သျှမ်းမြောက်၊ နောင်ချိုမြို့နယ်၊ တောင်ခမ်းရွာ မြောက်ဘက်ရှိ (၂၀၆) အမြောက်တပ်ကို TNLA ပူးပေါင်းတပ်က သိမ်းပိုက်လိုက်ပြီး စစ်ကောင်စီ လေကြောင်းက အဆက်မပြတ် ဗုံးကြဲ ခုခံနေကြောင်း စစ်ရေးသတင်းရင်းမြစ်က ယနေ့ (ဩဂုတ်လ ၂၉ ရက်) နံနက်ပိုင်း အခြေအနေကို ပြောသည်။
ယနေ့ မနက်ပိုင်း (၂၀၆) အမြောက်တပ် တပ်ရင်းရုံး အနီးရှိ ရှင်းလင်းဆောင်ကို TNLA ပူးပေါင်းတပ် ဝင်ရောက် သိမ်းပိုက် ရှင်းလင်းနေပြီး စစ်ကောင်စီက အမြောက်စစ်ဆင်ရေး ကွက်ကဲမှု ဌာနချုပ် (မစခ-၉၀၂) တပ်အတွင်း စုပြုံ ခုခံနေသည်ဟု ၎င်းကရှင်းပြသည်။
“ဒီနေ့မနက် ၂၀၆ ကတော့ ရပြီ ပြောလို့ရတယ်။ မစခ (၉၀၂) ကတော့ စခန်းက ကြီးတယ်၊ စခန်းအလယ်မှာ ကျောက်ဂူတောင်ကြီးရှိတယ်။ အဲဒီကနေ စုပြုံ ခုခံနေတယ်ပေါ့။ သူတို့စစ်ကူစောင့်ရင်း ခုခံနေတယ်လို့ ယူဆရတယ်။ လေကြောင်းက အဆက်မပြတ် ဗုံးကြဲနေတယ် ခုထိ” ဟု စစ်ရေးသတင်းရင်းမြစ်က ရှင်းပြသည်။
သိမ်းပိုက်ခံထားရသည့် တောင်ခမ်း (၂၀၆) အမြောက်တပ်ရင်း၏ တပ်ရင်းမှူး ထွက်ပြေးသွားသည်ဟု သတင်းထွက်ပေါ်နေပြီး စစ်ဝါဒဖြန့် ချန်နယ်များတွင် တပ်ရင်းမှူးနှင့် အဆက်အသွဘ် ပြတ်နေကြောင်း ရေးသားနေသည်ကို တွေ့ရသည်။
ပြီးခဲ့သည့် ရက်ပိုင်းကစ၍ ပြင်ဦးလွင်မှ တောင်ခမ်းဘက်သို့ လက်နက်ကြီး ပစ်ကူပေးနေရာ တာဝေးပစ်အမြောက် အချက်များစွာ ပစ်ခတ်၍ ပစ်ကူပေးခဲ့ကြောင်း မြို့ခံ တစ်ဦးက ဆိုသည်။
တောင်ခမ်းဒေသတွင် စစ်ကောင်စီ၏ အမြောက်စစ်ဆင်ရေး ကွက်ကဲမှု ဌာနချုပ် (မစခ-၉၀၂)၊ အမတ (၃၅၄)၊ အမတ (၂၀၆)၊ အမတ (၄၀၆) စသည့် အမြောက်တပ် ၄ ခု အထိုင်ချ တပ်စွဲထားပြီး တိုက်ခိုက်ရေးတပ်များ အင်အားဖြည့် ခုခံနေခြင်း ဖြစ်သည်။
ပြီးခဲ့သည့် ဇူလိုင်လ ၁၀ ရက်နေ့က နောင်ချိုမြို့ တောင်ဘက်ရှိ အမှတ် (၆၀၆) ဒုံးတပ်ကို TNLA ပူးပေါင်းတပ်များ တိုက်ခိုက် သိမ်းပိုက်ခဲ့ရာ ယင်းတပ်မှ ဆုတ်ခွာသွားသည့် စစ်ကောင်စီတပ်များ တောင်ခမ်းတွင် သွားရောက် ပူးပေါင်း ခုခံနေသည့်နည်းတူ စစ်အင်အားလည်း အဆက်မပြတ် ဖြည့်တင်းနေသည်။
Leave a Comments