သျှမ်းပြည် မူဆယ်မြို့နယ်အတွင်း ပန်ဆိုင်း(ကြူကုတ်)မြို့ရှိ အထက စာသင်ကျောင်းကို လေကြောင်းအန္တရာယ် စိုးရိမ်မှုကြောင့် ကိုးကန့်တပ်ဖွဲ့ MNDAA က ကျောင်း (၂) ရက် ပိတ်ထားခိုင်းကြောင်း စုံစမ်းသိရသည်။
ယမန်နေ့ (စက်တင်ဘာ ၉ ရက်) မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် ပန်ဆိုင်း(ကြူကုတ်)မြို့ရှိ အထက စာသင်ကျောင်းကို စစ်ကောင်စီတပ်မှ လေကြောင်းဗုံးကြဲ တိုက်ခိုက်မှု လုပ်ဆောင်လာနိုင်ခြင်းကြောင့် (၂) ရက်တာ ကျောင်းပိတ်ထားရန် MNDAA မှ ညွှန်ကြားထားကြောင်း ပန်ဆိုင်းဒေသခံများက ပြောသည်။
“ကျောင်းကတော့ နှစ်ရက်ပိတ်ထားမယ်ဆိုတာ ဟုတ်တယ် ကိုးကန့်စစ်သားတွေ လာပြောထားတာ။ မနေ့ကတော့ စိုးရိမ်ရလို့ ဈေးဆိုင်တွေလည်း ပိတ်ကြတယ်၊ ဒီနေ့တော့ ပြန်ဖွင့်ပါပြီ။ မနေ့နဲ့ ဒီနေ့ နှစ်ရက်ပိတ်မယ် ပြောထားတော့ ပြန်ဖွင့် မဖွင့်တော့ မသိသေးဘူး။ အရင်ကလည်း မြန်မာကျောင်းကတော့ အထက တစ်ကျောင်းပဲ ပြန်ဖွင့်တယ်”ဟု ပန်ဆိုင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပန်ဆိုင်း(ကြူကုတ်)မြို့ကို ကိုးကန့်တပ်ဖွဲ့ MNDAA ထိန်းချုပ်ပြီးနောက် ဇွန်လမှ စတင်၍ အထကကျောင်းကို CDM ဆရာ/မ များဖြင့် ပြန်လည်ဖွင့်လှစ်ခဲ့ရာ ကျောင်းသားကျောင်းသူ (၈၀၀) ကျော် တက်ရောက်နေကြောင်း သိရသည်။
ယခင်က ပန်ဆိုင်းမြို့ ပတ်ပတ်လည်ရှိ လွမ်အင်၊ ကျိန်းယန်း၊ မန့်ခုံလုံ၊ မန့်ခုံကန်၊ နမ့်ဟူး စသည့် ကျေးရွာများတွင် မူလတန်းကျောင်း ရှိသော်လည်း လုံခြုံရေး အခြေအနေအရ ပြန်လည်ဖွင့်လှစ်နိုင်ခြင်း မရှိဘဲ ပန်ဆိုင်း အထကကျောင်း၌သာ လာရောက်သင်ကြားရကြောင်း ဒေသခံများက ပြောသည်။
“လေယာဉ်နဲ့ ဗုံးလာကြဲမှာ နမ့်ခမ်းလို ဖြစ်မှာလည်း နေ့တိုင်းစိတ်ပူရတယ်။ နံရံကပ်အိမ်ဆိုရင်တော့ ဗုံးခိုကျင်း တူးထားရတယ်၊ လေယာဉ်သံ ကြားတာနဲ့ ပြေးပုန်းဖို့။ မတတ်နိုင်တဲ့ အိမ်တွေကတော့ စုပြီးတော့ စစ်ဘေးရှောင်တဲ့နေရာ လုပ်နေကြတယ်”ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် စက်တင်ဘာလ ၃ ရက်တွင် စစ်ခေါင်းဆောင် မင်းအောင်လှိုင်သည် သျှမ်းပြည်တောင်ပိုင်း တောင်ကြီးမြို့သို့ ရောက်ရှိလာပြီးနောက် ဆုံးရှုံးလိုက်ရသည့် နယ်မြေဒေသများကို တန်ပြန်ထိုးစစ်ဆင်မှု ပြုလုပ်မည်ဟု ပြောဆိုခဲ့သည်။
၎င်းနောက် “၁၀၂၇ စစ်ဆင်ရေး”အတွင်း ညီနောင်မဟာမိတ်တပ်များ သိမ်းပိုက်ထိန်းချုပ်ထားသည့် နယ်မြေများမှ စာသင်ကျောင်း၊ ဈေး အစရှိသည့် အများပြည်သူနေရာများသို့ စစ်ကောင်စီတပ်မှ လေကြောင်းထိုးစစ်ဆင် တိုက်ခိုက်မှု ဆက်တိုက်ပြုလုပ်လာသည်။
စက်တင်ဘာလ ပထမပတ်အတွင်း စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုကြောင့် မန်တုံ၊ နမ့်ခမ်း၊ နောင်ချို၊ သီပေါနှင့် လားရှိုးမြို့များတွင် အရပ်သား ဆယ်နှင့်ချီ သေဆုံးမှု ဖြစ်ခဲ့သည်အထိ ပြင်းထန်လာနေသည်။
Leave a Comments