သျှမ်းတောင်၊ မြို့တော် တောင်ကြီးသို့ တိုင်းရင်းသားတပ်များ ဦးတည် ချီတက်နေသည် ဆိုသည့် သတင်းများ ထွက်ပေါ်နေသဖြင့် မြို့ပေါ် တိုက်ပွဲများ ဖြစ်ပွားမည်ကို စိုးရိမ်နေရကြောင်း ဒေသခံများက ယနေ့ (သြဂုတ်လ ၂၉ ရက်) တွင် ပြောသည်။
လက်ရှိ တောင်ကြီးမြို့နှင့် အနီးတဝိုက် တည်ငြိမ်နေသော်လည်း ရပ်စောက်-ကျောက်ဂူ ဘက်တွင် တိုက်ပွဲ ဖြစ်ပွားမှုများ ရှိနေသကဲ့သို့ ဆီဆိုင်မြို့နယ်တွင်လည်း တိုက်ပွဲများ ဖြစ်ပွားနေစဥ် တိုင်းရင်းသားတပ်များ ချီတက်လာသည် ဆိုသည့် သတင်းကြောင့် မြို့ပေါ် တိုက်ပွဲ ဖြစ်ပွားမည်ကို စိုးရိမ်ကြောင်း ဒေသခံ တဦးက ဆိုသည်။
“သျှမ်းတပ်က တောင်ကြီးကို ဝင်မယ်လို့လည်း ပြောနေကြတော့ တိုက်ပွဲဖြစ်မလား စိုးရိမ်တာပေါ့။ သတင်းတွေက အမျိုးမျိုးဆိုတော့” ဟု တောင်ကြီးမြို့ခံ တစ်ဦးက ပြောသည်။
သျှမ်းပြည်အတွင်း အင်အားကြီးမားသည့် သျှမ်းတပ်နှင့် မဟာမိတ်တပ် အင်အားထောင်ချီ ပူးပေါင်း ချီတက်နေရာ ယမန်နေ့က ဟိုပုံးဒေသသို့ ရောက်ရှိနေပြီဖြစ်ကြောင်း စစ်ရေးသတင်းရင်းမြစ်က အတည်ပြုသည်။
“ဟိုပုံးဘက် ရောက်နေပြီ။ ဘာကိုရည်ရွယ်နေတယ် ဆိုတာတော့ မပြောတတ်ဘူး” ဟု ၄င်းကဆိုသည်။
ယင်းကိစ္စနှင့် ပတ်သက်၍ သျှမ်းတော်လှန်ရေးတပ် SSPP နှင့် “ဝ” တပ်ဖွဲ့ ပြောရေးဆိုခွင့် ရှိသူများထံ ဆက်သွယ် မေးမြန်းသော်လည်း ပြန်လည် ဖြေကြားခြင်း မရှိသေးပေ။
ပြီးခဲ့သည့် ရက်ပိုင်း အတွင်းက ဒေသတွင်း အင်အားကြီးမားသည့် စစ်ကောင်စီ လက်အောက်ခံ ပအိုဝ်း ပြည်သူ့စစ် (PNO) အင်အား သောင်းချီ အင်အားပြပြီးနောက် ယခုကဲ့သို့ တိုင်းရင်းသားတပ်များ ချီတက်လာသည့် သတင်း ထွက်ပေါ်လာခြင်း ဖြစ်သည်။
လက်ရှိ တောင်ကြီးမြို့နယ်နှင့် ဆက်စပ်နေသည့် ရပ်စောက်၊ ညောင်ရွှေ၊ ဆီဆိုင်နှင့် ဟိုပုံးမြို့နယ် အတွင်း တိုင်းရင်းသား တော်လှန်ရေးတပ်များ လှုပ်ရှားနေပြီး တိုက်ပွဲဖြစ်ပွားမှုများလည်း ရှိနေကြောင်း ဒေသခံများက ပြောဆိုထားသည်။
Leave a Comments