ကရင်နီ (ကယား) ပြည်အတွင်း ကရင်နီအမျိုးသားများကာကွယ်ရေးတပ် KNDF ဆေးဌာနမှ ကြီးမှူးဖွင့်လှစ် ဆေးသင်တန်းတစ်ခုတွင် သင်တန်းသား (၁၈) ဦး ရေထဲသို့ မျောပါပြီး သေဆုံးသွားခဲ့ကြောင်း KNDF ကထုတ်ပြန်သည်။
ဖြစ်စဉ်မှာ စက်တင်ဘာလ ၁၁ ရက်ညနေတွင် ဖြစ်ပွားခဲ့ပြီး ရေချောင်းတစ်ခုကို ဖြတ်ကျော်ရန် ကြိုးစားအားထုတ်ရာတွင် မတော်မဆဖြစ်ပွားခဲ့သည်ဟု ထုတ်ပြန်ချက်တွင် ရေးသားဖော်ပြထားသည်။
“ဆေးသင်တန်းက ဆေးမှူးသင်တန်းတက်နေတဲ့ KNDF၊ PDF၊ Local PDF၊ သျှမ်းတောင်တပ်ရင်းSSRYက ဆေးမှူးတွေရောအပါအဝင်အားလုံး ၁၈ ယောက်ကျဆုံးပါတယ်။ ကျနော်တို့ တပ်ရင်းကတော့ ဆေးမှူးရဲဘော် ၃ ဦးကျဆုံးပါတယ်” ဟု အမည်မဖော်လိုသူ ရဲဘော်တစ်ဦးက သျှမ်းသံတော်ဆင့်ကို ပြောသည်။
ဆေးသင်တန်းသည် ကရင်နီ အမျိုးသားများကာကွယ်ရေးတပ်နှင့် တပ်ပေါင်းစုံတို့၏ လိုအပ်ချက်အရ ကရင်နီပြည်အတွက် လူ့စွမ်းအားအရင်အမြစ်များ ပိုမိုတိုးတက်ကောင်းမွန်ရန် ရည်ရွက်ဖြင့် သင်တန်းကို ဖွင့်လှစ်ခဲ့သည်ဟု ဆိုသည်။
ထိုဖြစ်စဉ်နှင့် ပတ်သက်၍ ကရင်နီအမျိုးသားများကာကွယ်ရေးတပ် KNDF အနေဖြင့် သက်ဆိုင်ရာ မိသားစုဝင်များ၊ တပ်ရင်းတပ်ဖွဲ့များနှင့်အတူ များစွာဝမ်းနည်းကြေကွဲရပါသည်ဟု ထုတ်ပြန်ထားသည်။
ထို့အပြင် ယခုမတော်တဆဖြစ်စဉ်ကို ကရင်နီအမျိုးသားကာကွယ်ရေးတပ် ဗဟိုအနေဖြင့် လိုအပ်သည့် စုံစမ်းစစ်ဆေးမှုများ ပြုလုပ်သွားမည်ဖြစ်ကြောင်း၊ သက်ဆိုင်ရာတပ်ရင်းတပ်ဖွဲ့များနှင့် မိဘပြည်သူများကို ထုတ်ပြန်အသိပေးသွားမည်ဖြစ်ကြောင်း ထုတ်ပြန်ချက်တွင် ရေးသားဖော်ပြထားသည်။
Leave a Comments