သျှမ်းပြည် သီပေါမြို့တွင် တိုက်ပွဲကြား နေရပ်ပြန်ပြီး ပစ္စည်းပြန်သယ်သည့် စစ်ဘေးရှောင်အမျိုးသမီး (၂) ဦး လက်နက်ကြီးကျည် ထိမှန်ပြီး သေဆုံးသွားကြောင်း စုံစမ်းသိရသည်။
ဩဂုတ်လ (၃၁) ရက်တွင် သီပေါမြို့ပေါ် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ တိုက်ပွဲကြား နေအိမ်သို့ ပြန်ပြီး ပစ္စည်းပြန်သယ်သည့် ဇာတ်စုရပ်မှ စစ်ဘေးရှောင် အမျိုးသမီး (၂) ဦး လက်နက်ကြီး ထိမှန်ပြီး သေဆုံးသွားကြောင်း ဒေသခံများက ပြောသည်။
“ဇာတ်စုရပ်မှာ လက်နက်ကြီးကျည် ကျကွဲလို့ အသက် ၆၀ ကျော်အရွယ် သက်ကြီးတစ်ယောက် ဆုံးတယ်။ ညောင်ကိုးပင်ဘက်လည်း ကျတာ၊ နမ့်ပေါ့ဘက်မှာ မိန်းကလေးတစ်ယောက် သေတယ်။ ရှေ့ရက်က ဖြစ်တာ နှစ်ယောက်သေတာ။ အခုဆုံးတဲ့ အဖွားဆိုရင် သူစစ်ရှောင်နေရင်းနဲ့ အဝတ်ပြန်လာသယ်တာ”ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
သီပေါမြို့ ဇာတ်စုရပ်တွင် လက်နက်ကြီး ထိမှန်ပြီး သေဆုံးသွားသူမှာ အသက် (၆၀) နှစ်ကျော် အရွယ်ရှိ ဒေါ်စိန်ပွင့် နှင့် ညောင်ကိုးပင်မှ အသက် (၄၀) နှစ်ခန့်အရွယ်ရှိ အမျိုးသမီးတစ်ဦးတို့ဖြစ်ကြောင်း သိရသည်။
အလားတူ ယမန်နေ့ (စက်တင်ဘာ ၂ ရက်) ညနေပိုင်းတွင်လည်း သီပေါမြို့အခြေစိုက် စစ်ကောင်စီတပ် ခလရ-(၂၃) အနီးရှိ ကုံးစုံ(လီရှော)ရွာသို့ လက်နက်ကြီးကျည် ကျရောက်ပေါက်ကွဲခဲ့ခြင်းကြောင့် အမျိုးသားတစ်ဦး ထပ်မံဒဏ်ရာရရှိခဲ့ကြောင်း ဒေသခံများက ပြောသည်။
“မနေ့ကလည်း ၂၃ တပ်ရဲ့ အနောက်က ကုံးစုံ(လီရှော)ရွာကို လက်နက်ကြီးကျတာ။ ဘယ်အဖွဲ့က ပစ်တာလည်းတော့ မသိဘူး။ အိမ်ကို လက်နက်ကြီးမှန်ပြီး အိမ်ထဲက ဦးလေးတစ်ယောက် ဒဏ်ရာရတယ်။ တချို့လည်း မြို့ထဲကနေ တပ်ဘက်ကို ပစ်သွားတယ်လို့ ပြောကြတယ်။ သီပေါမှာ တိုက်ပွဲကြား သေတာဆိုရင် ၃၀ ကျော် ရှိပြီ”ဟု ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
တိုက်ပွဲကြောင့် သီပေါမြို့ပေါ် မြို့လယ်၊ တောင်မြို့၊ အုတ်ကျင်း၊ မဟာမုနိ ဘုရားကြီးဘက်၊ ညောင်ကိုးပင်၊ ဟတ်လျန်ရပ်နှင့် ပန်းတိမ်(မြောက်)ရပ်ကွက်တို့တွင် ထိခိုက်ပျက်စီးမှု များပြားကြောင်း ဒေသခံများက ဆိုသည်။
လက်ရှိတွင် တိုက်ပွဲကြား ထိခိုက်ဒဏ်ရာရသူများကို သီပေါမြို့ပေါ် ပရဟိတ အသင်းများမှ အရေးပေါ် ဆေးကုသပေးနေပြီး ရပ်ကွက်အတွင်း စားဝတ်နေရေး အခက်အခဲ ရှိသည့် မိသားစုများနှင့် မြို့ပြင် လှိုဏ်ဂူများတွင် ထွက်ပြေးတိမ်းရှောင်နေသည့် စစ်ဘေးရှောင်များကိုလည်း စားနပ်ရိက္ခာ ကူညီပေးနေကြောင်း သိရသည်။
ပြီးခဲ့သည့် ဩဂုတ်လ ၂၇ ရက်ကလည်း သီပေါမြို့ပေါ် ရပ်ကွက်များသို့ လူအိပ်မောကျနေသည့် ညအချိန် စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ခြင်းကြောင့် အထက(၃)နှင့် အမက(၃) စာသင်ကျောင်းများ ထိခိုက်ပျက်စီးခဲ့ပြီး ကျောင်းအနီး နေထိုင်သည့် အရပ်သား (၂) ဦး သေဆုံးခဲ့ကြောင်း သီပေါဒေသခံများက ပြောသည်။
သီပေါမြို့အခြေစိုက် စစ်ကောင်စီလက်အောက်ခံ ခြေလျင်တပ်ရင်း ခလရ(၂၃)၊ ခြေမြန်တပ်ရင်း(၅၀၃၊ ၅၀၄) တို့ကို TNLA ပူးပေါင်းတပ်ဖွဲ့က ဆက်လက်တိုက်ခိုက်နေပြီး ယမန်နေ့ (စက်တင်ဘာလ ၁ ရက်) တွင် စစ်ကောင်စီတပ်မှ လေကြောင်းဖြင့် စားနပ်ရိက္ခာများ လာချသွားခဲ့ကြောင်း သိရသည်။
Leave a Comments