သျှမ်းပြည် အရှေ့ပိုင်း မိုင်းဆတ်ခရိုင်အတွင်းရှိ ‘ဝ’တပ်ဖွဲ့ UWSA တောင်ပိုင်းစစ်ဒေသ (၁၇၁) မှ စစ်မှုထမ်း တပ်သားသစ် (၄၀၀၀) စုဆောင်းမည်ဖြစ်ပြီး ပြည်ပရောက် ‘ဝ’အမျိုးသားများကို နေရပ်ပြန်ခေါ်နေကြောင်း စုံစမ်းသိရသည်။
မိုင်းဆတ်ခရိုင်အတွင်း နေထိုင်ပြီး လာအိုနိုင်ငံသို့ အလုပ် သွားရောက်လုပ်ကိုင်နေသည့် ‘ဝ’အမျိုးသားများကို အမြန်ဆုံး နေရပ်ပြန်ပြီး စစ်ရေးကော်မတီများထံ စက်တင်ဘာလ (၇) ရက် နောက်ဆုံး စာရင်းပေးသွင်းရန် ‘ဝ’ပြည်သွေးစည်းညီညွတ်ရေးတပ်မတော် UWSA ၏ တောင်ပိုင်းစစ်ဒေသ (၁၇၁) မှ ဩဂုတ်လ ၃၀ ရက်စွဲဖြင့် သတင်းထုတ်ပြန်လိုက်သည်။
“စကောက်တာကတော့ ပြီးခဲ့တဲ့ လကတည်းက၊ စစ်သားကောက်မယ်လို့ စပြီး ကြေညာကတည်းကပဲ။ သတင်းမှာ တက်တာတော့ သိပ်မတွေ့ဘူးလေ။ ဘယ်မှာပဲ ရောက်ရောက် အကုန်ခေါ်တယ်။ သားမရှိရင် အဖေကို ယူတယ်၊ သားက အဖေကို သွားပြီး အစားမထိုးခင်အထိ ခေါ်ထားတာ”ဟု မိုင်းတုံမြို့နယ်မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
UWSA တောင်ပိုင်းတပ် (၁၇၁) စစ်ဒေသအတွင်း နေထိုင်ပြီး ပြည်ပရောက်နေသူများသည် သတ်မှတ်ချိန် ကျော်လွန်၍ စာရင်းပေးသွင်းရန် ပျက်ကွက်ပါက အုပ်ချုပ်ရေးနှင့် စစ်ရေးကော်မတီ၏ ဖမ်းဆီးအရေးယူခံရမည် ဖြစ်ပြီး စစ်မှုထမ်းရန် တပ်သားသစ် (၄၀၀၀) အထိ စုဆောင်းသွားမည်ဟုလည်း ဒေသခံများက ပြောသည်။
ယခုကဲ့သို့ ‘ဝ’တောင်ပိုင်းတပ်၏ (၁၇၁) စစ်ဒေသအတွင်း တပ်သားသစ် (၄၀၀၀) အထိ စုဆောင်းမည့် ကိစ္စနှင့် ပတ်သက်ပြီး အတည်ပြုမေးမြန်းရန် UWSA တောင်ပိုင်းဆက်ဆံရေးအဖွဲ့သို့ သျှမ်းသံတော်ဆင့်မှ ဆက်သွယ်ရန် ကြိုးစားခဲ့သော်လည်း အဆက်အသွယ် မရရှိခဲ့ပေ။
“စစ်သားတွေက တော်တော်များများကို လားရှိုးလုံခြုံရေးအတွက် ခေါ်သွားပြီ။ ဒီဘက်မှာ ရှိတဲ့ တချို့တပ်စခန်းတွေဆိုရင် အရင်က အင်အား ၆၀ လောက်ရှိတဲ့ တပ်က အခု ၁၅ ယောက် အဲ့လောက်ပဲ ကျန်တယ်။ အခု လူသစ်ကောက်တယ်ဆိုတာ လိုတဲ့ နေရာမှာ အင်အားပြန်ဖြည့်ဖို့”ဟု UWSA တောင်ပိုင်းတပ်မှ အရာရှိငယ်တစ်ဦးက သျှမ်းသံတော်ဆင့်ကို ပြောသည်။
အလားတူ ဩဂုတ်လဆန်းပိုင်းမှ စတင်ပြီး မိုင်းတုံမြို့နယ်အတွင်းရှိ မုံးထော်-မုံးထ၊ ဟွေအော်၊ ဟိုပန်၊ ဟိုရွက်၊ မိုင်းကျွတ်နှင့် ခိုင်းလုံကျေးရွာအုပ်စုများတွင် ‘ဝ’တပ်ဖွဲ့ UWSA မှ အသက် (၁၅) နှစ်အထက် ကျား/မ အားလုံးကို စစ်မှုထမ်းရန် လူသစ်စုဆောင်းနေကြောင်း မိုင်းတုံဒေသခံများထံမှ သိရသည်။
သျှမ်းပြည်အရှေ့ပိုင်း မိုင်းဆတ်ခရိုင်အတွင်း တည်ရှိပြီး ထိုင်းနိုင်ငံနှင့် ထိစပ်နေသည့် ‘ဝ’တပ်ဖွဲ့ တောင်ပိုင်းစစ်ဒေသ (၁၇၁) တွင် တပ်မဟာ (၅) ခု၊ တပ်ရင်း (၂၅) ခုဖြင့် ဖွဲ့စည်းထားပြီး ‘ဝ’လူဦးရေ တစ်သိန်းခန့် နေထိုင်သည်။
ပြီးခဲ့သည့် ဇူလိုင်လ အတွင်းက အရှေ့မြောက်တိုင်း စစ်ဌာနချုပ် ရမခ အခြေစိုက်ရာ လားရှိုးမြို့ရှိ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ ‘ဝ’တပ်ဖွဲ့ UWSA ၏ လုံခြုံရေးတပ်ဖွဲ့ဝင်များ လားရှိုးမြို့ပေါ်သို့ ဝင်ရောက်တပ်စွဲခဲ့ပြီး ယင်းမတိုင်မီ တန့်ယန်းမြို့နယ်တွင်လည်း တပ်အင်အား ၂၀၀၀ ကျော် အင်အားဖြည့်တင်းခဲ့ကြောင်း ဒေသခံများထံမှ သိရသည်။
Leave a Comments