ကရင်နီပြည်ရှိ အမှတ် (၂) ထိန်းသိမ်းရေးစခန်းကို စစ်ကော်မရှင်တပ်က လေကြောင်းဖြင့် ဗုံးကြဲတိုက်ခိုက်ခဲ့သဖြင့် အမျိုးသမီး နှင့် ကလေးငယ်အပါအဝင် (၅)ဉီးး သေဆုံးခဲ့ကြောင်း သတင်းရရှိသည်။
ယမန်နေ့ (မတ်လ ၅ ရက်) မနက် ၁၁ နာရီဝန်းကျင် ကရင်နီပြည်ရှိ အမှတ် (၂) ထိန်းသိမ်းရေးစခန်းကို စစ်ကော်မရှင်တပ်က လေကြောင်းဖြင့် ဗုံး (၃) လုံး ကြဲချတိုက်ခိုက်ခဲ့ခြင်းကြောင့် အမျိုးသမီး နှင့် ကလေးငယ်အပါအဝင် (၅) ဉီး သေဆုံးခဲ့ကြောင်း ကရင်နီပြည် ကြားကာလ အုပ်ချုပ်ရေးကောင်စီ (IEC) ၏ အတွင်း ရေးမှူး (၂) ကိုဗညားက သျှမ်းသံတော်ဆင့်ကို ပြောသည်။
“ထိန်းသိမ်းရေးစခန်းကို ဗုံး ၃ လုံးလာကြဲသွားတယ်။ ထိန်းသိမ်းထားတဲ့ စစ်ကောင်စီ မိသားစုဝင် ၅ ဦးပွဲချင်းပြီးသေဆုံးပြီးတော့ ၄ ဦးထိခိုက်ဒဏ်ရာရခဲ့ပါတယ်။ ဖားဆောင်းတပ်မှာ သိမ်းလို့ရပြီး ဖမ်းဆီးထိန်းသိမ်းထားတဲ့ တပ်မိသားစုဝင်တွေဖြစ်ပါတယ်။”ဟု ၎င်းက ဆိုသည်။
ထိုသို့ ဗုံးကြဲတိုက်ခိုက်မှုကြောင့် ၈ နှစ်အရွယ်ကလေးတစ်ဦး၊အမျိုးသားတစ်ဦး နှင့် အမျိုးသမီး ၃ ဦး ပွဲချင်းပြီးသေဆုံးခဲ့သည်။
ပြီးခဲ့သည့် (ဇန်နဝါရီ ၁၈ ရက်) ကရင်နီပြည် မယ်စဲ့မြို့နယ် အမှတ် (၂) ထိန်းသိမ်းရေးစခန်းမှ စစ်သုံ့ပန်း ၇၆ ဦး၊ ထောင်ဝန်ထမ်း ၂ ဦး နှင့် ပြစ်ဒဏ်ကျခံနေရသူ ၅ ဦး စုစုပေါင်း ၈၃ ဦးတို့သည် လက်နက် ၅ လက်ဖြင့် ထောင်ဖောက် ထွက်ပြေးသွားခဲ့သည်။
Leave a Comments