သျှမ်းပြည် မြောက်ပိုင်း မြန်မာ-တရုတ်နယ်စပ် မူဆယ်မြို့တွင် အမည်မသိလက်နက်ကိုင် အဖွဲ့က အမျိုးသားတစ်ဦးကို ပြန်ပေးဆွဲသွားကြောင်း သတင်းရရှိသည်။
ယမန်နေ့ (စက်တင်ဘာလ ၁၇ ရက်) နေ့လည် ၁၁ နာရီခွဲ ကျော်တွင် မူဆယ်မြို့ မင်္ဂလာမူဆယ် အိမ်ယာမှာနေထိုင်သည့် အမျိုးသားတစ်ဉီးကို အမည်မသိလက်နက်ကိုင်အဖွဲ့မှ အမျိုးသား ၃ ဦးက ပြန်ပေးဆွဲကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
” အဲ့အမျိုးသားတစ်ဉီးက မင်္ဂလာမူဆယ် အိမ်ယာမှာနေနေတာ။ အမည်မသိ အမျိုးသား ၃ဦးက ကားနဲ့လာပြီး အဲ့တိုက်ခန်းကို ဝင်သွားတယ်။ ပြီးတော့ ဖမ်းခေါ်သွားတာပဲ” ဟု ၎င်းက ပြောသည်။
မူဆယ်မြို့တွင် ပြည်သူ့စစ်များ၊လက်နက်ကိုင်တပ်ဖွဲ့များပြီး လက်ရှိမှာ မည်သည့်အဖွဲ့မှ ဖမ်းဆီးသွားသည်ကို မသိရှိကြောင်း၊ ထိုကဲ့သို့ မကြာခဏ ပြန်ပေးဆွဲမှုပြုလုပ်လေ့ရှိကြောင်းလည်း မူဆယ် ဒေသခံ အမျိုးသားက ပြောသည်။
” ဒီမှာက မကြခဏဖြစ်တယ်။ ဖမ်းသွားတယ် ပြီးရင် ပိုက်ဆံနဲ့ ပြန်ရွေးခိုင်းတယ်။ ပိုက်ဆံတောင်းတာမပေးရင် သတ်လိုက်တယ်။ ပြည်သူ့စစ်ကလည်း များတော့ ဘယ်သူဆိုတာ မသိဘူး” ဟု ၎င်းက ထပ်လောင်းပြောသည်။
မူဆယ်မြို့နယ်တွင် ပြည်သူများအတွက် လုံခြုံရေး ကင်းမဲ့နေပြီး လက်နက်ကိုင်များ ပေါများနေသည့် အတွက် ဒေသခံများ စိုးရိမ်စရာနေကြောင်း သိရသည်။
မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိသည်
မူဆယ်မြို့သည် တရုတ်နယ်စပ်မြို့ဖြစ်ပြီး လက်ရှိအချိန်ထိ တိုက်ပွဲမဖြစ်ပွားသေးသည့် ဒေသတစ်ခုဖြစ်နေသေးကြောင်း သိရသည်။
