တိုင်းရင်းသားလက်နက်ကိုင်အချို့ ထိန်းချုပ်ထားသော နယ်မြေဒေသကို တန်ပြန်ထိုးစစ်ဆင်မည်ဟု ကြုံးဝါးပြီးနောက် စစ်ခေါင်းဆောင် မင်းအောင်လှိုင်သည် တိုင်းဌာနချုပ်အသီးသီးရှိ အောက်ခြေစစ်သည်များကို အားပေး၊ စည်းရုံး နေသည်။

နိုင်ငံအနှံ့ ဖြစ်ပွားနေသည့် တိုက်ပွဲများတွင် ရှုံးနိမ့်မှုနှင့် နယ်မြေဆုံးရှုံးမှု ရင်ဆိုင်နေရသည့် စစ်ကောင်စီသည် ယခုသီတင်းပတ် နှစ်ပတ်အတွင်း စစ်တိုင်းနှင့် စစ်ဌာနချုပ်များကို ဆက်တိုက်သွားရောက်နေခြင်း ဖြစ်သည်။

ယမန်နေ့ (စက်တင်ဘာလ ၄ ) ရက်နေ့တွင် ဆီဆိုင်မြို့နှင့် လွိုင်ကော်မြို့ရှိ ဒေသကွပ်ကွဲမှု စစ်ဌာနချုပ် (ဒကစ) ကို ထပ်မံသွားရောက်ခဲ့သည်ဟု စစ်ကောင်စီထုတ် မြန်မာ့အလင်းသတင်းစာမှာ ဖော်ပြထားသည်။

ဆီဆိုင်မြို့သို့ သွားရောက်ခဲ့စဉ်တွင် “ အစဉ်အဆက် တည်ငြိမ်းအေးချမ်း၍ ရိုးသားအေးချမ်းစွာနေထိုင်ခဲ့သော ပအိုဝ်းတိုင်းရင်းသားတို့၏ ဆီဆိုင်ဒေသသည် PNLO အကြမ်းဖက်အဖွဲ့၏ အခွင့်အလမ်းတစ်ခုကို မျှော်မှန်းပြီး ဆောက်ရွက်သည့် မိုက်မဲ့သည့်အကြမ်းဖက် လုပ်ရပ်ကြောင့် ယခုကဲ့သို့ ထိခိုက်ပျက်စီးမှုများ ဖြစ်ပေါ်ခဲ့ရကြောင်း”ဆိုပြီး စစ်ခေါင်းဆောင် မင်းအောင်လှိုင်က စွပ်စွဲပြောဆိုခဲ့သည်။

အလားတူ လွိုင်ကောက်မြို့သို့ သွားရောက်ခဲ့စဉ်မှာလည်း လွိုင်ကော်ဒေသအတွင်း KNDF အဖွဲ့နှင့် PDF တို့ တိုက်ခိုက်မှုများကြောင့် လွိုင်ကောက်မြို့ အပါအဝင် မြို့ရွာများကို ထိခိုက်ပျက်စီးခဲ့ရကြောင်း သူက ပြောဆိုထားသည်။

ပြီးခဲ့သည့် စက်တင်ဘာလ ၃ ရက်နေ့က စစ်ခေါင်းဆောင် မင်းအောင်လှိုင်သည် တောင်ကြီးမြို့အခြေစိုက် အရှေ့ပိုင်းတိုင်း စစ်ဌာနချုပ်သို့ သွားရောက်ခဲ့ပြီး လက်နက်ကိုင်အဖွဲ့များ၏ သတင်းရရှိမှုနှင့် အခြေအနေ အရပ်ရပ်ပေါ်မူတည်၍ လိုအပ်သလို တုန့်ပြန်ဆောက်ရွက်သွားမည်ဟု ပြောဆိုခဲ့သည်။

ထိုသို့ ပြောဆိုခဲ့ပြီးသည့်နောက် တောင်ကြီးမြို့ကို လူအင်အားဖြင့်သော်လည်းကောင်း၊ လက်နက်အင်အားဖြင့် သော်လည်းကောင်း အေးသာယာ (မြို့သစ်) မှ တောင်ကြီးမြို့ပေါ်သို့ စစ်အင်အားဖြည့်တင်းခဲ့ကြောင်းသိရသည်။

သြဂုတ် ၂၃ ရက်နေ့မှစတင်ကာ စစ်ခေါင်းအောင် မင်းအောင်လှိုင်သည် ပဲခူးရှိ တောင်ပိုင်းတိုင်း စစ်ဌာနချုပ်၊ မန္တလေးရှိ အလယ်ပိုင်းတိုင်း စစ်ဌာနချုပ်နှင့် ရန်ကုန်ရှိ မှော်ဘီလေတပ်ဌာနချုပ်အပြင် တောင်ကြီးရှိ အရှေ့ပိုင်းတိုင်း စစ်ဌာနချုပ်ကို သွားရောက်ခဲ့ပြီး ဖြစ်သည်။