သျှမ်းပြည်တောင်ပိုင်း၊ ညောင်ရွှေမြို့နယ် စံကားဒေသ၊ ဘန့်ပြင်ကျေးရွာအုပ်စု လွယ်လုံကျေးရွာအတွင်းတွင် ပအိုဝ်းပြည်သူ့စစ်(PNO)မှ တစ်ဖက်သတ်ပစ်ခတ်နေပြီး အရပ်သားနေအိမ်ကို မီးရှို့နေကြောင်း စုံစမ်းသိရသည်။ 

ယမန်နေ့ (စက်တင်ဘာလ ၂ ရက်) နေ့လည် ၂ နာရီအချိန်မှ စပြီး PNO တပ်ဖွဲ့မှ လွယ်လုံကျေးရွာအတွင်းတွင် တစ်ဖက်သတ်ဝင်ရောက် ပစ်ခတ်ခဲ့ရာ ကျေးရွာရှိ နေအိမ်များမီးလောင်ပျက်စီးနေကြောင်း  ကျေးရွာဒေသခံ အမျိုးသားတစ်ဦးက ပြောသည်။ 

‘’ မနေ့က နေ့လည် ၂ နာရီမှာ PNO တပ်ဖွဲ့က ရွာထဲဝင်ပြီး ပစ်ခတ်တယ်။ သူတို့တစ်ဘက်ပဲပစ်နေတယ်။ အခုဆိုနေအိမ်မီးလောင်တာတွေ အများကြီးပဲ ‘’ဟု ၎င်းကပြောသည်။ 

PNOတပ်ဖွဲ့သည်လွန်ခဲ့သည့် (ဩဂုတ်လ) တွင်ကတည်းက ရွာထဲဝင်ရောက်ခြိမ်းခြောက်ခြင်းရှိပြီး ဒေသခံများ ထိတ်လန့်မှုဖြစ်နေကြောင်း ထိုအချိန်ကတည်းက အချို့ ဒေသခံများသည် စစ်ဘေးကြိုတင်ရှောင်နေကြောင်း ဒေသခံ အမျိူးသမီးတစ်ဦးက သျှမ်းသံတော်ဆင့်ကို ပြောသည်။ 

‘’ အရင်လ ကတည်းက သူတို့လာပြီးခြိမ်းခြောက်တာရှိတယ်။ အဲ့ကတည်းက ရွာက လူတွေကြောက် ကြပြီလေ။ကြိုတင်စစ်ရှောင်တဲ့သူလည်းရှိတယ်။ အခုဆို တစ်ရွာလုံးရှောင်ကြပြီ ဘယ်သူမှမနေရဲ တော့ဘူး‘’ ဟု ၎င်းကပြောသည်။

ထို့အပြင် PNOတပ်ဖွဲ့မှ တစ်ဖက်သတ် သေနတ်ဖြင့် ပစ်ခတ်မှုကြောင့် အနီးတစ်ဝိုက်ရှိ ပြည်သူများ ထိတ်လန့်ကြပြီး သေနတ်ကျည်လာထိမှန်မည်ကို စိုးရိမ်နေရကြောင်း သိရသည်။ 

လွန်ခဲ့သည့်ဇူလိုင် ၂၁ရက်တွင် PNO တပ်ဖွဲ့က ဦးမောင်ဆောင်ကို ပြည်သူ့ကာကွယ်ရေးတပ်ဖွဲ့ PDF နှင့် ပတ်သက်သည်ဆိုပြီး ရိုက်နှက်ကာ ဖမ်းဆီးခဲ့ရာ စစ်ကြောရေးတွင်လည်း ထပ်မံနှိပ်စက်ခံရသဖြင့် သြဂုုတ်လနောက်ဆုံးပတ်တွင် သေဆုံးသွားကြောင်း မိသားစုဝင်များကို အကြောင်းကြားလာသည်။ 

ရွာသားများကို ဖမ်းဆီးသွားသည့် အချိန်လည်း ရွာသားဆိုင်ကယ်၂၈စီး ကိုပါ သိမ်းဆည်းသွားပြီး ၂၂စီးကိုပြန်ပေးသော်လည်း ကျန်တန်ဖိုးကြီးသည့် ၆စီးကို ယခုထိ ပြန်မပေးသေးကြောင်း သိရသည်။

ပြီးခဲ့သည့် ဇူလိူင်လ၂၇ရက်တွင် လွယ်လုံရွာအနီး PNOဂိတ်စခန်းကို တော်လှန်ရေးအဖွဲ့က လာရောက်တိုက်ခိုက်ခဲ့ပြီး PNOဘက်၅ဦး ထက်မနည်း သေဆုံးခဲ့သေးကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။