည်။
“အခုလည်းသူတို့စဖမ်းနေပါပြီ။ ဖြစ်နိုင်ရင်တောာ့ အထောက်အထားမရှိ၊ မပြည့်စုံတဲ့သူတွေ သတိထားဖို့လိုပါတယ်။ နောက်လာမယ့်လမှာလည်း သူတို့အတင်းအကြပ် ဖမ်းဆီးသွားမယ်လို့ ပြောတယ်” ဟု ၎င်းကပြောသည်။
ပြီးခဲ့သည့် စက်တင်ဘာလ ၁၉ ရက်တွင်လည်း ချင်းမိုင်မြို့ရှိ ကတ်မိန်းမိုင် အသီးအရွက်ဈေးထဲ၌ အထောက်အထားမရှိ မြန်မာရွှေ့ပြောင်းအလုပ်သမား ၃ ဦးကို ဖမ်းဆီးခဲ့ကြောင်း ချန့်ဖိတ်ထိုင်းရဲတပ်ဖွဲ့က သတင်းထုတ်ပြန်ထားသည်။
ဖမ်းဆီးမိသူများမှာ အသက် ၁၉ နှစ် စိုင်းမြင့်၊ အသက် ၂၃ နှစ် စိုင်းဖတ်နှင့် အသက် ၂၄ နှစ် စိုင်းအောင်သိန်းတို့ ဖြစ်ကြပြီး ၎င်းတို့ကို ဥပဒေအရ စစ်ဆေးမေးမြန်းပြီးပါက နေရပ်ပြန်ပို့မည်ဖြစ်ကြောင်း ထုတ်ပြန်ချက်၌ ဖော်ပြထားသည်။
အလားတူ ဘန်ကောက်မြို့အနီးရှိ နွန်ထဘူရီပြည်နယ်တွင် အွန်လိုင်းမှတစ်ဆင့် ဈေးရောင်းချနေသော မြန်မာနိုင်ငံသားအလုပ်သမား ၁၀ ကို (စက်တင်ဘာ ၅ ရက်)က ဖမ်းဆီးခံရသည်။
ထို့အပြင်ကော့ဖငန်းကျွန်းတွင် အထောက်အထားမဲ့ပြီး ရွှေ့ပြောင်းအလုပ်သမားတွေ လုပ်ပိုင်ခွင့်မရှိသော ဆံပင်ညှပ်သည့်အလုပ်ကို လုပ်ကိုင်နေသည့် မြန်မာနိုင်ငံသား ၁ ဦးကို (စက်တင်ဘာလ ၁၅ ရက်)တွင် ထိုင်းရဲတပ်ဖွဲ့က ဖမ်းဆီးခဲ့သည်။
ဆက်လက်ပြီး ဘန်ကောက်မြို့နှင့် မဲဆောက်မြို့တွင် ဖွင့်လှစ်ထားသော မြန်မာဆိုင်များကို ယခုရက်ပိုင်းအတွင်း ထိုင်းအာဏာပိုင်များက ဝင်ရောက်ဖမ်းဆီးနေသဖြင့် ဆိုင်အချို့ပိတ်ထားရသည်ဟု ဆိုင်ဖွင့်ရောင်းချသူများထံမှ သိရသည်။
” အဖမ်းအဆီးက တော်တော်ကြမ်းလာတယ်။ အွန်လိုင်းပေါ်ရောင်းလည်း ဖမ်းခံရတယ်။ နောက် ဘန်ကောက်မှာ ဆိုင်ဖွင့်တဲ့သူတွေလည်း ဖမ်းခံနေရတယ်။ လက်ရှိတော့ အွန်လိုင်းပေါ်တောင် စျေးမရောင်းရဲသေးဘူး” ဟု ဘန်ကောက်မြို့ နေ အွန်လိုင်းတွင် စျေးရောင်းနေသည့် အမျိုးသမီး တစ်ဉီးက သျှမ်းသံတော်ဆင့်ကိုပြောသည်။
စစ်တပ်အာဏာသိမ်းပြီးနောက်ပိုင်း မြန်မာနိုင်ငံအတွင်း ဖြစ်ပွားနေသော လက်နက်ကိုင် ပဋိက္ခများ၊ စစ်မှုထမ်း ဥပဒေများကြောင့် ပြည်သူအများစုသည် ထိုင်းနိုင်ငံသို့ တရားဝင်လမ်းမှသော်လည်းကောင်း၊ တရားမဝင်လမ်းမှသော်လည်းကောင်း အများအပြားဝင်ရောက်လာကြသဖြင့် ထိုင်းရဲတပ်ဖွဲ့မှ စစ်ဆေးဖမ်းဆီးနေခြင်း ဖြစ်သည်။
ရွှေ့ပြောင်းအလုပ်သမားများအား မနှစ်သက်သည့် ထိုင်းနိုင်ငံအရပ်ဘက်မဟာမိတ် အဖွဲ့ဟုယူဆရသည့် အဖွဲ့အစည်းများကလည်း ရွှေ့ပြောင်းအလုပ်သမားကိစ္စရပ်များနှင့်ပတ်သက်ပြီး ထိုင်းနိုင်ငံအစိုးရ၊ နိုင်ငံခြားရေးဝန်ကြီးဌာကို တောင်းဆိုစာပေးပို့ထားသည်ဟု သတင်းသိရှိရသည်။
