သျှမ်းပြည် တောင်ပိုင်း၊ ကျောက်ဂူဘက်မှ နောင်ချိုမြို့နယ်၊ တောင်ခမ်း တိုက်ပွဲသို့ စစ်ကူပို့သည့် စစ်တပ်ယာဉ်တန်းကို ယနေ့ (စက်တင်ဘာလ ၇ ရက်) နံနက်ပိုင်းက ကြားဖြတ်တိုက်ခိုက်ရာ စစ်ကားတစ်စီး လုံးဝ ပျက်စီးသွားသည်ဟု စစ်ရေးသတင်းရင်းမြစ်က ယနေ့ ပြောသည်။

ရပ်စောက်မှ ထွက်ခွာလာသည့် စစ်ကား ၁၀ စီးပါ အဆိုပါ စစ်ယာဥ်တန်းကို တော်လှန်ရေး ပူးပေါ်းတပ်က ကျောက်ဂူ-တောင်ခမ်းလမ်း တနေရာတွင် RPG ကဲ့သို့သော လက်နက်ကြီးဖြင့် ပစ်ခတ်ရာ စစ်ကားတစီး လုံးဝ ပျက်စီးသွားပြီး ကားပေါ်ပါ စစ်သား အားလုံးသေဆုံးသည်ဟု ယူဆရကြောင်း သတင်းရင်းမြစ်က ဆိုသည်။

“၁၀ စီးတက်လာတာ တစီးကတော့ တည့်တည့်ထိလို့ လုံးဝ အပြုတ်ပဲ။ လက်နက်တွေဘာတွေတော့ ကောက်လို့မရဘူးပေါ့။ ကျန်တဲ့ ၉ စီးကတော့ ဆက်တက်သွားတယ်။ တောင်ခမ်း ရောက်မရောက်ကတော့ စောင့်ကြည့်ရမှာပေါ့” ဟု ၎င်းကရှင်းပြသည်။

အဆိုပါ စစ်ကူ ယာဉ်တန်းတွင် စစ်သင်တန်းဆင်း တပ်သားသစ် အများအပြား ပါဝင်နေသည်ဟု သတင်းကြားရကြောင်း ဆိုသည်။

စစ်ကောင်စီ၏ အမှတ် (၉၀၂) အမြောက်စခန်း ကွပ်ကဲမှုဌာနချုပ်၊ အမြောက်တပ်ရင်း (၃၅၄)၊ (၂၀၆) နှင့် (၄၀၆) တို့ တည်ရှိရာ တောင်ခမ်းဒေသတွင် တိုက်ပွဲများ ပြင်းထန်နေသည်မှာ တလနီးပါး ကြာမြင့်နေပြီဖြစ်သည်။

အမြောက်တပ် အမတ (၂၀၆) နှင့် (၄၀၆) တို့ကို သိမ်းပိုက်ထားသည်ဟု ဩဂုတ်လ ၂၆ ရက်နေ့တွေ TNLA က ထုတ်ပြန်ထားပြီး အမြောက်စခန်းကွပ်ကဲမှုဌာနချုပ် (၉၀၂) နှင့် အမြောက်တပ်ရင်း (၃၅၄) တို့တွင် ယနေ့အထိ တိုက်ပွဲများ ပြင်းထန်နေထဲ ဖြစ်သည်။

အဆိုပါ တောင်ခမ်း တိုက်ပွဲနှင့် ပတ်သက်သည်​့ ရုပ်သံမှတ်တမ်းကို ပြီးခဲ့သည့် စက်တင်ဘာလ ၄ ရက်နေ့က TNLA ထုတ်ပြန်ခဲ့ရာ စစ်သား ရုပ်အလောင်း အများအပြားနှင့် လက်နက်ခဲယမ်းများကို ရုပ်သံတွင် တွေ့ရသည်။

ထို့အတူ ရပ်စောက်မြို့နယ်၊ ကျောက်ဂူ ရဲစခန်းခန်း အနီးတွင်လည်း ယမန်နေ့ နံနက် ၅ နာရီမှစတင် တိုက်ပွဲများ ဖြစ်ပွားခဲ့ကြောင်း ဓနုပြည်သူ့လွတ်မြောက်ရေးတပ်တော်(DPLA) က ထုတ်ပြန်ထားသည်။