သျှမ်းပြည်တောင်ပိုင်း၊ တောင်ကြီးမြို့ ဘုရားဖြူရပ်ကွက်ရှိ ရေကန်ဟောင်းနားတစ်ဝိုက် ဈေးသည်များကို စည်ပင်မှ တဲဆောက်လုပ်ပြီး ရောင်းချခွင့်မပြုတော့ဘဲ ဖျက်သိမ်းခိုင်းနေကြောင်း သိရသည်။

ပြီးခဲ့သည့် နှစ်များတွင်လည်း တောင်ကြီးမြို့ ဘုရားဖြူ ကန်ဘောင်ဈေးကို လမ်းပိတ်သည်ဟူသော အကြောင်းပြချက်ဖြင့် ဖျက်သိမ်းရန် အသိပေးခဲ့ပြီး ယခု ဩဂုတ်လ ၂၈ ရက်တွင်လည်း မြို့နယ်စည်ပင်ရုံးမှ ဘုရားဖြူကန်ဘောင်နံဘေးတွင် ဝါးဖြင့် ဆိုင်ဆောက်လုပ်ထားသည့် ဈေးဆိုင်များကို အမြန်ဖျက်သိမ်းပြီး နေရာပြောင်းရွှေ့ရန် လာရောက်သတိပေးသွားကြောင်း သိရသည်။

“သူတို့က တဲထိုးပြီး ရောင်းတဲ့ဆိုင်၊ စင်ဆောက်ပြီး ရောင်းတဲ့ဆိုင်ကို ဖျက်ခိုင်းတာ။ ဒီတိုင်းမြေပေါ်မှာ ချရောင်းရင်တော့ ရတယ်။ အဓိကတော့ ကန်က ရေပြည့်နေတော့ မြေပြိုပြီး ကန်ဘောင်ထဲ ကျမှာ စိုးလို့ထင်တယ်”ဟု ဈေးသည်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထိုကဲ့သို့ တဲထိုးရောင်းချနေသည့် ဆိုင်နှင့် စင်ဆောက်ပြီး ရောင်းချနေသည့် ဆိုင်များကို ဖျက်ခိုင်းခြင်း၊ ယခုကဲ့သို့ မိုးတွင်းကာလတွင် ဈေးသည်များအနေဖြင့် အအေးမိခြင်း၊ ရောင်းချသည့် သီးနှံများ ပျက်စီးခြင်းများ ဖြစ်စေနိုင်သဖြင့် ဖျက်သိမ်းရန် အခက်အခဲ ရှိကြောင်း သိရသည်။

“ရောင်းတဲ့သူ အများစုက အဖွားအရွယ်တွေ များတယ်။ ခုလို ဖျက်သိမ်းပြီး မြေကြီးပေါ်မှာ ဒီတိုင်း နေရင် အကုန် အအေးမိပြီး ဖျားလိမ့်မယ်။ အသီးအရွက်တွေလည်း မိုးရွာရင် မြေကြီးတွေ ဖုံးကုန်ပြီး ရောင်းမရဖြစ်မှာ စိုးတယ်။ ဒီဈေးကို အမှီပြုပြီး ဈေးသုံးနေရတာ။ နီးနီးနားနားပဲဆိုတော့ ဈေးသုံးရတာ အဆင်ပြေနေတယ်”ဟု ဘုရားဖြူရပ်ကွက်တွင် နေထိုင်သူ တစ်ဦးက ပြောသည်။

တောင်ကြီးမြို့ ဘုရားဖြူဈေးသည် ရေကန်ဟောင်းနံဘေးတွင် ဈေးဆိုင်များ တည်ခင်းကာ ဒေသထွက် သီးနှံအသီးအရွက်များကို လပြည့် လကွယ်နေ့များမှ လွဲ၍ နေ့စဉ်နေ့တိုင်း ရောင်းချနေလျှက်ရှိသည့် ဈေးငယ်လေးဖြစ်ပြီး ဘုရားဖြူရပ်ကွက်တွင် နေထိုင်သည့် လူများက အဓိက အားထားနေရသည့် ဈေးဖြစ်သည်။

ယခုလက်ရှိ ရေကန်ဟောင်းတွင် ရေပြည့်နေလျှက်ရှိပြီး ကန်နံဘေးတွင် ပလပ်စတစ်အမှိုက်များနှင့် ဟင်းသီးဟင်းရွက် ပုပ်သိုးအနံ့များကြောင့် လမ်းသွားလာသည့် ပြည်သူများအတွက် အခက်အခဲ ဖြစ်သဖြင့် စည်ပင်မှ လာရောက် ဖျက်သိမ်းခိုင်းကြောင်း သိရသည်။

အလုပ်သင် သတင်းထောက် နန်းလရောင် ရေးသားသည်။