သျှမ်းပြည်နယ်တောင်ပိုင်း၊ ဟိုပုံးမြို့နယ် မဲနယ်တောင်ဒေသတွင် ရေကြီး၊ မြေပြိုမှုကြောင့် နေအိမ်အများပြားပျက်စီးခဲ့ပြီး၊ ထိခိုက်သေဆုံးသူ (၂၀) ဦးခန့်ရှိကြောင်း သိရသည်။

ပြီးခဲ့သည့် (စက်တင်ဘာလ ၁၁ ရက်) နေ့ကစပြီး မဲနယ်တောင်ဒေသဘက်တွင် မိုးသည်းထန်စွာရွာသွန်းပြီး တောင်ကျချောင်းရေကြောင့် ရေကြီး၊ မြေပြိုမှုဖြစ်ကာ စံဖူးကျေးရွာအုပ်စုတွင် နေအိမ်(၈၀)နီးပါးပျက်စီးပြီး သေဆုံးသူ (၁၉)ဦး ရှိကြောင်းသိရသည်။

စံဖူးကျေးရွာအုပ်စုတွင် ကျောက္ကချား၊လုံးဟီ;၊တလျနွိုး၊နောင်စုံ၊ ဗန်းစောက်၊ထမ်းအယ်နှင့် လုဲင်းကင် ဟူ၍ ကျေးရွာ (၇)ရွာရှိသည်။

“ညသန်းခေါင် မှာ ရေက ရုတ်တရက်ကြီးလာတော့ စံဖူးမှာဆို မိသားစု ၆ယောက်လုံးရေထဲ မျောပါသွားပြီးဆုံးသွားတယ်။ အရင်က မိုးကြီးပြီး ချောင်းရေပြည့်တာပဲရှိတာ။ ဒီလောက်ထိ မြေပြို ရေကြီးတဲ့အထိတော့မကြုံဖူးဘူး။ ချောင်းဘေးက အိမ်တွေဆို အကုန်ပါကုန်တယ်။”ဟု စံဖူးဒေသခံတစ်ဦးက ပြောသည်။

ထို့အပြင် တောင်ကျချောင်းရေကြောင့် ရွှံ့မြေ၊ သစ်တုံးနှင့် ကျောက်တုံးများသည် ဒေသခံပြည်သူများ၏ စိုက်ပျိုးမြေများကို ဖုံးလွှမ်းကာ စားဝတ်နေရေးအတွက် လုပ်ကိုင်စားသောက်မရတော့မည်ကို စိုးရိမ်ကြောင်း ၎င်းအမျိုးသားက ထပ်လောင်းပြောသည်။

စငေါဝ်းကျေးရွာအုပ်စုအတွင်းရှိ နမ်းဟူး၊တဖူးကဲင်းလုဲင်းလောင်း၊ ယုတ်ပေ;၊နှင့် ပင်လျမ်း ကျေးရွာဘက်တွင် နေအိမ် ( ၄၀) နီးပါး ပျက်စီးခဲ့ပြီး သေဆုံးသူတစ်ဦးရှိကြောင်း သိရသည်။

ယခုလက်ရှိတွင် မြေပြိုမှုကြောင့် လမ်းများပိတ်ဆို့နေပြီး သွားရေးလာရေးအတွက် ခက်ခဲမှုကြောင့် အလှူရှင်များနှင့် ကယ်ဆယ်ရေးအဖွဲ့များ လာရောက်မှုနည်းပါးကြောင်း သိရသည်။

“လောဆယ်တော့ ကယ်ဆယ်ရေးတွေ သိပ်မရောက်နေသေးဘူး။ မြေပြိုတော့ လမ်းပန်းဆက်သွယ်ရေးလည်း မကောင်းဘူး။” ဟု မဲနယ်တောင် ဒေသခံအမျိုးသမီး တစ်ဦးက ပြောသည်။

ယနေ့ (စက်တင်ဘာ ၁၆)ရက် နံနက်ပိုင်းတွင် ရေကြီးမြေပြိုသည့် မဲနယ်တောင်ကို ဒရုန်းဖြင့် ဓာတ်ပုံလာရိုက်သဖြင့် ဝမ်းသာနေရကြောင်းလည်း ၎င်းအမျိုးသမီးက ဆိုသည်။

လက်ရှိမဲနယ်တောင်ဒေသတွင် စစ်မှုထမ်းဥပဒေထွက်ပြီးနောက်ပိုင်း လူငယ်အများစုမှာ ပြည်ပရောက်ကုန်တာကြောင့် ကျေးရွာများတွင် သက်ကြီးရွယ်အိုများသာ ကျန်တာကြောင့် ပို၍စိတ်ပူကြောင်း ထပ်လောင်းပြောသည်။

မဲနယ်တောင်ဒေသတွင် ကယ်ဆယ်ရေးနှင့် စားနပ်ရိက္ခာအလှူရှင် များစွာလိုအပ်နေကြောင်း သိရသည်။

အလုပ်သင် သတင်းထောက် နန်းလရောင် ရေးသားသည်။