သျှမ်းပြည် တောင်ကြီးမြို့သို့ စစ်ခေါင်းဆောင် မင်းအောင်လှိုင် ရောက်ရှိလာပြီးနောက် စစ်အင်အား ထပ်မံဖြည့်တင်းနေကြောင်း စုံစမ်းသိရသည်။

ယမန်နေ့ (စက်တင်ဘာလ ၃ ရက်) နံနက်ပိုင်းတွင် တောင်ကြီးမြို့အခြေစိုက် အရှေ့ပိုင်း တိုင်းစစ်ဌာနချုပ်သို့ စစ်ခေါင်းဆောင် မင်းအောင်လှိုင် ရောက်ရှိလာပြီး နယ်မြေ မငြိမ်မသက်မှုများ မဖြစ်စေရေး ဆောင်ရွက်ရန် မှာကြားပြီးနောက် စစ်အင်အား ဆက်တိုက်ဖြည့်တင်းနေကြောင်း ဒေသခံများက ပြောသည်။

“တိုင်းရုံးထဲကို ညောင်ရွှေဘက်က လာတဲ့ ကားတန်းကော၊ ရဟတ်ယာဉ်နဲ့ကော အင်အားဖြည့်နေတာ။ ကားတန်းက တောင်အောက် မြို့သစ်ကနေ တက်လာတာ လူကော ရိက္ခာကော တင်လာတာ။ မိုးကာအုပ်ထားတဲ့ ကားနောက်ထဲမှာ စိန်ပြောင်းတို့ ငှက်ပျောဖူးတို့ ထည့်ထားတဲ့ သေတ္တာမြင်နေရတယ်”ဟု တောင်ကြီးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် စက်တင်ဘာလ ၂ ရက်က သျှမ်းပြည်မြောက်ပိုင်းနှင့် ရခိုင်တွင် စစ်ကောင်စီတပ်ကို တော်လှန်နေသည့် ညီနောင်မဟာမိတ် ၃ ဖွဲ့ကို အကြမ်းဖက်အုပ်စုအဖြစ် ကြေညာပြီး နောက်တစ်ရက်တွင် စစ်ခေါင်းဆောင် မင်းအောင်လှိုင် တောင်ကြီးမြို့သို့ ရောက်ရှိလာခြင်း ဖြစ်သည်။

စစ်ခေါင်းဆောင် မင်းအောင်လှိုင်သည် တောင်ကြီးမြို့သို့ ရောက်ရှိနေစဉ် လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူနိုင်ရန် လုံခြုံရေးပိုင်းဆိုင်ရာ ဝိုင်းဝန်းဆောင်ရွက်ရန်၊ အခြားနယ်မြေဒေသ လုံခြုံရေးနှင့် တည်ငြိမ်အေးချမ်းရေးကို ဆောင်ရွက်ရန်လိုကြောင်း ထုတ်ပြန်ထားသည်။

သျှမ်းပြည်တောင်ပိုင်းရှိ ပအိုဝ်းကိုယ်ပိုင်အုပ်ချုပ်ခွင့်ရ ဒေသတွင်လည်း နယ်မြေ မငြိမ်မသက်မှုများ မဖြစ်စေရေး ဆောင်ရွက်သွားရန် လိုအပ်ကြောင်း ပြောကြားခဲ့သည်ဟု သိရသည်။

ထို့အပြင် စစ်ခေါင်းဆောင် မင်းအောင်လှိုင် သည် အောင်ပန်းမြို့ရှိ စစ်ဆေးရုံသို့ ရဟတ်ယာဉ်ဖြင့် ဆက်လက်သွားရောက်ခဲ့ကြောင်း သိရပြီး ၎င်းခရီးစဉ် မတိုင်မီ လုံခြုံရေးအကြောင်းပြချက်ဖြင့် ရပ်ကွက်အတွင်း အလှည့်ကျ ကင်းလှည့်ရန် လူစုပေးရကြောင်း ဒေသခံများက ပြောသည်။

ယင်းမတိုင်မီ ရက်ပိုင်းအတွင်းက သျှမ်းပြည်မြို့တော် တောင်ကြီးမြို့သို့ တိုင်းရင်းသားတပ်များ ဦးတည်ချီတက်နေသည် ဆိုသည့် သတင်းများ ထွက်ပေါ်ခဲ့သဖြင့် မြို့ပေါ်တိုက်ပွဲများ ဖြစ်ပွားမည်ကို ဒေသခံများ စိုးရိမ်မှုဖြစ်ပြီးနောက် စစ်ခေါင်းဆောင် မင်းအောင်လှိုင် တောင်ကြီးမြို့သို့ ရောက်လာခဲ့သည်။

လက်ရှိတွင် တောင်ကြီးမြို့နှင့် အနီးတဝိုက် တည်ငြိမ်နေသော်လည်း ရပ်စောက်-ကျောက်ဂူဘက်တွင် တိုက်ပွဲဖြစ်ပွားမှု ရှိနေသကဲ့သို့ ဆီဆိုင်မြို့နယ်တွင်လည်း တိုက်ပွဲများ ဖြစ်ပွားနေသည်။