သျှမ်း-ကယားနယ်စပ်၊ မိုးဗြဲမြို့ အနီးနှင့် ဘီလူးချောင်း အရှေ့ဘက်ကမ်းတွင် တွင် စစ်ကော်မရှင်က ရွေးကောက်ပွဲကျင်းပနိုင်ရေး နယ်မြေပြန်လည်စိုးမိုးနိုင်ရန် ထိုးစစ်ဆင်နေကြောင်း စုံစမ်း သိရှိရသည်။

ပြီးခဲ့သည့် ဩဂုတ်လ ပထမပတ်မှ စပြီး စစ်ကော်မရှင် တပ်သားများသည် မိုးဗြဲမြို့ အရှေ့ခြမ်း၊ ဖယ်ခုံအရှေ့ဘက်ခြမ်းနှင့် ဘီလူးချောင်း အရှေ့ခြမ်းဘက်သို့ ခပ်စိပ်စိပ် စစ်ကြောင်း ထိုးလာနေကြောင်း KNDFတပ်ဖွဲ့ ဝင်တစ်ဦးက ပြောသည်။

“ဒီလတော့ ထိုးစစ်တော်တော်များလာတယ်။ ပြည်သူတွေ အနေနဲ့ လည်း မလုံခြုံတော့ဘူးလေ။ စစ်တပ်က သူတို့သိမ်းထားတဲ့ နယ်မြေတွေမှာ ပြည်သူတွေကို ပြန်ခေါ်နေတာ။ဖယ်ခုံမှာလည်း ပြန်ခေါ်နေတယ်။ အဓိကတော့ သူတို့ရွေးကောက်ပွဲကျင်းပနိုင်ဖို့ နယ်မြေတွေ ပြန်လည် စိုးမိုးနိုင်ဖို့ ထိုးစစ်ဆင်လာတယ်လို့ မြင်တယ်။”ဟု KNDFတပ်ဖွဲ့ဝင် အမျိုးသားတစ်ဦးက ပြောသည်။

ထို့အပြင် KNDFတပ်ရင်းများမှာလည်း ဘီလူးချောင်းအရှေ့ဘက်ခြမ်းရှိ ပြည်သူများကို ယနေ့ (ဩဂုတ်လ ၁၉ )ရက်မှ သြဂုတ် ၂၁ ရက်အထိ သုံးရက်အတွင်း ဘီလူးချောင်းအနောက်ဘက်ကမ်းသို့ ဖြစ်စေ အခြား ဘေးလွတ်ရာသို့ ဖြစ်စေ အပြီးပြောင်းရွှေ့ကြရန် ထုတ်ပြန်လာသည်။

ထိုသို့ ပြောင်းရွှေ့ခိုင်းရသည် စစ်ကော်မရှင်တပ်သားများက မိုးဗြဲမြို့အနီးနှင့် ဘီလူးချောင်း အရှေ့ဘက်ကမ်းကို စစ်ကြောင်းထိုးနေသောကြောင့် ပြည်သူများ ဘေးအန္တရာယ်ကင်းရှင်းစေရန် ပြောင်းရွှေ့ခိုင်းကြောင်း KNDF တပ်ဖွဲ့ဝင် တပ်သားတစ်ဦးက ပြောသည်။

“စစ်တပ်က စစ်ကြောင်းထိုးနေတာ မိုးဗြဲအနောက်ခြမ်းရော ဘီလူးချောင်း အရှေ့ခြမ်းကိုရောပဲ။အဲဖက်က ရွာပေါင်း ၂၀ နီးပါးရှိမယ်။ အဲဒါအကုန်ရွှေ့ခိုင်းတာ။ဖယ်ခုံအရှေ့ဘက်ခြမ်း တကြောနဲ့ ဒီမော့ဆို့ အရှေ့ခြမ်း လည်း စစ်တပ်က အကုန်နေရာယူသွားပြီ။ သူတို့ စစ်ကြောင်းထိုးချိန် စစ်ဖြစ်ရင် ပြည်သူတွေ ရှောင်ဖို့ မလွယ်မှာစိုးလို့ ပြောင်းရွှေ့ခိုင်းတဲ့ သဘောပါ။” ဟု အဆိုပါ တပ်သားတစ်ဦးက ပြောသည်။

ဆက်လက်ပြီး ဘီလူးချောင်း အရှေ့ဘက်ကမ်းရှိ ပြည်သူများကို သီးနှံရိတ်သိမ်းရန် ကျန်ရှိနေသော လုပ်ငန်းများသို့ မနက် ၆ နာရီမှ ညနေ ၆ နာရီအထိသာ သွားလာကြရန် ဖော်ပြထားပြီး လုံခြုံရေးယူပေးနေသော ရဲဘော်များကို အနှောက်ယှက်ဖြစ်စေသည့် ညအချိန်မတော် ဓာတ်မီးထွန်းခြင်း ဆူပူသောင်းကျန်းခြင်းများ အော်ဟစ်ဆဲဆိုခြင်းများ မပြုလုပ်ကြရန် KNDFက ထည့်သွင်းဖော်ပြထားသည်။

အဆိုပါ စည်းကမ်းများကို လိုက်နာဆောင်ရွက်ခြင်းမရှိလျှင် ထိရောက်စွာအရေးယူသွားမည်ဖြစ်ကြောင်း ဖော်ပြထားသည်။

ပြီးခဲ့သည့် ဇူလိုင်လ လယ်ပိုင်းတွင် ဘီလူးချောင်း အရှေ့ကမ်းရှိ ပြည်သူများ၊ ဒီမော့ဆို အရှေ့ခြမ်းမှ စစ်ရှောင်များးကို ဘေးလွတ်ရာသို့ ကူညီ ပြောင်းရွှေ့ပေးထားပြီး ယခုကျန်ရှိနေသည်မှာ သီးနှံရိတ်သိမ်းရန် ကျန်ခဲ့သည့် အချို့သော စစ်ရှောင်များသာ ဖြစ်ကြောင်း သိရသည်။

“ဇူလိုင်လ တုန်းက ကယ်ထုတ်ပေးသေးတယ်။ အဲတုန်းက တစ်ထောင်ကျော်တယ်။ ကျန်တဲ့သူက သူတို့က သီးနှံရိတ်သိမ်း ဖို့လိုလို့ ကျန်နေခဲ့ကြတာ။ အခုနေ ပြောင်းတဲ့ သူက ပြောင်းဆို စစ်ရှောင်ပဲ သုံးထောင်လောက်ရှိမယ်။ ဘီလူးချောင်း အနောက်ဘက်ကမ်း ကို ပြောင်းခိုင်းထားတယ်။” ဟု အသက် ၃၀အရွယ်ရှိ အမျိုးသားတစ်ဦးက ပြောသည်။

ပြီးခဲ့သည့် ဩဂုတ်လ ၁၇ ရက်နေ့တွင် ကရင်နီ (ကယား)ပြည် မော်ချီးဒေသကို စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ခဲ့ရာ အရပ်သား ပြည်သူ (၃၂)ဦး သေဆုံးပြီး (၅)ဦး ထိခိုက်ဒဏ်ရာ ရရှိခဲ့ကြောင်း သိရသည်။