သျှမ်းပြည် ကလောမြို့နယ်မှ စစ်မှုထမ်းရန် လူသစ်စုဆောင်းခံရသူများကို စစ်ကောင်စီတပ်မှ မြစ်ကြီးနားသို့ ပို့ဆောင်ပြီး စစ်သင်တန်းတက်ခိုင်းနေကြောင်း စုံစမ်းသိရသည်။
ဩဂုတ်လ တတိယပတ်မှ စတင်ပြီး ကလောမြို့၊ အောင်ပန်းမြို့ပေါ်ရှိ ရပ်ကွက်များနှင့် ကျေးရွာအုပ်များမှ စစ်မှုထမ်းရန် လူသစ်စုဆောင်းခံထားရသူ လူငယ် (၃၀) ကျော်ကို စစ်ကောင်စီတပ်မှ မြစ်ကြီးနားသို့ ပို့ဆောင်ပြီး စစ်သင်တန်း တက်ရောက်ခိုင်းနေကြောင်း အောင်ပန်းဒေသခံများက ပြောသည်။
“အောင်ပန်းက စစ်မှုထမ်းဖို့ လူသစ်စုထားတာ အခု မြစ်ကြီးနားပို့လိုက်ပြီ။ ကလောမြို့ပေါ်နဲ့ကော ပေါင်းလိုက်ရင် အယောက် (၃၀) လောက် ရှိမှာ။ ဟိုမှာ ရောက်နေတဲ့လူတွေက ၁ လလောက် သင်တန်းပေးပြီးရင် ရှေ့တန်းပို့တော့မှာဆိုပြီး ပြောနေတာ။ အိမ်ကနေတောင် ဖုန်းဘေတွေ လှမ်းဖြည့်ခိုင်းနေတာ”ဟု အောင်ပန်းမြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကလောမြို့နယ်တွင် ယခုတစ်ကြိမ် စစ်မှုထမ်းရန် လူသစ်စုဆောင်းခံရသူများမှာ (၃) ကြိမ်မြောက်ဖြစ်ပြီး အသက် (၂၀) နှစ်မှ (၃၅) အကြား လူငယ်အများစုဖြစ်ကြောင်း သိရသည်။
ထို့အပြင် စစ်မှုထမ်းစာရင်းတွင် ပါဝင်ပြီး ကိုယ်တိုင်မသွားလိုသူများကို ရပ်ကွက်အုပ်ချုပ်ရေးမှူးများနှင့် ညှိနှိုင်းပြီး တစ်ဦးလျှင် ကျပ်သိန်း (၆၀) ဖြင့် လူအစားထိုး စေလွှတ်ပြီး အခြားနေရာသို့ ထွက်ပြေးတိမ်းရှောင်သွားရကြောင်း ဒေသခံများက ပြောသည်။
“စာရင်းထဲပါပြီး မသွားချင်တဲ့လူတော့ အုပ်ကြီးနဲ့ ညှိပြီး လူစားထိုးရှာပေါ့။ တစ်ယောက် တစ်ယောက်ကို သိန်း (၆၀) ပေးရတယ်။ လူရှာရတော့လည်း အိမ်မှာ အေးဆေးနေရမယ် မထင်နဲ့၊ တခြားနေရာ ရှောင်ရတာပဲ။ ရပ်ကွက်ထဲတောင် မျက်နှာမပြရဲကြတော့ဘူး”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
လက်ရှိတွင် သျှမ်းပြည်တောင်ပိုင်းရှိ တောင်ကြီးနှင့် ရွှေညောင်မြို့များတွင် စစ်မှုထမ်းအတွက် ငွေကြေးအတင်းအကြပ် ကောက်ခံနေပြီး ဟိုပုံးမြို့နယ်တွင် အမျိုးသမီးများကို စစ်မှုထမ်းရန် စတင်ခေါ်ဆောင်တော့မည်ဟု ဒေသခံများထံမှ သိရသည်။
အလားတူ သြဂုတ်လ ၁၆ ရက်နေ့က ပြည်သူ့လုံခြုံရေးနှင့် အကြမ်းဖက်နှိမ်နှင်းရေး ဗဟိုကြီးကြပ်မှုအဖွဲ့ဟု စစ်ကောင်စီက ဖွဲ့စည်းလိုက်ပြီးနောက် လမ်းအလိုက်၊ ရပ်ကွက်အလိုက်၊ ကျေးရွာအလိုက် လုံခြုံရေး တည်ဆောက်ရမည်ဟု စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က စစ်ကောင်စီထုတ် သတင်းစာမှတစ်ဆင့် (သြဂုတ် ၂၅)ရက် ကပြောသည်။
အဓိကအားဖြင့် ပြည်သူ့စစ်မှုထမ်း ဥပဒေအောက်တွင် အကျုံးမဝင်သည့် အသက် ၃၅ နှစ်နှင့်အထက် အမျိုးသားများကို အဓိကပစ်မှတ်ထားခေါ်ယူမည်ဟု သိရှိရသည်။
Leave a Comments