သျှမ်းပြည်မြောက်ပိုင်း သီပေါမြို့နှင့် တစ်မိုင်လောက်ဝေးသည့် လှိုဏ်ဂူအတွင်းသို့ စစ်ဘေးရှောင်နေသည့် ပြည်သူများ စားနပ်ရိက္ခာ အရေးပေါ်လိုအပ်နေကြောင်း စုံစမ်းသိရသည်။
ထိုလှိုဏ်ဂူအတွင်းသို့ စစ်ဘေးရှောင်နေသည့် သူများသည် တစ်ထောင်ဝန်းကျင်ရှိသည့်အတွက် ပရဟိတ အဖွဲ့များက သွားရောက်လှူဒါန်းခဲ့သော်လည်း လောက်ငှခြင်းမရှိကြောင်း၊ စစ်ကောင်စီမှ နေ့စဉ်လေယာဉ်ဖြင့် ပျံဝဲနေသဖြင့် နေရပ်ပြန်ကာ စားနပ်ရိက္ခာ မယူနိုင်ကြောင်းလည်း စစ်ဘေးရှောင်နေသည့် အမျိုးသမီး တစ်ဉီးက သျှမ်းသံတော်ဆင့်ကိုပြောသည်။
“ စစ်ရှောင်တွေအရမ်းများတော့ စားသောက်ဖို့က မလောက်ကြဘူး။ ပရဟိတအဖွဲ့တွေလည်း သွားရောက်လှူဒါန်းပေးကြတယ် တက်နိုင်တဲ့ဘက်ကနေ။ စစ်ကောင်စီက လေယာဉ်တွေ နေ့တိုင်းပျံဝဲနေတော့ နေရပ်ကို ဘယ်သူမှ ပြန်မလာရဲကြဘူး” ဟု ၎င်းကပြောသည်။
ထို့ပြင် သီပေါမြို့တွင်းကျန်ရှိနေသည့် ပြည်သူများလည်း နေအိမ်အပြင်မထွက်ရဲကြပေ။
သီပေါမြို့သည် လက်ရှိအချိန်ထိ ဖုန်းလိုင်း ပြတ်တောက်ခံနေရသေးပြီး၊ တိုင်းရင်းသားလက်နက်ကိုင်တပ်ဖွဲ့ ဖြစ်သည့် TNLA ထိန်းချုပ်ထားသည့် ဒေသဖြစ်သောကြောင့် စစ်ကောင်စီအနေဖြင့် အချိန်တိုင်း လေကြောင်းဖြင့် ပြန်လည်တိုက်ခံရမည်ကို စိုးရိမ်နေကြကြောင်း ဒေသခံများက ပြောဆိုသည်။
” အခုဆိုရင် လက်နက်ကိုင်ထိန်းချုပ်တဲ့နေရာတွေကို စစ်ကောင်စီက လေကြောင်းနဲ့ဗုံးကြဲတော့ ကျနော်တို့လည်း စိုးရိမ်နေရတာပေါ့။ ညဆိုရင်လည်း ကောင်းကောင်းမအိပ်ရဘူး” ဟု ဒေသခံအမျိုးသားတစ်ဉီးက ဆိုသည်။
သီပေါမြို့အခြေစိုက် စစ်ကောင်စီ ခြေလျင်တပ်ရင်း ခလရ-(၂၃)၊ ခြေမြန်တပ်ရင်း ခမရ-(၅၀၃၊ ၅၀၄) တို့ကို TNLA က ဩဂုတ်လ (၁၀) ရက်မှ စတင်ထိုးစစ်ဆင် တိုက်ခိုက်ခဲ့ပြီး သီပေါမြို့ပေါ်ကို TNLA မှ ထိန်းချုပ်ထားနိုင်ခဲ့သည်။
ထို့နောက် စစ်ကောင်စီတပ်နှင့် TNLA ပူးပေါင်းတပ်ဖွဲ့တို့အကြား တိုက်ပွဲပြန်လည် ပြင်းထန်လာခဲ့သည့် တစ်ပတ်အတွင်း လက်နက်ကြီးနှင့် လေကြောင်းဗုံးကြဲခံရခြင်းကြောင့် အရပ်သား (၂၀) ဦးကျော် သေဆုံးပြီး မြို့လူဦးရေ ထက်ဝက်ကျော်မှာ ထွက်ပြေးတိမ်းရှောင်နေရကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments